Archives par mot-clé : Bondye

Lapriyè pou ofri Bondye lavi’w

Prensip, , , ,

“Si se bèt ou ta vle yo touye pou ofri ou, mwen ta ofri bèt ba ou. Men, ou pa pran plezi nan vyann bèt y’ap boule ofri ba ou yo. Ofrann ki fè Bondye plezi, se lè yon moun soumèt tèt li devan li. Bondye, ou p’ap janm meprize moun ki soumèt tèt li devan ou, moun ki rekonèt tò li.” Sòm 51: 16-17, vèsyon HAT98

Sakrifis ki fè Bondye plezi se lè ou soumèt li ak li nan tout sa w’ap fè. Pawòl yo parèt senp men mounn ki ap oswa vle grandin nan relatyon ak Bondye konnen se wout ki sèlman posin pa pouvwa Sentespri li. Se sak fè chak moman li ankouraje ou pou “abiye’w” pa lafwa.

Pi gwo kan konba nan kay chak pitit li se nan panse ak mo ki chwazi yo. Lide nan tèt ou yo detèmine vikwa ak echèk oy nan chak etap. Yo ka bay nenpòt sitiyasyon nan ou oswa nan anviwònman ou lavi oswa detwi’l.

Ak tout pil enfòmasyon ou recevwa chak jou ak experyans ou ka fè ou kagou. Se sak fè li enpòtan pou ou fè anpil efò jere yo pi byen ke monnen nan pòch ou e kontinye ofri Bondye lavi’w de tan an tan lè w’ap evalye tout chemen li pase ave’w, ak fanmi’w, zanmi’w etc.

Sonje pa gen chay ki twò lejè ni two lou pou Yaweh. Kontinye pwoche pi prè li e soumèt lavi ou (lide ou yo, rèv, lajwa, siksè ak echèk ou experyanse, lasante‘w etc). Lè ou fè sa konsa Bondye va ede’w konprann idantite’w nan li plis. Li ap louvri je’w sou anpil bagay, lave e kenbe kè’w pwòp pou ou ka fleri.

Pi bon moman an pou ofri lavi’w (rekonekte ak Bondye, pase yon ti tan de refleksyon sou idantite’w ak desizyon w’ap pran yo) se kounyea. Pi bèl òpòtinite a se jodia menm. Ou pa bezwen anpil bagay ni rakonte anpil detay, sèlman fèmen je ou si ou kapab e louvri kè’w. Bondye la avè’w. Li la pou ou. L’ap konbat pou ou e li renmen koze ak ou.

Ann Lapriyè:
Bondye, idantite’m nan ou se pi gwo trezò’m. Koze ak ou se pi gwo ranfò’m. Se sa ki fè mwen mande’w pou ou kenbe je’m sou ou. Kit m’ap souri oswa ap soufri, mwen vle rete atache ak ou. Tankou yon lanmidon byen pwès, mwen vle rete kole ak ou.
Ede’m grandi plis nan ou pou mwen pwogrese nan fason ki fè ou plezi sèlman.

Ou pa pran plezi nan ofrann exteryè. Ni ou pa meprize pitit ou ki ap chache fas ou. Nan kontèks sa, mwen mande’w pou lave kè’m.” Pa kite okenn move lide nan kè’m . Mete bon lide nan tèt mwen, pou m sa kenbe fèm. Pa voye’m jete. Pa wete lespri ou te ban mwen an” (Sòm 51:11-12).

Gide mwen. Sankyifye mwen. Pa kite distraksyon lavi fè mwen pèdi direksyon ou. Se pou lavi’m yon benediksyon ki reflekte glwa ou nan tout gwandè li tout kote mwen pase.
Ou se tout fòs ak espwa mwen, mwen fixe je’m sou ou.


Mwen ofri’w kò mwen, kè mwen, nanm ak lespri mwen. Ak bra’m louvri, mwen ofri lavi mwen tout antye. Mwen konnen se nan ou sèl mwen asire. Se avè’w sèlman mwen gen sekirite.

Mèsi pou amitye’w, lanmou’w, prezans ou, ak pwoteksyon ou tout kote mwen menm, fanmi’m, zanmi’myo, ak chak grenn pitit ou pase.
Mèsi pou favè ou sou lavi nou e jan ou kreye nou kòm mounn nouvo.


Mèsi pou mizerikòd ak konpasyon ou ki pa janm chanje.
Kenbe lide’m yo sou ou pou mwen pi obeyisan lè ou pale e tande vwa ou pi klè. Mèsi paske w’ap netoye kè’m e ranpli li ak Sentespri ou pi plis.
Tout glwa pou ou Yaweh. Amen

Senyè lave kè mwen

Prensip, ,

” […] Ou vle pou yon moun sensè nan tou sa l’ap fè. Tanpri, fè’m konprann tout bagay non! Wete peche’ m lan avèk yon branch izòp, konsa m’a nan kondisyon pou’m fè sèvis pou ou. Lave’m, m’a pi blan pase koton.”
Sòm 51:6‭-‬7 HAT98

Yon kè ki pwop necesè pou grandi nan idantite ou nan Bondye non sèlman pou ou tande vwa li byen lè li ap pale ak ou men tou pou ou grandi nan sajès ak bon konprann. Li fasil pou yon mounn peche, men menm jan David te fè nan Sòm 51 li enpotan pou mande Bondye pou lave kè’w pou li vinn pi blan ke koton [pi, san kontraryte] paske li ap retire tout sa ki pa sòti ni li yo tankou laperèz ak move lide.

Ann Lapriyè

Bondye mwen vle sèvi’w ak yon kè sensè. Mwen vle renmen tèt mwen ak tout kreyati ou yo menm jan ou renmen’m.
Mwen realize ke objektif sa pa toujou fasil.
Anpil fwa mwen santi mwen echwe nan yon fason oswa yon lòt ki fè mwen peche kont ou E pafwa kont lòt sèm ak frèm yo.

Mwen pa vle anyen ki pa soti nan ou gonfle kè’m.
Rantre nan tout ti kwen nanm mwen. Santifye’m.
Retire tout move lide, dout, laperèz, ak tout sa ki pa fè’w plezi.
Pa kite okenn espas pou rankinn, jalouzi, logèy, laperèz, dekourajman,
Ni rayisans ak degoutans lè mwen wè oswa experyanse anpil injistis.

Netoye’m byen pwòb pou mwen gen yon kè tou nèf.
Lè fòs mwen ta vle febli, kenbe’m pou mwen ka kite je’m yo fixe sou ou.
Pa kite fenwa ak move lide anvayi’m.
Edem pou’m yon veso chanjman
E pote limyè tout kote mwen pase.
Pwoteje lespri’m e lave kè’m pou mwen fè travay ou pi byen nèt al kole.

Ou se zanmi ki la nan tout ti koze.
Nenpòt bagay zorèy ou toujou pre.
Lave kè’m, netoye’l byen pwòp.
Wete tout sa nan li ki pa soti de ou.
Tout sa ki vid oswa ki ta vle pran espas ou
Pou’m ka gen plis plas pou Sentespri ou abite.
Konsa ma va renmen pi plis menm jan ou renmen’m paske m se yon mounn nouvo.

Nan non Jezi. AMEN.

Remèsiman pou Bondye!

Prensip, , , , , ,

“Se tout tan m’ap di Senyè a mesi, mwen p’ap janm sispann fè lwanj li. M’ap fè lwanj li pou sa li te fè. Se pou tout moun ki anba tray tande sa pou yo ka fè kè yo kontan. Mete tèt nou ansanm avè m’ pou fè konnen jan Senyè a gen pouvwa. Ann fè lwanj li ansanm!” Sòm 34:1-3

Yon ti lèt lanmou pou Bondye de yon kè ki gen anpil rekonesans ak remèsiman pou tout mèvèy li fè chak jou.

Dat: Chak Jou ou Banm Lavi

Sijè: Mèsi

Bondye lanmou,

Pandan yon pil tan mwen te panse lanmou’w pou mwen se te pawòl kremòl
Mwen te panse li te yon fenomèm twò dwòl. Sitou mwen pat ka konprann koman jouk mwen menm tout mwen te ka eritye’w. Bib la rakonte mwen fèt nan imaj ou men menm sa gen anpil fwa mwen te wè doub. Sosyete, kilti, ak sousi lavi toujou ap vle fè’m pase koub nan tè glise.

Dapre majeste ou, li pa fasil pou konprann poukisa mwen enpòtan pou ou. Tankou yon egzile san patri,
Mwen pat ka konprann lanmou’w pou mwen san patipri. Se sa ki te fè mwen pran anpil tan pou reyalize pwofondè lanmou sa e aksepte li ak enpòtans lavi mwen pou ou.

Tankou douvanjou k’ap leve pou anonse yon nouvo jounen, tipatipa w’ap louvri je’m.
Ak dlo rekonesans nan yon kè benyen ak lanmou, mwen lave pye’w ak lwanj ak adorasyon mwen yo. Souri nan lèv mwen temanye grandè ou. Chak ti baton tanbou kè’m raple mwen de proximite’w ak mwen.

Plis mwen ap pase tan avè’w,
Plis mwen ap dekouvri jan ou te pran san ak tan ou pou te fè’m kreyòl ak yon eritaj wayal. Chak ti detay nan mwen byen kalkile (Sòm 139).

Nan lagè pou kè pitit ou sila ou se pi gran general ki pa janm pèdi yon batay. Mèsi pa sifi pou’w diw paske li pa ase pou mwen exprime bonte ou. Mwen koube’m byen ba devan’w.

Jodia, mwen pa prezante’m devan ou pou mwen fè’w yon demand men sèlman di ou mèsi. Mwen konsyan mwen pa fè’l ase men recevwa adorasyon ak aksyon de gras mwen.

Ou fè’m konfyans menm lè pafwa mwen doute de tèt mwen.
Ou toujou ap montre’m nan pawòl ou kontrè a tout panse negatif mwen yo.
Ou pa nan toupizi e pawòl ou se lajan sere.

Mwen konnen konyea lonbrit mwen pat antere nan move tè paske se ou ki mèt tout tè a. Tankou yon pye bwa bò dlo, rasinn mwen toujou pouse ak ou (Sòm 1:3; Ezayi 58:11). Ou se sous dlo ki pase swaf mwen e ou banm fòs lè’m panse tout sak nan mwen finn kaba (Jan 4:14).

Sim ta gen malè yon jou santi’m òfelen ou montre’m se je nan tèt ou (Ezayi 49:15).
Ou kajole’m, dòlote’m, sipote’m, pirifye’m, e gide’m.
Lanmou’w se pi gwo eritaj mwen.
Lanmou’w se fòs mwen.
Lanmou’w se idantite’m e ak ou bò kote’m pa gen anyen ki ka fè mwen ebranle.

Mwen fè lwanj ou e exalte non ou. Chak jenerasyon mèt ta vle ba ou non pa yo,
Lasians paka finn explike ou,
Ni mirak paka mete ou nan bwat. Ou vrèman extraodinè! Idantite’w ak lanmou ou pa janm chanje. Ou sèl se Bondye. Ou se Yahweh!

Ou fèm fè explwa mwen pat imajine,
E mwen sèten ou fèt kòmanse ak mwen.
Mèsi paske ou se ekla nan lajwa’m, Fòs nan feblès mwen,
Lajwa nan touman mwen yo, E lespwa nan fènwa.
Ou se plis ke sa e mo yo manke men mwen di ou Mèsi. Mèsi paske ou chwazi’m, renmen’w, e aprann mwen renmen ou, renmen tèt mwen ak pwochen mwen yo pi byen chak jou.

Avèk anpil lanmou ak yon chay gratitid, – Pitit ou a ki aksepte Erital Wayal li

Lapriyè: Senyè Gide’m

Prensip, , ,

 « Senyè, montre’m jan pou’ m swiv lòd ou yo, pou’m obeyi yo jouk sa kaba. Ban’m lespri pou’m ka obeyi lalwa ou, pou’m fè sa’l mande a ak tout kè mwen. Fè’m viv yon jan ki dakò ak kòmandman ou yo, paske se nan yo mwen jwenn tout plezi’ m. Fè’m pi anvi swiv prensip ou yo pase pou’m anvi gen lajan. Pa kite’ m kouri dèyè bagay ki pa vo anyen. Fè’m swiv chemen ou mete devan’ m lan. » Sòm 119 :33-37

Genyen bon direksyon enpòtan nan chak pa lavi. Tankou si ou ap itilize yon navigatè pou ale kay yon zanmi e ou mete yon adrès ki diferan de kote ou vle ale a, ou ap ka fè anpil tan nan wout men ou pap janm rive wè mounn sa. Menm jan tou, si ou manke tande vwa Bondye byen pou lavi, ou ka fè anpil aktivite ki ka menmen chagren ki pat nan plan li pou ou. Sitou pou ou ki ankre idantite’w nan Bondye, li necesè pou tande vwa li klè nan tout sikonstans pou ou ka pwogrese ak sajès, strateji, ak bon konprann nan tout sa ou ap fè.

Idantite’w nan Bondye se younn nan pi gwo richès ou genyen. Distraksyon lavi a goch adwat, ka twouble ou de tan an tan. Se sak fè de tan zan tan li necesè pou ou pran yon ti moman pou ou re-evalye relasyon ou ak Bondye, deccisyon ou yo, e mande li direksyon pou asire’w ke wout w’ap fè yo nan volonte’l pou ou.

Jodia kit ou santi ou wè klè tankou dlo kokoye san ma oswa ou ap viv nan dout, enkyetid, konfizyon, oswa dekourajman, pran yon ti tan pou medite sou Sòm 119:33-37 pou envite Bondye nan koze‘w paske se sèl li ki ka sèvi’w kamyonèt pou tout okasyon.

Ann Lapriyè

Papa mwen ki nan syèl la,

Mèsi pou lanmou ou ak prezans ou ki san limit. Mèsi pou pwoteksyon ak gras ou ki kouvri mwen ak chak grènn pitit ou yo chak jou.


Mèsi pou konpasyon ak devouman ou pou nou chak. Se yon lanmou mwen pa toujou konprann men ki bay lavi mwen yon lòt sans e ki ranpli mwen ak anpil esperans.

Mèsi pou pawòl ou yo nan Bib la ki pou sèvi’m kòm gid, pou Sentespri ou ki enspire sa pou’m priye ak ki direksyon pou’m pran lè’m bezwen yon papa ki pou proteje’m, yon zanmi ki pou kote’yon .

Nan bouyon lavi’m ou se sèl magi ki ba li pi bon gou.

Ou se tout sa mwen genyen e nan ou mwen pa janm manke anyen. Mwen vle viv plis selon volonte’w e fè tout sa ki bon devan zye’w ak lezòm pou glwa ou eklate tout kote’m pase.

Mwen pa vle viv selon emosyon mwen ni kontinye reaji chak lè sikonstans lavi ba mwen tap. Nenpòt kote mwen ye, mwen konnen ou se sponsò ki toujou ban mwen bourad. Gide mwen souple.

Pa kite’m fè desizyon ki pap fè ou plezi ni pou .avi fè’m vann eritaj mwen pou ti pen. Proteje kè’m e kenbe mwen nan pye’w. Tankou ti katkat ki poko ka mache byen paran yo toujou kenbe mwen yo pou fè wout la, mwen ofri men ak pye pam yo. Mennen’m kote ou vle.

Ou se yon Bondye ki jis e ki gen kè sansib. Nenpòt desizyon ou fè ak direksyon ou bay yo ap korèk. Tout sa ou di ak bouch ou men ou toujou akonpli li. Mwen konnen mwen ka konte sou ou je fèmen.

Se poutèt sa, mwen vle fixe je’m sou ou e mache nan chemen ou trase devan’m nan. Mwen vle reyisi jan ou menm ou te ekri nan destine’m.

Di mwen kisa ou vle’m fè nan sezon sa. Mwen disponib pou ou, Senyè. Fè’m genyen tout konba sou fòs fenwa ki vle fè gè sou lavi’m ak lantouraj mwen.

Ke chak grenn pitit, fanmi, zanmi, ak kolòn mwen yo jwenn yon nouvèl realizasyon de idantite yo nan ou kòm pitit ou e nouvo direksyon tout nèf de ou de sa yo dwe fè pou glwa ou nan sezon sa. Gide nou souple. Mwen konte sou ou. Nan non Jezi, Amen.

Bondye ap konbat pou ou

Idantite, Prensip lavi, , , , ,

” Kounyeya, mwen konnen Senyè a ap fè moun li chwazi a genyen batay la. Li rete nan syèl la, nan kay ki pou li a, li reponn li. Li fè’l genyen batay la avèk gwo pouvwa li. Gen moun ki mete konfyans yo nan machin pou fè lagè. Gen lòt moun, se nan chwal yo yo mete konfyans yo. Men nou menm, se nan pouvwa Senyè a, Bondye nou an, nou mete konfyans nou.” Sòm 20:6‭-‬7 HAT98

Nan lagè, kapitèn solda yo toujou gen yon plan pou yo ka genyen batay la sou lenmi an. Yo toujou gen yon plan atak, defans ak ofans paske yo konnen yon sèl strateji pap garanti yo viktwa. Konsa tou nan koze idantite’w, toujou gen yon gè se pa younn ou ka toujou wè men Bondye ap konbat pou ou (Efez 6:12-13). Kelkeswa kote’w ye, zye li toujou fixe sou ou paske li renmen’w san mezi (Efez 3:18).

Konba sa l’ap menmen pou ou a ka parèt sou anpil fòm ak sezon lavi. Pa egzamp, gen de lè nan lavi ou ka santi ou nan tèt mòn, kote tout sa ou dezire manifeste, ou santi koneksyon’w ak Bondye pi pre ke jamè. Se komsi lapriyè ou se ou sèlman yo t’ap tann ou ouvi bouch ou pou yo egzose. Se fèt nèt al kole. Nan tout ti moman damou’w ak Bondye, li revele’w pa Sentespri li anpil mistè kache e anpil fwa li avèti’w tou lè ou menm oswa yon lòt an danje li vle chanje rezilta yo pa lapriyè. Nan moman sa yo se flè sèlman ak lanmou k’ap simayen.

Gen de moman tou ou ka santi’w nan yon vale ki pafwa ka tèlman fon li menm difisil pou ou exprime kijan ou santi’w. Ou ka menm santi li tankou yon siklòn ki deside pote lavalas dlo yon sèl kou pou pote’w ale. Nouvèl agoch adwat e responsabilite lavi sanble pa konprann sak rele “yon ti poz komèsyal” la pandan emosyon ou yo sèlman vle fè skandal. Sa yo poko rive’w? Menm si yo poko rive’w, yo ka rive yon mounn ou konnen.

Tout experyans tèt mòn oswa vale lavi fè pati egzistans la. Yon bagay ki senten se chanjman. Chanjman fè pati lavi toulèjou. Ou paka nye li ni pèl paske chak jou ak sezon vini ak gou pa yo (Eklesias 3:1; Matye 6:34). Chanjman w’ap tann nan soti nan ou paske ou se chanjman men se Bondye sèl ki pote chanjman ki ka dire.

Anpil mounn ka kwè sou fos ponyèt yo pou soti nan tout sitiyasyon men ou men ou konnen sous ou e konba w’ap menmen an pa yon gè natirèl sèlman. Ou konnen kapitèn lame ki gen plis experyans ak strateji ke tout lot yo ap konbat pou ou. Letènèl ap konbat pou ou sa vle di li toujou ap pouse fòs tenèb pou li restore lajwa, sante mantal, fizik, esperityèl, sosyal, ak finansyè ou ak fanmi ou(Sòm 20:6-7).

Se pou ou toujou fè tout sa ou kapab pou ou mete ou an pozisyon pou recevwa benediksyon ak opòtinite li ofri ou yo pou grandi. Mèt syèl la ak tè a nan wou, rele sou men’w, byen abiye pa lafwa, e mete’w fre (Som 24:1;Galat 2:20). Mete sandal ou anba ke’w, sentiwon’w nan ren’w (kouraj ou), manto lajistis ou, ak kas sali ou nan tèt ou paske ou pa nan won (diferan sikonstans lavi) san baton (san defans).

Bondye gen kontwòl tout aspè nan lavi’w. Li gen plan atak, defans, ak ofans pou li ede ou reyisi. Atake enemi nanm ou ak dout ou yo nan lapriyè. Konfronte pè ou ak pawòl Bondye yo paske yo se defans ou. Sentespri ap ba ou plan ofans la moman pa moman. Konte sou li. Kenbe je’w sou Jezi. Li pap janm kite ou wont.

Ann Lapriyè

Senyè, mèsi paske ou pa janm kite mwen sèl. Ou se kapitèn lame pa excelans. Mèsi paske w’ap konbat pou mwen. Mwen remèt tout fado, jwa, rev, plan, entansyon mwen yo, fanmi’m, katye’m, vil kote’m rete, ak peyi ya nan men’w. Mwen konnen avèk ou mwen toujou pote viktwa. Mwen konte sou ou. Amen.

Kwayans ou se reyalite’w

Idantite, Prensip, Prensip lavi, , , , ,

Jezi antre andan yon kay, avèg yo antre dèyè’l. Jezi mande yo: “Èske nou kwè’m ka fè nou wè ankò?” Yo reponn li: “Wi, Senyè.” Jezi touche je yo, epi li di yo: “Tout bagay ap pase jan nou kwè’l la.” Mat 9:28‭-‬29 Vèsyon Kreyòl Fasil (VKF)

Kwayans ou se baz lafwa ak konsyans ou. Li manifeste nan panse, mo ou chwazi yo, ak aksyon ou yo tou. Gen yon slogan popilè ki di, “jan ou wè’l la se konsa li ye”. Konsèp sa soti nan yon kwayans ke mònn fizik la se sèl reyalite ki egziste e se sikontans ki ap gouvemen paske “jan bagay yo ye se konsa y’ap ye”. Mantalite sa lakòz anpil mounn pa wè tèt yo kòm yo patisipan aktif ki pou pote chanjman nan divès aspè nan lavi ak enviwonman yo. Tout responsibilite vinn tonbe sou yon lòt antite tankou yon òganizasyon èd lokal oswa entènasyonal , lòt mounn yo konnen tankou fanmi ak zanmi ke yo kwè ki nan pi bon sitiyasyon pase yo, ofisye gouvènman peyi kote yo ye, elatriye.

Ou menm ki ankre idantite ou nan Jezi-Kris, reyalite pa ou a diferan e li plis ke sa je natirèl ou yo ka wè (Efèz 6: 12). Pa pouvwa Sentespri ki nan ou, viktwa ou asire depi ou envite’l nan koze a, e fixe je’w sou ou li.

Mo ou chwazi itilize ak desizyon ou pran nan chak sitiyasyon temwanye de kalite konfyans ou genyen nan Bondye ak nan tèt ou (potansyèl li ba ou yo) vre.

Ou se sèl ak limyè. Siksè ak reyisit ou (jan bib la ak ou menm defini li) depann de ou men yo depann de sikonstans ou yo menm lè pafwa yo ka maske kò tankou gwo zotobre pou fè ou pè. Lè w’ap travèse moman sa yo pa dekouraje. Pèsevere ak pasyans ak detèminasyon pito. Mande Bondye pou louvri je’w e ba ou bon konprann pou ou ka wè byen e jere sitiyasyon sa yo nan yon manyè ki reflekte kiyès ou ye.

Ou gen otorite sou tè sila a e ou se yon ajan chanjman (Lik 10:19-21; 2 Tim 1:7). Sa vle di rezilta nan lavi ou ak enviwònman ou yo depann de jan ou egzèse lafwa ou nan chak sikonstans. Lafwa ou se defans ou ki fè kwayans ou se reyalite’w (Matye 9:29; 17:20; 21:21; Ebre 11:6; 1 Korent 2:5).

Ou se youn mounn chwazi pou egzèse otorite Bondye ba ou nan yon viktwa ke li gentan genyen deja depi rezireksyon li sou bwa kalvè. Deklare ak lafwa ke jodia sa se jou delivrans ou e tan gouvènay Bondye nan travè lavi ou ap pwogrese an gran jan. Kwè! Wi, fòk ou kwè paske lavi anpil mounn ak lòt kreati depann de ou e y’ap tann ou(Women 8:19). LEVE. Se pou ou domine sou tout sityasyon pou glwa Bondye.

Fèmen je’w e louvri kè ou. Tande vwa Jezi-Kri ki ap di ou menm jan li te di avèg la: “Tout bagay ap pase jan [ou]* kwè’l la.” Matye 9:29.

Refleksyon:

  1. Jezi di tout bagay ap pase jan ou kwè li a. Kijan ou “kwè’l”?
  2. Kijan ou kwè fiti ou pral ye? Ki kalite objektif ou genyen pou lavi ou, peyi ou ak wayòm Bondye? Ki plan ou genyen an plas pou realize yo?
  3. Eske ou kwè vre ou gen kapasite ak otorite pou chanje tèt ou, kay ou, katye, ak peyi ou? Si wi poukisa? Si non poukisa?

Ann Lapriyè:

Bondye mèsi pou lanmou enfini ou genyen pou mwen ak chak grenn pitit ou yo. Banm sajès ak bon konprann ou pou mwen avanse wayom ou a pati de lavi mwen. Fè mwen wè reyalite mwen yo a travè de ou e non pa de konesans mwen ki limite. Ou se yon Bondye san limit e ou omnisyan. Mèsi pou prezans ak konpasyon ou.

Reyalite’m chanje depi lè mwen te fè desizyon pou’m aksepte apèl ou e idantite’m kòm pitit ou. Mèsi paske ou chwazi’m, konnen’m, renmen’m, dòlote’m, e toujou avè’m depi avan mwen respire sou tè sa e ou pa janm lage’m yon jou.

Jodia mwen pran responsabilite mwen sou tè sila pou mwen domine sou tout domènn ou ban mwen. Mwen renonse ak tout dout ak kwayans ki pa soti nan ou ak enspirasyon ou nan Bib la. Kote lafwa mwen fèb, tanpri fòtifye’m pou mwen pote fwi paske tout dezi kè’m se pou glwa ou eklate sou tout fas tè a e nan lavi chak grenn pitit ou. Ban mwen fòs pou mwen domine chak sezon. Chak sezon se pa’m paske ou toujou avèk mwen. Ke volonte ou akonpli nan lavi mwen menm jan li fèt nan syèl la. Amen.

Bondye renmen ou

Prensip, Prensip lavi, ,

“Men, Bondye sitèlman gen kè sansib, li sitèlman renmen [ou], Li ban [ou] lavi nan Kris la, [ou]* menm ki t’ap viv nan lanmò akoz peche [ou]. Se yon favè Bondye fè [ou]* lè li delivre [ou]. […] Li fè tou sa pou moutre pou tout tan ki gen pou vini yo jan li renmen [ou]* anpil anpil, jan li aji byen avèk [ou]* nan Jezikri. Se paske li renmen [ou]* kifè li delivre [ou]*, [ou] menm ki mete konfyans [ou] nan li. Sa pa sòti nan nou menm menm, se yon kado Bondye ban [ou]. Non, [ou] pa fè anyen pou sa. Konsa, pèsonn pa ka vante tèt yo.”
Efezyen 2:4‭-‬9

Jodia kit ou retrouve’w nan mònn oswa vale nan etap lavi ou, sonje ke Bondye renmen’w ak yon lanmou san mezi ki pa gen kondisyon ni egcepsyon. Lèt lanmou li pou ou toujou o prezan, dirèk, ak yon garanti pou lavi. Ou se ti chouchou wa inivè a. Eske ou kwè sa?

Anpil fwa gen sikonstans ak teoloji ki ta ka vle fè ou kwè fòk ou ta toujou ap fè yon bagay oswa pote yon chay Bondye pat ba ou pou ou ka demontre ou se disip Jezi Kris. Fòk lavi ou ta tèl jan oswa pou ou ta pale yon lòt lang, rete yon lòt katye oswa peyi, abiye yon lòt mòd elatriye pou ou ka jwenn favè ak lanmou Bondye men realite a pi senp. Bondye renmen ou jan ou ye a. Lavi ou nan pla men li e li vle grandi zanmitay li ak ou. Ah wi, li damou’w e pa gen anyen ki ka anpeche li kontinye renmen ou (1 Jan 4:15-18; Eza 43:3-4; Efez 2:4-9).

Lè ou santi w’ap bite e lanmou sa ta sanble lwen, se pa emosyon li yo ki chanje pou ou. Dòz lanmou li pou ou soti nan yon sous infini e li ouvri kè li ba ou san resèv ni repwòch. Sèlman pran yon ti tan pou sonje kiyès ou ye. Si w’ap plenyen, ranplase yo pa lapriyè. Abiye’w pa lafwa e mande Bondye pou louvri je ak kè ou pou ou resevwa lanmou gratis ti cheri sa ak de pla men ou.

Kounyea menm, pran yon ti moman pou fèmen je si ou kapab epi mete men sou kè’ w. Repete ak yon sèl kè: ” Bondye renmen’m ak yon lanmou san repwòch. Li aksepte mwen san kondisyon e li damou mwen nan mezi. Wi, mwen se ti chouchou Wa syèl ak tè a e li vle kiltive yon relasyon entim e sensè ak mwen chak moman. Mwen gen anpil valè. Ak lanmou sa Bondye kouvri’m nan, mwen menm tou mwen se lanmou”.

Apre pran yon ti poz pou reflechi ak deklarasyon veridik sa ou sòt fè a. Eske ou kwè? Si ou jwenn dout nan kè’w pa enkyete’w. Se yon bon moman pou ou mande Sentespri pou revele’w rezon yo pou ou ka afemi lafwa e benyen nan lanmou sa nèt alkole. Nenpòt kote ou ye Bondye renmen’w e ou se lanmou.

Benediksyon:

” M’ap mande Bondye pou li ban [ou]*, dapre richès pouvwa li a, fòs ak kouray nan kè [ou], pa mwayen pouvwa Sentespri a, pou [ou] ka grandi nan karaktè [ou],

pou Kris la rete nan kè nou ak konfyans nou gen nan li a. M’ap mande Bondye pou [ou] pouse rasin, pou [ou] chita byen fèm nan renmen,

pou [ou] ka konprann, ansanm ak tout pèp Bondye a, jan renmen Kris la laj, jan li long, jan li fon, jan li wo.

Wi, mwen mande pou [ou] rive konnen kalite renmen Kris la gen pou [ou], atout pèsonn p’ap janm ka rive konnen l nèt. Konsa, n’a vin plen nèt ak tou sa ki nan Bondye.” Amen. Efezyen 3:16-19 vèsyon HAT98 * adapte pou devosyon an