“Se pou nou fè tou sa pawòl la mande nou fè. Pa rete ap koute ase. Lè
sa a, se pwòp tèt nou n’ap twonpe.” Jak 1:22 HCV
Menm jan flè nan foto pòs sa poko finn deploye a konsa tou nou gen anpil lòt fasèt nan idantite nou pou nou dekouvri ansanm. Men fòk nou aplike sa nou aprann yo pou nou ka pwogrese e pa twonpe tèt ou jan Jak 1:22 raple nou an.
Pou kèk nan nou li ka se pase ti tan pou koze ak Bondye konprann ke richès fè pati eritaj nou oswa nou se lanmou, respè, otorite etc. Pou lòt li ka paske yo pa finn klè kijan idantite yo se viktwa lè chak jou sanble defèt oswa kalimite toupatou e Bondye di idantite nou nan li se lapè. Kijan poum padone entel paske nan Bondye mwen se padon? etc. Tan sa ka pase nan mande’l ouvè zye n pou wè kijan lapè li opera e kijan yo ka pote lapè tout kote yo ye. Kelkeswa kategori ou jwenn tèt ou maten e kesyon k’ap travèse kèw pale ak mounn ki damou nanm ou an. Mande Bondye pou’l gide’w e montre’w kijan verite sa yo ka materialize nan lavi’w.
Mèsi paske ou ap fè egzèsis espirityèl sa w’ap pratike ak nou pou konnen plis kiyès ou ye vre nan Bondye e wè fwi don sa yo reflekte nan lavi’w. Ke Bondye onore/ beni tan sa yo w’ap pase ak li e repòn tout kesyon ou yo ak anpil lanmou e an gran jan. Nou ankouje’w tou medite sou Sòm 103 jodia pandan ti tan apa sa. An avan bon solda!
“Senyè a ba yo
konesans ak ladrès pou yo ka fè tout kalite travay atizan ka fè, desen sou bwa,
bon twal koulè ble, violèt ak wouj, twal fen blan. Wi, li ba yo ladrès pou yo
ka fè tout metye, pou yo ka fè tout kalite bèl bagay.” Egzòd 35:35
Apre Bondye te bay Moyiz ak pèp Izrayèl lòd pou bay ofrann epi bati yon tant kote pou glorifye’l, nou aprann ke Bondye te bay gwoup espesyal yon ability natirèl oswa yon talan diferan (swa yo te atizan, pènt, mason, injenyè son, netoyaj, achitèk, kontap, fè manje etc) pa pouvwa lespri li ki nan yo pou ba yo konesans ak bon konprann e pou fè travay sa e li mache (Egzòd 35: 30-35).
Konsa tou lè Bondye t’ap kreye’w nan imaj li “li mete Lespri li sou ou an kantite pou li ba’w ladrès, konesans ak bon konprann pou fè tout kalite bèl bagay”( Egzòd 35:31-35, Jenèz 1:26-27). Pa pouvwa Sentespri li, non sèlman ou se yon mounn chwazi men ou gen anpil talan ak konesans nan ou! Eske’w te konn sa???
Lavi ou pa yon aksidan e Bondye kreye’w ak anpil kado inik ki non sèlman ap beni anviwònman’w, fè’w pwogrese, men tou pote glwa pou non li (Jeremi 29:11;Sòm 139; Efezyen 2:10-18; 1 Timote 4:0-14). Plizyè (menm ka di majorite) nan pitit Bondye a pa konn ni talan natirèl (fizik, teknik) oswa kado espiritèl yo ( 1 Korent 14: 1-26) k’ap pèmèt nou egzèse otorite nou sou tè a.
Se sak lakòz anpil nan nou mouri san nou pa dekouvri tout bèl mèvèyak richès Bondye mete andan nou a ak kiyès. Konesans sa yo pa soti sou ban lekòl e sosyete paka ba ou li byen si’w invite Bondye. Si’w pa kwè di, ki talan ak don espirytèl ou konnen Bondye mete nan ou? Kijan yo manifeste? Ou pa bezwen grate tèt ou si’w pa konnen paske Jodia nou pral komanse dekouvèt sa ansanm!
Men kèk pwen ki ka ede’w pou idantifye talan’w (oswa talan ou yo) e devlope yo:
Aji lafwa‘w. Kwè ke Ou se yon bwat ki ranpli kado andan’w! (Se sa pawòl li di nan Jeremi 29-31, Filipyen 3, Efezyen 2 etc)Bondye fè yon depo lakay ou pou ou ka akonpli bi byen detèmine li gen pou lavi ou e li vle’w utilize yo. Pou kado ki andann yo ka beni lòt moun ou, gen efò paw pou fè tou.
Fè diligans pou pase tan nan lapriyè, li Bib la pou Kong sa Bondye di de ou, ak mande li direksyon pou ou konnen ki sak nan ou apaske se li sèl ki konnen’w byen(Jeremi 1:5; Ezayi 44:21-22). Poze zan’w e mande Sentespri Bonde ki nan ou a (si ou aksepte Jezi deja e kwè nan li) pou gidew ak konkou lapriyè fanmi esperityèl ou a pou idantifye sa’w fè byen ak dado Bondye nan ou(pa bliye ansanm nou pi fò ou pa bezwen fè chimen dekouvèt sa sèl).
Sonje: Bondye pwomèt pou li reponn ou lèw pale ak li e pwomès Bondye se lajan sere! (1 Jan 5:14; Jak 1:6, Sòm 145:18). Alò pa pè poze’l kesyon sa e kwè l’ap reponn ou.
Fouye kèw pouw ka konnen ki sa ki nan ou. Atann ou ke li ka nan nenpòt domèn (agrikilti, sante, mizik, komedi, edikasyon, gouvènman, komès, elatriye). Lè’w dekouvri talan ou (si’w poko fè sa) sa ap beni kèw, beni lòt moun e bay Bondye glwa tou. Nan nenpòt domèn lan fòk ou mete kèw ladanl paske fòk ou develop sa Bondye mete nan ou a (Pwovèb 16:3).
Pa kite perèz ak pase tan konpare tèt ou ak lòt mounn fèw pèdi idantite’w (talan ki inik lakay ou) paske si Bondye ba ou’l se paske li konnen ou ka maximizel’ e li fèw konfyans (2 Timote 1:7). Li lè pou ou deploye zèl ou tankou papiyon nan sèvis li ak don ou yo. Pa bille ou se otorite ak viktwa, alò sòti nan kokiy ou e plan plas yo sou tè a an gran jan nan egzèse talan ou yo paske anpil nanm (lavi lòt mounn) depann de ou!
Idantifye talan’w yo jodia e pataje’l ak mounn ou fè konfyans. Ke pouvwa Bondye kontinye manifeste nan lavi’w e ke Benedisksyon li kouvri ou nan chien dekouvèt sa ak tout fanmi’w!
Ann Lapriyè: Bon papa mèsi paske ou fèm ak anpil talan! Okenn detay de mwen pa echape’w. Mèsi anpil paske younn nan idantite’m nan ou se sa mwen ka pwodi pou beni nonw ak lòt moun! Mwen vle dekouvri pil kado sa yo ou mete nan mwen an e itilize yo pou avanse wayòm ou sou tè a. Mwen mande’w “Fè moun k’ap sèvi ou yo wè sa ou ka fè. Fè pitit pitit yo wè jan ou gen pouvwa. Senyè, Bondye nou, pa sispann ban nou favè ou. Fè nou reyisi nan tou sa n’ap fè. Wi, fè nou reyisi nan tou sa n’ap fè.” (Sòm 90:15-17)
Sentespri, tanpri kenbe nou e dirige nou. Louvri zye nou pou nou wè gwozè ak grandè depo sa ou mete andan nou pou nou ka develop talan nou pou sèvi Bondye nou an ak frè ak sè nou yo nan renemen. Nan non Jezi mwen priye Amen.
Fixe zye’w sou Jezi!!! Pwoms Bondye se lajan sere!!!
“Bondye menm gen pouvwa pou l ban nou tout kalite benediksyon an kantite. Li fè sa, pa sèlman pou nou ka toujou genyen tou sa nou bezwen, men pou nou ka gen rès ki rete pou n fè tout kalite bon zèv.”
2 Korent 9:8
San kache’w, idantite sa Bondye revele nan li a se yonn nan sijè ki te pi difisil pou m konprann. Petèt ou diferan men mwen kalkile kijan fè Bondye di nou rich lè anpil nan nou ap viv chèk pa chèk oswa pap travay obyen ap bat dlo pou fè bè? Anpil elèv ak paran gen strès peye lekòl obyen peye dèt? Kijan 2 Korent 9:8 manifeste nan lavi nou chak? Ki sa ki ba nou otorite e fè nou konnen nou se mounn ki rich?
Pifò vèsè popilè sou lajan ak byen materyèl toujou ap bay konsèy pou fè atansyon ak bagay sa yo. Sijè sa merite anpil bon konprann sou kèk kesyon tankou Eske siw posede anpil byen materyèl ou pa ka sèvitè Bondye? Kisa fi fè yon moun rich oswa grannèg? Konbyen kòb pou ou posede nan bank pou ou konsidere tout ou rich? 5 goud? 50? 500? 500 Milyon? 5Bilyon? Konbyen zero ki pou dèyè chif la?
Anpil etid ak statistic montre ke majorite nan nou rich e nou pa konn sa. Paske nan nati nou li difisil pou anpil nan nou satisfè kifè richès nou echape majorite nan nou e li vinn fasil pou strese pou lajan. Tankou machann lari vle gen boutik, sak nan boutik vle gen sikisal, sak gen sikisal vle yon kompany, sa ki gen kompany vle plis, sak gen plis vle plis. Milyonè konsidere tèt yo pòv lè yo pami bilionè etc. Li pi fasil pou bourike dèyè lajan ke fè invantè kèw ak laviw pou pwogrè dè fwa. Pou tèt sa anpil nan nou kontinye ap eseye e vinn friste. Fòk ou travay di se vre men fòk ou konnen tou anpil lajan ak byen materyèl pa fè richès. Yo jis baw mwayen pou gen plis komfò pou kèk bagay men gen anpil choy ki nesesè pou viv lajan pa ka achte (Pwovèb 21:5, Pwovèb 28:20-28).
Bondye vle beni nou ak “tout kalite benediksyon” sa vle di li pa vle’w soufri pou anyen (lajan tou) men li vle kè nou pwòp avan (2 Korent 9:8). Nan Jenèz 22-24 li fè Abraham prospere e ranpil ak anpil byen materyèl paske Abraham te fèl konfyans ak tout kè li e Bondye te konnen li te kè Abraham pap detounen de li poutèt bon zanmitay yo te genyen an. Men jan li beni Abraham ak tout kalite bedisyon, li vle beni ou tou. Bondye rayi lamizè ak injistis se sak fè li ba nou devwa pou nou ede youn ak lòt, bay vèv ak òfelin yo sekou, kanpe pou lajistis ak sa ki byen ( Jeremi 22:3, Mica 6:8, Detewonòn 15: 7-8, 1 Jan 3:17). Lamizè ak viv tankou pòv paske se konsa sa toujou ye pou fanmiw oswa nan antouraj ou pa fè pati idantite’w. Wi, mwen menm ak ou jodia se moun rich! Men richès nou pa nou men k’ap sèvi Bondye a pa itilize men jan.
Paske ou se yon nòm/fanm rich men sa pou kenbe nan tèt ou jodia: Jan Pòl te explike li a nan 1 Tim 6:17-18 “pa kite lògèy vire tèt yo. Piga [ou]* mete espwa [ou*] nan richès sa yo ki pa sèten. Se pou [ou]* mete espwa [ou]* nan Bondye ki ban nou tout bagay an kantite pou nou ka gen jwisans yo… fè anpil byen, pou [ou]* ka rich devan Bondye. Piga [ou]*chich. Se pou [ou]* toujou pare pou separe sa [ou]* genyen an ak lòt.”
Pwen pou’w sonje: 1) Bondye vle konble’w ak anpil benediksyon pou glwa li manifeste nan lavi ou (2 Korent 9:8, Sòm 1:1-2). 2)Ou se youn mounn rich pou fè sa ki byen alò pataje sa’w genyen (piti kou li ye 1 Jan 3:17). 3) Bondye beni’w pou ou ka beni lòt moun (pa kenbe konesans ou yo pou kòw nan kite lòt soufri lèw ka ede 1 Tim 6:17-18) . 4) Lajan pa malediksyon se kondisyon kèw ki ka fèw pedi nanm ou (Sonje se nan Bondye ki bay richès la pou mete espwa sèlman paske syèl la, tè a, ak tout sa ki ladann se pou li sèl Ezayi 66:1, Pwovèb 23:4).
Chanje jan ou wè tèt ou jodia paske ou se grannèg men san awogans ak gwo kolèt paske de bagay sa yo pa soti nan Bondye.
Men kèk bagay ki asire idantite sa:
Wa sonje pitit tig se tig. Bondye kreye syèl ak tè a ak tout sa ki nan li. Se li ki mèt tout richès e ou se erityel (Sòm 24: 1-2; Jenèz 1:26-27).
Bondye kreye tout bagay pou ou fè ou plezi (2 Korent 9:8).
Bondye vle beni’w ak tout jan de benediksyone lajan ladann tou men li vle ou konnen ke richès ou fè pati idantite’w. Li soti nan andanw e pa nan sa ou posede. (1 Tim 6:17-18) Ou pa bezwen al fè zak malonèt ni rayi lòt mounn lè ou wè yo ap vanse nan kote w’ap tann mirak pa ou a (Sòm 37, Chirasid 31:8).
Ou rich paske lespri Bondye nan ou (Ezekyèl 36:37, 1 Korent 3:16, 2 Tim 1:14).
Ou se yon mounn rich paske ou konekte ap mèt lanate e gen tout pouvwa (Ezayi 66:1)
Nan Bondye ou rich paske nan li ou pap janm manke anyen e li toujou kenbe pwomès li. Ou rich paske ou toujou gen tout saw beswen e Bondye pwomèt pou li toujou baw bezwen (pa tout sa ou swete ki pa nesesè) e plis toujou pou ou ka beni lòt moun( Filipyen 4:19).
Richès soti andanw. Li pa soti sou byen materyèl ou posede. Toujou sonje kiyès ou ye e ak ki moun ou konekte!
Priyè: Menm jan pwofèt l te di nan Jeremi 17:7-8, “Benediksyon pou [ou]* ki mete konfyans [ou]*nan Senyè a, wi, pou [ou menm]* ki mete tout espwa [ou]* nan li. [W’ap]* tankou pyebwa yo plante bò larivyè. [W’ap]* plonje rasin ni fon nan dlo. [Ou]* pa pè anyen lè sezon chalè rive paske fèy li ap toujou rete vèt. Te mèt gen yon lane sechrès, sa p’ap fè li anyen, [w’ap]* toujou donnen.” Senyè mèsi paske nan ou mwen se ou mounn ki rich e vle benim ak tout kalite benediksyon. Tanpri anprann mwen byen konprann kijan poum itilize tout sam posede poum baw lwanj e ede lòt ki kotem yo konsa tout mounn va konnen se ou sèl ki bay e ou pap janm kite pitit ou wònt ni mande charite. Fè kèm pi pwòp poum sèvi ou pi fran chak jou pou logèy pa janm gen plas nan mwen. Banm pasyans ou ak plis lanmou pou kontinye fè sa ki byen. Mèsi paskew fèm rich e lavim asire nan ou. Amen. * adapte pou devosyon an
“Konsa, Kris la se tankou yon kò ki gen anpil manm. Kò a toujou yon sèl kò, ou mèt wè li gen anpil manm.” 1 Korent 12:12 HAT98
Inion fè la fòs se sa nou aprann depi nou ti kakat. Se sa ki deviz peyi nou men nou aprann vit ke se younn nan bagay ki pi difisil pou realize kit nou nan ‘legliz’ oswa nenpòt sektè nan lavi.
Lè nou mete tèt nou ansanm nou fè anpil pwogrè e pa gen fòs fènwa ki ka kanpe devann. Paske ou se yon chwazi, ou se lanmou, padon, lajwa, lapè, ak respè, idantite’w nan Bondye se inite tou. Yonn nan fason nou montre inite sa se lè “nou tout nou dwe dakò yonn ak lòt, se pou nou gen menm santiman yonn pou lòt. Se pou nou yonn renmen lòt tankou frè ak sè, se pou nou gen bon kè, san lògèy.” 1 Pyè 3:8 menm lè sa pa fasil.
Younn nan pi bèl evènman ki sot pase yo sete lè ekip football nou te finn kale Canada epi Ayisyen patou nan lemòn ap celebre. Kè yo kontan e y’ap bay akolad yonn ak lòt epi chante “Alaso ann ale!” Se yonn nan premye fwa m gen chans wè mounn peyim sou menm akò e se te yon bèl bagay ki fè kèm kontan.
Li raplem jan nou dwe ye nan Bondye e kijan sa bèl lè nou tout gen yon bi ansanm. Menm jan kò gen plizye ògann e ki fonksyon an hamoni pou nou ka fonksyone byen, konsa tou menm si nou chak gen diferan opinyon ak talan menm nou dwe pou viv ansanm (1 Korent 12:12) nan lanmou ak lapè paske lavi nou chak depinn younn de lòt. Inite se sèl mwayen nou genyen pou nou vanse pi devan!
Si yon match ka mete lajwa nan kèn konsa e rapwoche tout kòt fanmi nou patou nan lemònn paske ekip nou te champyon kombyen plis laja nou tap genyen lè nou deside mete tèt ansanm nan lanmou poun sèvi Bondye ak younn ak lòt vre e chanje peyi nou??! Imajine kokenn chènn solidarite ak pwogrè nou ka fè ansanm si nou ka kontinye gen menm mentalite ak lanmou nou gen pou footbal la ak ekip nou nan lavi esperityèl, profesyonèl, sosyal, finansyè, ak emosyonèl nou?? Pi bèl nouvèl jodia se frèm ak sèm idantite’n nan Bondye se inite!
Wi, nan 1 Korent 1:10 nou li “Frè m’ yo, mwen soupriye nou angras, nan non Jezikri, Senyè nou an. Tanpri, mete nou dakò sou tout pwen. Pa kite divizyon mete pye nan mitan nou. Okontrè se pou nou fè yon sèl. Se pou nou tout gen menm konpreyansyon ak menm panse.” 1 Korent 1:10 HAT98 Pran kelke segond pou realize gwo impact idantite sa pa ou.
Wi, nan 1 Korent 1:10 nou li “Frè m’ yo, mwen soupriye nou angras, nan non Jezikri, Senyè nou an. Tanpri, mete nou dakò sou tout pwen. Pa kite divizyon mete pye nan mitan nou. Okontrè se pou nou fè yon sèl. Se pou nou tout gen menm konpreyansyon ak menm panse.” 1 Korent 1:10 HAT98 Pran kelke segond pou realize gwo impact idantite sa pa ou.
Refleksyon: Kisa sa vle di pou ou lèw konnen nan Bondye ou se inite? Eske se yon bagay ou kwè? Eske ou panse yon relation sensè e intim ak Bondye ka fè tout kè reini vre pou pwogrè ka fèt? Ki chanjman ou ka fè nan konpòtmanw jodia pou reflekte nouvo idantite sa ki se inite ou genyen nan Bondye?
Ann Lapriyè: Senyè mèsi pou lanmou w ak kompasyon ou genyen pou mwen chak jou. Mèsi paske ou aprann mwen nan ou mwen se inite. Mwen gen kapacite poum renmen ak tout kèm, tande ak respekte opinyon lòt frèm ak sèm e mwen gen devwa poum fè tout sa nan pouvwam poum ede tèt mwen, enviwòmnan ak tout mounn ou mete nan wout mwen pou non ou ka glorifye. Tanpri banm plis bon konprann, pasyans, lafwa, pèseverans ak dètèminasyon poum kontinye. Kèm se pou ou e mwen ofri tout sa mwen ye e vle ye a ou. Fè sa ou vle pou mwen ka ini plis ak ou e lòt mounn ki nan antouraj mwen. Nan non Jezi mwen priye. Amen
” Aga di nan kè l’. Ou kwè se vre se mwen ki wè moun ki wè’m lan? Se konsa li bay Seyè a yon non, li rele’l: El Wòy , Ou se Bondye ki wè’m lan. ” Jenèz 16:13
Eske’w poko janm santi’w sèl? Tankou ou nan mitan yon foul epi w’ap mande si gen yon mounn ki wèw? Se pa wè kòw men wè mounn ou ye a ak tout defo e kalite’w. Eske yo wè lè kèw ap dechire oswa lèl ap rejwi?
M te rive nan yon epòk kote m te konn mande tèt mwen, Eske Bondye wèm vre pami plis ke 7.5 billion mounn ki sou la tè? Kijan l fè konnen lè se mwen k’ap priye oswa yon lòt? Bib la di mwen espesyal pou li e lap bay nasyon pou sovem (Esayi 43:4), Kijan mwen konnen vre kem espesyal pou li? Lè sikonstans lavi komanse rèd e lafwam te doute e mwen mande si li wèm vre poukisa mwen soufri? Nan pawòl li di menm cheve nan tèt mwen yo konte (Lik 12:7, Matye 10:30), Pouki li kite tèl bagay fèt? Si li wè nou chak poukisa entèl pa geri? Efòm yo poko pote fwi? Anyen poko chanje?? Panse sa yo pa janm travese’w?
Mwen tout kesyon sa yo te konn banm pwoblèm jiskaske m vinn aprann de istwa Aga nan Jenèz 16 (li istwa sa lèw gen yon ti tan) kote Bondye te raple’l malgre sikontans yo pat favorab, Bondye toujou renmen’l menm jan li renmen nou chak chak jou.
Bondye te parèt sou Aga nan yon epòk kote li te meprise e abandone pou di’l ke li pa abandone’l e ke li se “El Wòy: Bondye ki wèl la” Jenèz 16:12-13. Nan dout mwen te genyen yo Bondye te raplem ke menm jan m ka rekonèt vwa paranm nan nenpòt foul oswa yon paran ka tande vwa pitit yo nan pami nenpòt kote ak anpil bwi (menm ti zannimo ka fè sa!) konsa tou Bondye sansib pou vwa’w ak pam ak pou sa n’ap andire!
Jodia Bondye vle raple’w ke li se El Wòy pou ou tou! Li wè’w nan tout sa w’ap fè, soupi ou pa ven men ranplase yo pa lafwa ni tan w’ap pase ak li nan lapriyè yo pap pèdi. Kontinye fèl konfyans e viv pou li nan renmen youn ak lòt. Li la pou ou e li pap janm lage’w (Det 20:18). Li la pou ou nan tout bagay, sa vle OU PA JANM Sèl!!!
Ou mèt wè anpil mounn ka meprise’w jodi e ou ka pa finn konprann valèw men ou pa janm pou kont ou. Lè ou an danje li la pou sove’w (Egzòd 14:14), lè w’ap kriye li vle konsele’w (Rev 21:4). Nan li lavi ou asire e pa gen plan lenmi ki ka kanpe kont ou (Woman 8:28).
Menm Bondye ki te la nan tan Aga ak Abraham lan, se li menm ki la toujou! (Res. 23:19) Bondye wè’w e li renmen’w ak yon lanmou san fini. Li wè lè kèw ap kase an bout e li vle seche chak gout dlo ki soti nan ze’w paske chak kout dlo nan ze’w se kout kouto nan kè li. Menm jan li te restore Job li vle restore nanm ou ak kè ou pou vrè pwogrè k’ap simaye. Menm jan ak Jozèf li gen plan pou laviw (Jeremi 29:11). Li wè tout sa ou fè ki byen ak tout ou fè ki mal menl jan li sa mounn fèw. Ou espesyal nan jel e li pap janm abandone’w!
Ann Lapriyè: Senyè mèsi paske ou toujou la pou mwen. Mwen pat panse out e ka wèm pami tout foul yo men ou demontrem ou se yon bon papa e je’w ap veye nou chak. Mèsi pou sa! El Wòy, mwen ba ou glwa paske ou se Bondye ki wèm tout bon. Ou konn tout bagay de mwen, tout sam santi, tout sa k’ap trakasem oswa fèm plezi. Mwen koute chè nan je’w e ou toujou wèm nan tout sa mwen ye kit mwen kagou oswa map rejwi. Ou konn tout sam fè oswa pral fè ak tout sikonstans k’ap vini nan fiti malgre tout sa ou damou’m pi plis e vle kem konnenw tou. Mèsi paske ou toujou ap gade e pwotejem. Mèsi anpil paske ou toujou vle sa ki pi bon pou mwen chak jou menm lè dè fwa mwen reziste’wl. Ou banm anpil valè menm lè mwen pa toujou ka wè bèl plan ou gen pou mwen men mwen fè’w konfyans. Mwen renmwen e di’w mèsi pou tout sa ou ye pou mwen. Wi, ou bon pou mwen e kèm fè lwanj ou! Amen.
«Bondye te deside depi davans pou li adopte nou pou pitit li nan Jezikri, paske sa fè li plezi.» Efezyen 1:5
Depi lè Bondye te kreye’w kòm pwòp reflè lanmou ak grandè li (Jenèz 1:26), li damou’w e li te ba’w kompayon (Jenèz 2:18). Wi, Ou pa pou kòw!! Non sèlman Bondye toujou avèw men ou gen anpil lòt sè ak frè nan lafwa ki la pou ou. Intèpretasyon popilè de Jenèz 2:18 kote Bondye di li pa bon pou yon nonm rete sèl pale de koze madanm ak mouche, men se premye introdiksyon fanmi ki fèt nan bib la paske fanmi se moun ki la yon pou lòt nan bon ni nan move tan (Pwovèb 11:29).
Se yon gwoup ki la pou younn ede lòt, sipote ansanm nan renmen san tripotay, ipokrizi ak jalouzi menm jan Bondye te vle li pou nou chak nan Jenèz 2:18. Bondye pa vle nou sèl fisikman nin nan konba lafwa paske enemi nanm nou a toujou sou atak. Bòn nouvèl jodia se depi’w te aksepte Jezi, ou te adopte nan fanmi Kris la e banyè Bondye a sou ou (Efezyen 1:5; 1 Jan 3:1)!
Sa vle di ou pa sèl e ou pa bezwen fè tout bagay (kriye, soufri, grangou, rejwi, fè pwogrè, leve gwo chay oswa pitit, malad, refè, reve, etc)pou kòw paske ou pa etranje ankò. Se etranje ki mete kò yo apa e pè mele ak mounn lakay paske yon pa konn prensip kay la. Men ou ki aksepte viv pou Kris, ou se mounn kay tout kote pitit li yo ye ( tou patou)!
Efezyen 2:19-22 explike sa byen, « Se sa k fè, nou menm moun lòt nasyon yo, nou pa etranje ankò, ni moun ki depasaj. Men, se sitwayen nou ye ansanm ak tout moun nan pèp Bondye a, nou fè pati fanmi Bondye a […]nou se kay Bondye ap bati sou fondasyon apòt yo ak pwofèt yo te poze a. […]Se li menm ki kenbe tout kò kay la kanpe byen fèm, ki fè l grandi pou l tounen yon sèl kay yo mete apa pou Bondye. Konsa, nou menm tou avèk lavi n’ap mennen nan Kris la, nou antre nan batisman sa a pou nou fè ansanm ak lòt yo yon sèl kay kote Bondye ap viv ak pouvwa Sentespri li.» vèsyon HAT 98
Paske ou fè pati yon fanmi nan Bondye, gen yon gwoup frè ak sè ki renmen Bondye menm jan ak ou e ki dedye vi yo ak li ki la pou sipòte’w e ba’w kout zepòl nan tout sa w’ap fè. Lè ou soufri, y’ap soufri tou, si’w beswen priye yo mete tout sa ka yo kapab de kote pou entesede pou ou e ak you. Konsa tou lè kè’w kontan yo rejwi tou ( 1 Korent 12:26). Ou gen poto mitan lakay ou!
E se si se pa sèl ti gwoup ou wè devan jew la oswa nan asanble kote’w ye ki la pou ou, se nou tout ki kwè nan Bondye toupatou nan lemònn ki la pou ou ti doudou! Se konsa fanmi Kris la opere nan viktwa li te ranpote pou nou an deja! Lè nou viv konsa nou pote wayòm Bondye a pi plis sou tè a e fè satan wònt paske nou vle yon ak lòt reyisi nan tout sa n’ap fè (Kolasyen 3:23-24).
M pa konn pou ou men lèm lakay mwen e mwen nan pami fanmi’m mwen santim ere! Gade, mwen ouvè kòm , chante, e ri ak tout kèm paske mwen santim alèz e byen antoure. Si mounn lakay mwen kouri deyèm yon jou, se paske m do fè yon bagay ki pa sa oswa m bliye fè yon bagay yo mandem men apre sa lanmou ak lapè renye.
Konsa tou Bondye vle nou santi nou lè nou nan prezans li e pami frèn ak sèn yo ki met konfyans yo nan li pou nou ka simaye lanmou li toupatou (1 Pyè 4:8; Levitik 19:18). Se pa sèlman lè nou nan sèvis adorasyon nou fanmi, men nou se younn kit nou nan biwo oswa nan lari kwabosal paske nou represante Bondye tout kote nou ye.
Pa rete sèl nan konba lafwa ni kite move experyans ou te fè nan « legliz » oswa move expersyans nan zamitay fèw pa jwi gwo bonè sa ki gen nan viv ansanm nan fanmi Kris. Fanmi’w fè pati idantite’w e ansanm nou pi fò! (Eklezyas 4:9; 1 Pyè 3:8; Pwovèb 17:27; Matye 18:20)!
Medite sou Efezyen 2:19-22
Ann Lapriyè: Senyè, mèsi paske ou ban mwen yon fanmi solid nan lafwa. Menm lè mwen pa pre fanmi sanm, mwen pa janm pou kòm paske ou toujou la e lòt pitit ou ye antourem tou. Dè fwa move experyans ak pwòp fanmi biologik mwen oswa perèz pou lòt mounn pa abize emosyon m konn rann li difisil poum fè lòt mounn ki sensè nan relasyon yo avèw e ki vle la pou mwen konfyans. Menm nan asanble lafwa, li parèt difisil tou poum konn kiyès ki la pou mwen vre paske se ou sèl ki konn kè lòm.
Pa pouvwa Sentespri ou a, louvri jem poum wè e aksepte bèl onè sa ki se fè pati fanmi ki nan wayòm ou a. Poutèt ou mwen paka janm òfelen nan vim paske fanmi fè pati idantitem nan ou e mwen diw mèsi pou sa. Banm fòs poum padone moun ki te fèm mal lèm tap chache apwi nan « legliz » epi yo te repousem poum ka simaye lanmou patou kotem ye. Padone’m tou pou tout fwa mwen te fè lòt mal an panse, pawòl, aksyon oswa omisyon lè yo tap chache rekonfò. Ede nou rete yon fanmi pi djanm nan renmen, pasyans, ak pèseverans san prejije jan ou vle nou ye a pou non ou ka glorifye. Nan non Jezi mwen priye’w. Amen.
« Men nou menm, nou se yon ras Bondye chwazi, yon bann prèt k’ap sèvi Wa a, yon nasyon k’ap viv apa pou Bondye, yon pèp li achte. Li fè tou sa pou n’ te ka fè tout moun konnen bèl bagay Bondye te fè yo, Bondye ki rele nou soti nan fènwa a pou nou antre nan bèl limyè li » (1 Pyè 2:9 )
Anpil nan nou lè nal nan magazen pou ou achte yon rad, nou pran san’n pou mezire’l, vire avè’l, gade si’l flate kòn, pran foto avan mènm nou peye pou rad yo. Rad sa yo se rad ki pral mete a pa ni nou pa prale mete yo pamizak rad sal oswa nan poubèl. Paske yo nèf, anpil nan nou konsidere yo konsekan. Konsa tou lè Bondye t’ap kreye W li desine chak koub nan laviw ak ckak ven nan kò’w ak anpil souplès. Jan Kris te raple nou an« Menm cheve nan tèt nou, yo tout konte. Se sak fè, nou pa bezwen pè menm: nou vo pi plis pase anpil ti zwezo. » ( Lik 12:7)
Bondye te pran san’l e li pran tan’ l pou li fèw. Chak jou li revele’w plis de idantite’w nan li. Men jan rad nèf pa lage nan pami sak ki gen ranyon ak rad sal, Bondye mete’w apa pou li e li vle kenbew nan yon eta nèf. Bondye nou an pa nan patipri e li konnen valèw alò pa pèdi tanw nan tande mounn ki negatif ni ki pa konn valè yo vre nan Bondye paske Bondye wè’w e li renmenw anpil. Chak jou li vle fè bèbèl avèw nan pase ti tan ak li nan lapriyè oswa itilize kèw ki ranpli ak lanmou pou li ak pou frèw ak sèw yo nan konpòtmanw pou glwa li.
Bondye chwazi’w ak plezi chak jou (1 Pyè 2:9; Jeremi 29:11). Gade ou tèlman gen anpil valè nan zye’l ke li te bay vil pa pèsòn Jezikri pou li te montre’w sa. Li achte’w ak vi l , li admire’w, chouchoute’w, pwoteje’w, e li vle menmenw pi lwen toujou! Alò dim, poukiw kite tèt ou kagou lè lòt moun meprisew paske ou deside fè sa ki dwat devan Bondye? Eske’w konnen Bondye mete’w apa pou li? Sa vle di rakinn, move jalouzi, kolè, rayisab, ipokrizi ak fè manti etc pa pou ankò.
Ou fè pati fanmi royal Bondye a e se alyans sa ki ap baw fòs pou konbat nenpòt fènwa. Leve tèt ou, fè yon ti souri paske…. Ou se pitit Wa dè wa a! 👑E ou konnen wa gen bon gou, si’l deside chwazi’w ou wè ou se gwo koze! Ou enpotan sinon Bondye pa tap chwaziw ni ou pa tap li ti rapèl sa jodia. Pa bliye kiyès ou ye zanmi pam! Si’w wè lafwa’w ap bite pou yon rezon ou yon lòt, pa trakase kè’w. Pale de sa ak Bondye paske li pap janm pa chwazi’w lè ou louvri kè w ba li.
Ann Reflechi: Pandan semèn pataje ak yon mounn ou fè konfyans (oswa nan yon jounal ou yon fason atistik) repons sou kesyon sa yo. Ou ka pataje repons ou yo avèn tou sou devosyon sa! Siw pa konn repons yo tou, pa panike. Mande Bondye ki toujou la pou koze avèw e di’w ki sekrè.
Kijanw santiw lèw aprann ke Bondye chwaziw ak anpil lanmou?
Kijan ou enteprete 1 Pyè 2:9 nan labi pèsonèl ou? Kijan enfòmasyon sa sou idantite’w ka transfòme lavi’w?
Eske ou kwè ou se yon mounn ke Bondye mete apa pou li? Oui? Non? Poukisa?
