Tous les articles par EritajWayal

Ou aksepte

Idantite, , , , , , , , ,


« Tout moun Papa a ban mwen, gen pou vin jwenn mwen. Mwen p’ap janm mete moun ki vin jwenn mwen yo deyò.« Jan 6:37 HAT98

Eske sa poko rive’w pou ou gen yon mounn de konfyans ki ba ou yon akolad ki fè’w santi’w nan po’w? Tankou nan moman an, tout dout, tout tristès ak angwas disparèt. Mounn sa wè’w ak tout defò ak kalite ou yo e li chwazi renmen ou e ba ou sipò ak afeksyon li tout li kapab. Lè ou fè yon bagay ki pa fè li plezi, si li gen pou li tire zòrèy ou li fè’l men li aksepte’w jan ou ye a ki fè prezans li sèlman mete chalè nan kè’w menm lè mo pa pataje. Ou sonje expresyon lanmou sa? Li te trankilize kè’w pa vre? Eh bien se bòn nouvèl pou ou jodia se Bondye vle mounn sa pou ou paske li damou’w plis ke tout mounn sou latè e vle ou ankre nan fasèt idantite sa nan li ki se yon mounn ki aksepte.

« Aksepte » se yon mo ki ki itilize souvan men anpil mounn pa konprann li. Tankou magi li nan tout sòs men li pa gen pwodwi chimik. Se sèl bon gou li bay lè li soti nan yon kè ak kontèks ki nèt.

Diksyonè yo defini mo aksepte a nan divès manyè. Cambridge defini akseptans kòm “yon akò jeneral ke yon bagay satisfezan oswa bon, oubyen ke yon moun ta dwe enkli nan yon gwoup”. Selon Merriam Webster, akseptans se kòm “1. lalwa: yon akò swa ekspresman oswa pa konduit sou aksyon oswa òf yon lòt moun pou konkli yon kontra epi pati yo vin legalman angaje. 2. yon rakèy oswa yon apwobasyon favorab. 3. Pou mo: yon siyifikasyon jeneralman aksepte nan yon mo oswa yon konpreyansyon sou yon konsèp »(Merriam Webster). An rezime, akspetans se yon akò oswa yon apwobasyon favorab ki fòmèl (tankou yon kontra) oswa enfòmèl (san obligasyon legal).

Idantite’w nan Kris, se yon mounn ki « aksepte » dapre sa ki ekri nan Jan 6:37. Nan yon mònd ki pran plezi nan bay plis valè a sa yon moun posede, jan li vann tèt li sou rezo socio, nan fè wè, chofe ak mete dife nan konpetitisyon ak konparezon, kisa idantite sa kòm yon moun ki aksepte vle di pou ou jounen jodia? Kijan sa reflekte nan sikonstans ou ap travèse yo ak jan ou wè tèt ou? Tankou si tout tit ou ta posede ta ale, rezo socio ak travay disparèt, sipò ou konte sou yo paka ede’w, maladi ta anvayi’w, kijan wap wè tèt ou? Abandone, rejete, oswa aksepte nan Kris?

Lè yon mounn oswa yon bagay oswa sitiyasyon aksepte, akseptans sa gen plizyè fasèt e genyen anpil enpòytans pou kwasans fizik, emosyonèl, sosyal, ak espirityèl pou mounn sa. Konsa tou, akseptans ou nan Bondye kouvri tout aspè nan lavi ou e li se yon akseptans ki fòmèl. Men kèk prèv pou sa.

  1. Depi avan ou te vini sou tè sila, Bondye te gentan konnen’w e chwazi ou pou pitit li paske sa fè li plezi (Efezyen 1:5).
  2. Bondye non sèlman konnen ou, li fè ou pwomès pou toujou la pou ou e pou li pa janm repouse ou. Nan Jan 6:37, Jezi di « tout moun Papa a ban [li]*, gen pou vin jwenn mwen. [Li]* p’ap janm mete moun ki vin jwenn mwen yo deyò. » Sa vle di, nan tout sikontans Bondye toujou la kòm yon bon zanmi, yon frè nan tout advèsitw (Pwovèb 17:17).
  3. Bondye deklare piblikman alyans li ak ou ki se e yon kontra fòmèl. Jeremi 31: 31-34 ekri,  » Seyè a di ankò: Lè a pral rive, mwen pral pase yon lòt kontra avèk moun peyi Izrayèl yo ansanm ak moun peyi Jida yo. Se p’ap tankou kontra mwen te pase avèk zansèt yo a lè’m te pran men yo pou’m te fè yo soti kite peyi Lejip. Atout se mwen ki te mèt yo, yo pa’ t kenbe kontra mwen an. Se mwen menm Seyè a ki di sa! Men kontra mwen pral pase ak pèp Izrayèl la. Se Seyè a menm ki di sa. Lè sa a, m’ap mete prensip mwen yo anndan kè yo, m’ap make lòd mwen yo nan lespri yo. M’a tounen Bondye pou yo, y’a tounen yon pèp pou mwen. Pesonn p’ap bezwen moutre lòt moun nan peyi a kouman pou yo chache konnen Seyè a, paske yo tout ap konnen m’, depi sa ki pi piti a jouk sa ki pi gran an. Se mwen menm Seyè a ki di sa. M’a padonnen sa yo fè ki mal, mwen p’ap chonje peche yo ankò. Se mwen menm Seyè a ki di sa ». Tcheke tou Matye 26:28 ak Ebre 8:10.
  4. Paske se yon akseptans fòmèl, gen anpil benediksyon ak konsekans lèsi zanmitay sa pa respekte ( Jozue 1:8, Levitik 20-26). Li pap repwoche’w, fèmen pòt sou ou, ni voye ou jete paske ou enpòtan pou li.

Si yon jou, ou ta santi Bondye lwen’w oswa ou pa ase, sonje ke akseptans Bondye pou ou gratis. Efezyen 2:8-10 explike: « [8] Se paske li renmen [ou]* kifè li delivre [ou]*, [ou]* menm ki mete konfyans [ou]* nan li. Sa pa sòti nan [ou]* menm menm, se yon kado Bondye ban [ou]*. [9] Non, [ou]* pa fè anyen pou sa. Konsa, pèsonn pa ka vante tèt yo. [10] Se Bondye ki fè [ou]*. Li kreye [ou]* nan Jezikri pou [ou]* pratike sa ki byen, bon zèv li te pare davans pou [ou]* fè yo. »

Idantite’w nan Jezi Kris, ou se mounn ki aksepete non pa zèv ou fè men pa relasyon ou ak li ak lanmou li genyen pou oj. Menm lè pafwa li difisil pou ou santi prezans Bondye si lespri ou brouye oswa sikontans lavi ta fè’w doute, Bondye li menm klè nan relasyon li ak ou. Li rete fidèl e sensè ak pwomès li yo sou lavi ou.

Ou se yon mounn aksepte ki vle di ou gen responsabilite pou grandi, aprann konnen Bondye ak tèt ou plis, e aksepte sila yo ki kote’w. Ou pa bezwen kraze tèt ou pou fe moun wè valè’w ni pèfòme pou Bondye « wè’w » paske li avè’w e wè ou chak moman. Li renmen’w jan ou ye a e vle ou pataje akseptans sa nan lantouraj ou. Women 15:7 di ,  » se pou yonn asepte lòt jan’l ye a, menm jan Kris la te asepte nou an pou sa te tounen yon lwanj pou Bondye. » Se sak fè li bon pou ou kontinye develope tèt ou pou reflekte karaktè Kris la nan tout fasèt nan lavi ou (Jan 13:34-35; 15:14; Matye 16:24).

Li renmen’w jan ou ye tankou plim je nan tèt li e lanmou li pou ou san kondisyon. Ou pa bezwen ale lwen ni pase nan kat chemen pou ou pale ak li. Li gentan aksepte’w kòm pitit li sa vle di li dispoze pou resevwa ou jan ou reprezante’w nan chak moman, damou’w jan ou ye a e pa gen anyen ou ka fè ki ka fòse’l vire do ba ou.

Ann reflechi:

  1.  » Kijan idantite sa ou gen nan Bondye kòm mounn ki aksepte afekte jan ou wè tèt ou ak sikonstans ou yo jodia?
  2. Eske ou santi lanmou li ak akseptans li pou ou oswa distans ak rejet? Pouki?
  3. Ki kat aksyon ou ka poze jodia pou demontre akseptans ak de mounn nan lantouraj ou pou fè yo santi akseptans sa tou? (Men yon ti poul pou 1er aksyon an-> pataje devosyon sa ak li pou envite’l medite sou idantite’l kòm yon mounn ki aksepte nan Kris tou!) »

Ann Lapriyè:

Senye mèsi pou gras ou ak kompasyon ou ki pa janm fini pou mwen. Mèsi pou pwomès nan Jan 6:37 pou ou toujou aksepte’m paske mwen mete konfyans mwen nan ou. Ou pap janm voye’m jete. Menm lè gen moman mwen ta santi’m rejete pa lavi, dekourajman ak lòt sikntans ta vle fè’m doute de tèt mwen, lanmou ou gen pou mwen, ak toujou gen yon refij nan ou. Lè ou wè’m ak pèfòme olye ke’m repoze nan ou, tanpri tire zorèy mwen e kenbe kè’m nèt pou’m ka renmen e aksepte tèt mwen ak sila yo ou mete sou wout mwen pou glwa ou paske ou se Bondye. Mwen adore, exalte, e glorifye non ou. Amen.

Weepaa!! Yon ti rapel sou idantite’w nan Bondye jodia!

Idantite, , , ,

Matye 6:21,“ […]kote richès ou ye, se la kè ou ye tou »

Onè, onè, onè! Kote richès ou ye mounn pa’n?? Ou reponn nan idantite ak otorite’w nan Bondye pa vre? Bingo, egzelan repons (nou konnen’w sou men’w, tokay 😄).

Idantite’w nan Jezikri se yon eritaj espirityèl presye ke ou genyen e pi gwo trezò ou nan pakou pou ou reklame e viv Eritaj Wayal ou sou tè sa. Wi, nou la pou ede’w e grandi ansanm e kòm chak grenn nan nou , ou dwe toujou kenbe yo fèm nan memwa ak konpòtman ou pou ou ka toujou byen abiye.

Lavi ap toujou gen chanjman men depi’w sonje kiyès ou ye, reyisit ap toujou pou ou.

Idantite prensipal pou ou toujou kenbe djanm nan ou tout kote ou pase:

  1. Bondye renmen’w san mezi e ou se lanmou.
  2. Ou fèt nan imaj Bondye se sa ki fè ou se yon èt mèveye.
  3. Ou se eritye e pitit Bondye se sak fè ou pa manke anyen jan Sòm 23 ak 34 la raple. Bondye responsab ou. Se Senyè a se gadò ak pwoteksyon ou, ou pa manke anyen.
  4. Ou se yon mounn nouvo! Peche ou yo padone e ou gen yon fiti asire nan Kris la.
  5. Ou se yon mounn chwazi.
  6. Ou se chanjman. Lavi’w konte anpil se sak fè ou paka bay laperèz legen.
  7. Ou fè pati yon fanmi. Ou pa janm pou kont ou.

Sèlman, pa kite anyen gonfle kè’w, ranplase plenn ou pa lapriyè, e kite’w je’w fixe sou Jezi. Lè’w fè sa, li pwomèt pou li menmen’w pi lwen ke ou ka imajine (Jeremi 29:8-13).

Pran otorite’w, deklare vitkwa ou sou tout reflexion ak sikonstans ki vle domine’w. Bay Bondye glwa paske nan li ou se chanjman e avni mounn depann de obeyisans ou plis ke ou imajine. Mete Sajès ak bon konprann kom eritaj ou pou’w viv ak kè poze e pwospere nan tout sa w’ap fè (Ezayi 32:18-20).

Sonje kiyès ou, grandi e pwoteje richès esperityèl ou ki soti nan idantite’w nan Bondye pou ou kontinye prospere ak briye. Non li ak karaktè li pap janm chanje. Konte sou li!

Benediksyon: Ke Bondye lavi a kenbe kè’w nan prezans li nèt al kole pou ou toujou gen yon trezò etènèl ki manifeste nan tout glwa li nan lavi sou pandan pasaj ou tè sila. Ke Bondye kontinye kouvri’w ak gras li e devwale’w plis toujou de idantite ou nan li pandan favè li ap miltipliye plis pou ou tout kote ou pase. Amen.

Ou se pitit Bondye

Idantite, , ,


« Bondye te deside depi davans pou li adopte nou pou pitit li nan Jezikri, paske sa fè li plezi. » Efezyen 1: 5 HAT98

Nan listwa lemònd, pitit se gwo koze paske yo reprezante nouvèl , mès, kilti, ak avni yon fanmi ak peyi. Paran oswa responsab pitit souvan trete yo tankou de je nan tèt yo e fè jefò pou ba yo tout sa yo bezwen (e anpil fwa plis toujou).

Pitit yon mounn reprezante imaj li e se eritye prinsipal mounn sa genyen. Eritaj sa gen anpil fasèt. Li ka parèt nan fòm kò li, estyl li abiye ak sistem lasante li genyen; byen materyèl ke paran oswa lot zanzèt te travay fè; pwofesyonèl (anpil fanmi gen talan ak pwofesyon yo pataje de jenerasyon an jenerasyon); kiltirèl (egzanp, yon resèt manje oswa tradisyon yo obzève); esperityèl (nan lafwa yo pataje ak jan yo kiltive li); manyè mounn sa reflechi ak predisposizosyon emotyonèl li, elatriye.

Nan menm kontèks sa, ou se pitit Bondye.

Bondye se mèt tout syèl, tè, ak lanmè yo e li ba out tou kalite favè, konesans ak bon konprann (Ps 24:1; Efèz 1:4-8). Li kreye fi ak gason (Jenèz 1:27) nan imaj li e dapre sa ki ekri nan liv Efezyen depi  » byen lontan anvan Bondye kreye lemonn, li chwazi [ou] nan Kris pou [ou] kapab viv apa pou li, pou [ou]* san repwòch devan li. Nan renmen li renmen [ou] an, Bondye te deside depi davans pou li adopte [ou] pou pitit li nan Jezikri, paske sa fè li plezi » (Efezyen 1: 4-5).

Sa vle li kit ou oswa gason, kit ou ofelen sou tè oswa mounn ki jwe wòl paran nan lavi’w egzite, Bondye reklame’w avan menm ou te vinn sou tè sila (Jeremi 1:5; Sòm 139). Ou pa e ou pap janm poukò’w (Ezayi 41:10; Deut 31: 8; Matye 28:20).

Menm jan pitit reprezante nouvèl jenerasyon mès, kilti, ak avni yon fanmi ak peyi, idantite sa ou genyen kòm pitit Bondye ba ou anpil privilèj ak responsabilite. Ou reprezante wayòm, imaj, ak grandè Bondye chak jou ou egziste e ou se eritye tout sa li posede. Nan chak sityasyon ou trouve’w, toujou sonje kiyès ou ye.

Ou gen pouvwa e devwa pou ou pwogrese wayòm li, viv nan lanmou ak viktwa li ba ou, e konbat ak lafwa pou glorifye non li. Bondye renmen’w tankou de je nan tèt li se sa ki fè depi ou kite je’w fixe sou li ou ap fasil wè ke ou pa manke anyen (PS 23:1; Ps 34). Menm chak grenn cheve nan tèt ou kote ( Lik 12:7; Matye 10:30).

Kounyea pran yon ti tan pou ou reflechi e medite sou enpòtans idantite’w kòm pitit Bondye genyen nan lavi ou jodia.

Nan sikonstans w’ap fè fas ak yo, kisa sa vle di pou ou? Kijan ou ka kote idantite sa ede’w grandi nan relasyon ou ak Bondye rantre nan lòt dimansyon?

Ou pa nenpòt ti chèlbè non. Wa tout linivè chwazi’w e li renmen’w ki donk ou se yon prens/prensès pa tankou kont de fe paske ou fè pati yon wayòm ki inebranlab de jenerasyon an jenerasyon. Kwè e aji lafwa ou. Papa’w la pou ou ak bra li louvri!

Ann Lapriyè

Bondye, mèsi pou pawòl ou ki toujou la pou gide’m e montre’m kiyès mwen ye. Liv Efezyen 1 fèm konnen ke « Byen lontan anvan [ou]*kreye lemonn, [ou]* chwazi [mwen]*nan Kris pou [mwen]* kapab viv apa pou [ou]*, pou [mwen]* san repwòch devan [ou]*. Nan renmen [ou]*renmen [mwen]* an, [5] [ou]* te deside depi davans pou [ou]* adopte [mwen]*pou pitit [ou]* nan Jezikri, paske sa fè [ou]* plezi. » (Vèsè 4-5). Mwen souri e fremi lè w’ap panse ak lanmou ak onè sa ke sa fè ou plezi pou ou pran mwen kòm pitit ou, zèv zantray ou, ak lajwa nan kè’w menm lè mwen pa toujou fè sa ki bon pa aksyon o pa omisyon. Ou san parèy! « [6] Se poutèt sa, [m’ap]*toujou fè lwanj Bondye pou bèl favè sa a [ou]* fè [mwen]* kado, gremesi Pitit li renmen anpil la! [7] Gremesi Kris ki mouri pou [mwen]* an, [mwen]* delivre, [mwen]* resevwa padon pou peche [mwen]* yo. Bondye fè [mwen]* wè jan [ou]* renmen [mwen]* anpil. [8] [Ou]* ban [mwen]* favè [ou]* an kantite, [ou]* ban [mwen]* tout kalite konprann ak konesans »Efezyen 1:6-8 HAT98 e nanm mwen exalte ou!

*modifye pou devosyon an

Fè lwanj Bondye e exalte non li

Prensip

« M’a fè lwanj ou ak tout kè’ m, Seyè. M’a rakonte tout bèl mèvèy ou yo. Se ou menm k’ap fè’m chante, se ou menm k’ap fè kè’m kontan. Bondye ki anwo nan syèl la, m’a chante lwanj ou. » Sòm 9: 2-3

Ou pa konn tande mounn ap di »Karaktè Bondye pa janm chanje se sak fè ou ka gen konfyans ke menm mounn li te ye yè a se li li ye jodia. » Pawòl li yo di menm bagay la. Lè sa difisil pou ou eske ou kwè sa?

Ak tout nouvèl k’ap pase yo, li necesè pou kouvri kè’w, nanm ou ak tout lantouraj ou ak pawòl Bondye e lafwa. Ou pap janm ka konprann poukisa chak bagay rive ou nan lavi men sonje gen yon Bondye ki fèb pou ou e menm lan li te delivre tout mounn yo t’ap pese yo nan tan David jan ou pral wè nan Sòm 9 la, konsa tou l’ap konbat pou ou.

Lè’w santi ou pa ka priye, kite Sentespri li ak pawòl li yo entèsede pou ou paske li pwomèt tout mounn ki ap chache li yo ak jwenn li e li pap janm kite ou sèl. Paske ou se imaj li, ou toujou gen viktwa e lavi’w paka pase mal.

Pou kote Bondye pase ak nou, an nou fè aksyon de gras pou li!

Ann medite ansanm sou Sòm 9

« (9:1) Pou chèf sanba yo. Sou menm lè ak chante ki di: Lanmò pitit gason an. Se yon sòm David.

(9:2) M’a fè lwanj ou ak tout kè’ m, Seyè. M’a rakonte tout bèl mèvèy ou yo. (9:3) Se ou menm k’ap fè’m chante, se ou menm k’ap fè kè’m kontan. Bondye ki anwo nan syèl la, m’a chante lwanj ou.

(9:4) Parèt ou parèt, lènmi’m yo fè bak. Yo pran tranble, yo tonbe, yo mouri. (9:5) Tankou yon jij ki san patipri, ou chita sou fotèy ou. ou fè’ m jistis, ou defann kòz mwen. (9:6) Ou regle moun lòt nasyon yo, ou detwi mechan yo. Ou efase non yo nèt pou tout tan.

(9:7) Pa gen lènmi ankò, yo fini nèt. Ata lavil yo ou vide atè. Pa gen anyen pou fè moun chonje yo ankò. (9:8) Men Seyè a, se wa li ye pou tout tan. Li mete fotèy li la pou’l fè jistis. (9:9) Li gouvènen tout bagay avèk jistis. Li jije tout moun san patipri.

(9:10) Moun y’ap peze yo, se bò kote Seyè a yo jwenn pwoteksyon. Se la yo jwenn yon kote pou yo kache, lè yo nan tray. (9:11) Moun ki konnen ou, Seyè, y’ap mete konfyans yo nan ou. Paske, ou pa lage moun k’ap chache ou. (9:12) Ann fè lwanj Seyè a k’ap gouvènen sou mòn Siyon [ mete peyi,zòn, ak katye paw]* an. Ann fè tout nasyon yo konnen sa li te fè.

(9:13) Bondye chonje moun k’ap soufri yo, li pa bliye rèl malere yo, li pini moun ki fè yo mal. (9:14) Gen pitye pou mwen, Seyè! Gade nan ki mizè moun ki rayi’ m yo mete’ m. vin sove’ m! Pa kite’m mouri, Seyè, (9:15) pou’m ka kanpe devan moun lavil Jerizalèm yo, pou’m di yo poukisa m’ap fè lwanj ou. M’ap kontan nèt, paske ou te delivre’m.

(9:16) Moun lòt nasyon yo fouye yon gwo twou: se yo menm ki tonbe ladan li. Yo tann yon pèlen: se pye yo ki pran ladan li. (9:17) Seyè a fè yo konnen ki moun li ye, li jije yo san patipri. Sa mechan yo fè a tounen kont yo.

(9:18) Tout mechan yo gen pou mouri. Tout moun ki bliye gen Bondye gen pou mouri tou. (9:19) Se pa tout tan yo ka bliye moun ki nan mizè. Se pa tout tan yo ka wete espwa moun ki nan lafliksyon.

(9:20) Leve non, Seyè! Pa kite lèzòm genyen batay la! Mennen moun lòt nasyon yo vin jije devan ou. (9:21) Fè kè yo kase, Seyè! Fè yo konnen se moun ase yo ye. » Amen

Reflexyon

Ki vèsè ki te plis touche kè’w oswa kapte atansyon’w pandan ou t’ap li Sòm lan?

Kijan rapèl nan Sòm 9 la ke Bondye ap konbat pou ou e li pa janm pèdi batay afekte jan ou wè lavi ou ak sikonstans mònn nan jodia?

Bondye se yon jij san patipri. Kijan ou ka priye pou peyi’w ak fanmi’w diferan ak rapèl sa?

Pa bliye pataje repons ou yo nan komantè a e pataje ak yon lòt mounn. Pawòl Bondye se pi gwo defans ou. Pa kite yo dèyè!

Ann Lapriyè.

Senye, bouch mwen ak nanm mwen pa ase poum fe lwanj ak konpliman pou ou. Mesi!!!

Be Bondye ki bay kè kontan ak kè poze a beni’w an abondans tout kote ou pase ba ou lajwa ak ke poze. Nan non Jezi. Amen.

6èm Semèn: Senyè a se kay pou kò ak nanm ou

6 Semèn Konsekrasyon-Sòm 23, , , , ,

« Wi, mwen konnen w’ap toujou renmen’m, w’ap toujou bon pou mwen pandan tout lavi’m. Se lakay ou m’ap rete tout tan tout tan. » Sòm 23:6

Gad kijan tan an pase vit! Nou pati pou 6èm ak denyè semèn nou sou tèm Som 23. Mèsi paske ou te reponn ak envitasyon lanmou pou experyanse Bondye nan yon lòt dimansyon. Mèsi anpil pou prezans ou ak devozyon pou wayòm Bondye ak devouman ou pou grandi nan lafwa.

Kounyea menm lè tout mounn ta vle recite Sòm sa pa abitid, ou menm ou byen ame pou itilize li kòm epe pou koupe tèt lenmi ou yo e pwospere. Ann vanse!

Kontèks: Nan 6èm vèsè Sòm nan, David raple nanm li jan Bondye toujou renmen li ak yon lanmou etènèl. Se poutèt sa li deside rete nan « kay » Senyè a pou tout tan li gen soup. Non selman lanmou Bondye jan nou te wel la pote pwovizyon pou ou a, li la pou pwoteje ak gide ou, li se fòs ou, e li se repo ak lapè ou. Paske li se yon bon gadò, li ofri tèt li tou kòm « kay » kote ou ka chwazi rete.

« Kay » sa kote Bondye rete a se yon espas espesyal nan fon kè ou ki gen prèv tangible de relasyon ou avek li. Pa egzanp, le ou pase anpil tan nan espas sa ou vinn gen plis kapasite pou renmen lòt mounn paske ou konnen jan Bondye damou ou san patipri e viv nan respè ak kè poze malgre tout difikilte paske Bondye genyen batay la deja sou tout fòs fenmwa. »Kay » sa reprezante prezans Bondye an dedan ou pa pouvwa Sentespri li ki pote bon kichòy tankou pwoteksyon, sekirite, repo, ak rekonfò pou ou tout kote ou ye.

Menm jan ak David ou ka chwazi demere anba pwoteksyon ak direksyon pou jwi lavi li mete apa pou ou a. Ou ka deside ankre idantite’w plis e grandi nan entemite avèk li pou dekouvri plan ak dezi li yo pou lavi ou. Oswa tou ou ka deside chwazi viv selon emosyon ou yo ak sikonstans kote w’ap viv la.

Jodia, ki chwa ou vle fè? Pa kite vwa kondanasyon ni pressyon fòse’w chwazi men bay Sentespri plas pou gide’w. Fè nou konnen tou nan komantè yo. Nou la pou ou!

Ann Lapriyè:

Senyè, mèsi pou lanmou ou ki san mezi e prezans ou ki abite nan mwen. Gras ou ap swiv mwen tout tan m’ap viv paske mwen dispoze pou sèvi ak kolabore avè’w nan tout sa m’ap fè. Mèsi paske ou se fòs nan feblès mwen e ou pa janm lage’m ou. Ke prezans ou kontinye anviyi tout kwen kè’m, ilimine nanm mwen, e avili tout move lide ak pèsepksyon nan mwen kontrè ak pawòl ou yo ak destine ou sou lavi mwen. Mwen few konfyans e remesye’w. Nan non Jezi, Amen.

5èm Semenn: Senyè a se pwovizyon ou

6 Semèn Konsekrasyon-Sòm 23, , ,

« Ou pare yon tab pou mwen devan je tout lènmi’m yo. Ou resevwa’m, ou fè kè’m kontan e ou ban’m tou sa’m bezwen. » Sòm 23:5

Mèsi pou prezans ou ak nou nan 5èm semen konsekrasyon and meditasyon nou sou Sòm 23. Yon sòm ki popilè ke anpil mounn ka recite pa kè men anpil pa konprann kalite trezò ke Bondye sere nan chak vèsè pou chak grenn pitit li pou yo briye tout kote yo ye. Tout liv nan Bib la gen pouvwa sa men jodia n’ap pwogrese e medite 5èm vèsè nan Sòm 23. Ann vanse!

Kontèks: Yon tab nan mònn fizik lan se kote mounn chita swa pou manje, diskite yon sijè/fè reinyon , kolabore, pataje, elatriye. Se sa ki fè tab reprezante divès bagay tankou kominyon, tèt ansanm, rekonfò, pataj, asirans, disiplin, jijman, ak pwovizyon.

Som 23:5 ka separe nan 4 pati: (1) Bondye toujou gen pwovizyon pou ou. Som 23:5 « Ou pare yon tab pou mwen devan je tout lènmi’m yo... »Salmist la ap dekri pwovizyon Bondye pou li nan fas difikilte ak pèsekisyon li t’ap travèse. Note byen li di « ou » pou refere’l ak Senyè a paske se nan li tout richès ak kè poze soti. « Lènmi » yon mounn pa toujou yon lot ki la nan chè ak po (Efez 6:12). Li ka tou sityasyon difisil sou nenpot fom ki ta vle domine lavi li.

Devan tout difikilte ki reprezante « lènmi » ou, Bondye toujou bò kote’w pou li pote kichòy ou bezwen. Li sansib pou ou e li pa janm vle ou soti wont. Avan yon bagay rive’w li te gentan gen solisyon (li Jenèz 1-5).

(2) Bwa ak zorèy Bondye toujou disponib pou ou. Li la pou anvlope ak yon lanmou san parèy e ba ou yon akèy chalere e wayal paske (3) Bondye vle fè ou kontan ak yon lajwa ki pa depann de okenn sikontans paske nan li (4) ou pap janm manke anyen ou bezwen. « [….] Ou resevwa’m, ou fè kè’m kontan e ou ban’m tou sa’m bezwen. »Som 23 vèsè 5

Pa gen anyen w’ap travèse ki yon sipriz pou Bondye. Li renmen’w ak yon lanmou san mezi e vle ba ou tout sa ou bezwen ki ap soti nan yon zanmitay ki gen anpil bèl konplisite avek ou sou « tab » li prepare apa pou ou a(espas entemite ki apa pou li ak ou). Ou sèlman dwe kwè (Jak 1:1-6).

Ann Lapriyè:

Senyè,

Yon relazyon entim ak ou se yon bagay sakre. Li retire tout konfizyon ak kondanasyon nan kè’m e ranplase yo pa konfyans, libète, ak serenite. Menm jan ou te montre David « tab » ou te prepare pou li a, louvri je’m chak jou pou mwen toujou wè pwovizyon ou yo nan tout sikonstans e priorize relasyon mwen ak ou.

Mèsi paske ou toujou la, jan ou pran swenm, korije’m, e toujou la pou fè kè’m kontan. Mèsi paske devan tout sikonstans, pèsekisyon, ak difikilte ou pa janm fè bak menm lè mwen ta febli. Ou menm sel ki Bondye. Ou menm sel ki merite tout lwanj ak konpliman. Banm fòs pou’m kontinye pou glwa ou ak edifikasyon nanm mwen. Nan non Jezi, Amen.

4èm Semèn: Senyè a se gid ak pwoteksyon ou

6 Semèn Konsekrasyon-Sòm 23, , , , ,

« Menm lè m’ape pase anba lonbray lanmò, mwen p’ape pè anyen paske Senyè ou la avèk mwen. Se baton ou ak pwoteksyon ou ki fè kè m’ pa kase. » Sòm 23:4

Nou pati pou 4èm semèn meditasyon ak konsekrasyon nou nan Som 23 wi! Kijan sa ye pou ou? Eske ou komanse jwenn rezilta? Pa bliye medite vle di reflechi de manyè apwofondi sou vèsè yo e konsekrasyon se yon aksyon pou mete apa pou Bondye. Nan ka nou se kè ak tan nou deside dedye a li pandan moman sa yo. Ann vanse!

Kontèks: Nan 4èm vèsè a, David deklare ke menm lè li nan lonbray lanmò li pap pè paske Senyè se yon bon gadò ki ap konbat pou li e pwoteje li. Kisa sa vle di pou ou jodia? Lonbray lanmò reprezante divès kalite sityasyon kote yon pitit Bondye ta nan danje kit fizik, emosyonèl, oswa espirityèl.

Bèje itilize baton li pou pwoteje ak defann mouton li yo lè lòt bèt ap atake yo. Li itilize baton an tou pou gide ak restore mouton yo avèk tendrès lè yo ale twò lwen oswa ta tonbe nan yon move kwen. Nan menm kontèks sa, vèsè sa raple ou ke Bondye ki se gadò ou toujou la pou li dirije’w, pwoteje’w, ak defann ou ak « baton » li ki se tout fòm kominikasyon li itilize pou koze ak ou tankou pawòl li yo nan Bib la, enstriksyon pèsonèl li revele ou lè ou pase tan ak li, a travè yon sèd oswa frè de konfyans li konfime revelesyon pèsònèl li te ba ou yo, enstriksyon kolektif, elatriye.

Bondye pwoteje’w, dirije’w, epagne’w, e defann ou plis ke sa ou wè e konnen chak jou. Li vle ou konnen li plis pou fè plis wout avè’w. Sa’w panse de bèl envitasyon pou avanti sa kote li vle menmen ou an?

Pa gen okenn sityasyon difisil ou rankontre (ki egzanplifye lonbray lanmò) ke Bondye paka dirije’w pou rezoud li e pwoteje’w pou Bondye. Kit se ta pwoblèm sante, travay, kay, sekirite, emosyonèl, espirityèl, politik, oswa […–>mete nenpòt sa ou panse ki ta enpas ki pase nan lespri’w], Bondye vle ba ou direksyon ak pwoteksyon. Bwa Bondye pa twò kout pou li kouvri tout pitit li yo nan kat kwen tè a ni zorèy li twò okipe pou tande chak grenn nan yo. Alò pa pè ni grent, koze ak li. Ou pap regrèt.

Ann Lapriyè:

Bon Papa,

Mèsi. Lè’m pran tan poum kalkile mwen realize nan tout moman nan lavi menm si mwen ap rejwi oswa ap jemi ou toujou la pou mwen. Ou se yon gadò ki toujou ap veye sou mwen. Ou pwoteje’m, konsole’m, dirije’m, e montre mwen tout sa mwen dwe fè depi mwen kite je’m yo sou ou. Mèsi pou privilèj sa.

Pafwa lè’w banm direksyon, mwen konn fè neglijans e mwen mande’w padon. Mèsi paske ou pa gade sa pou anyen e pou pawòl ou yo nan Sòm 23:4 ki raple mwen ke ou se gid ak defans mwen. Mèsi paske ou toujou ap goumen pou mwen. Pou tout fèy ou kouvri mwen, tout sèkèy ou kraze, tout kònplò ou konfòn, tout move sikonstans ou tounen an byen pou mwen ke yo. Mo yo pa ase pou’m explike ak temyanye de grandè ou men mwen mete’m byen ba pou mwen di ou mèsi. Mèsi paske ou toujou ap arete e minote tout fòs fènmwa sou lavi mwen, sou lavi fanmi mwen yo, zanmi mwen yo, katye kote n’ap viv, zòn kote nou pase, ak peyi kote nou rete yo. Pawòl ou sensè e mwen konnen karaktè ou pap janm chanje.

Oh wi, mwen fè lwanj ak konpliman pou ou. Kontinye wete nan mwen tout inkredilite oswa manke bon konprann ki ta fè mwen neglije aji lè ou pale. Mete plis sansibilite nan kè’m pou mwen distingue vwa ou byen pou mwen viv selon volonte’w pa pouvwa Sentespri ou ki abite nan mwen. Mwen konte sou ou. Nan non Jezi. Amen