« Tankou solèy la ki leve chak maten konsa tou l’ap toujou kenbe pawòl
li. » (Lamentasyon 3 :23)
Pitit mwen,
Solèy la leve ankò jodia e w’ap respire. Fèmen zye’w, louvri kèw, respire dousman. Konpasyon’m, lanmou’m, ak devouman’m ou ou renouvle (Lamentasyon 3 :23). Eske’w santi kèm k’ap bat pou ou ?
Mwen renmen pase tan avè’w e gen anpil bagay mwen vle moutre’w (Jeremi 33 :3). Pa kache ni kite logèy ak wont mete divisyon nan nou. Mwen prèt pou padone’w tout sa’w fè paske ou gen anpil valè pou mwen (1 Jan 1 :9). Pa gen anyen ou fè oswa ou ka fè k’ap diminye lanmou’m pou ou (Jeremi 31 :3).
Ou se san’m e zantray mwen (Jenèz 1 :26-28). Kout dlo nan ze’w se kout kouto. Lè’w pa domi poutèt sousi lavi, mwen santi’w banm do. Mwen vle plis espas nan kè’w. Zepòl mwen se pou fado’w (Matye 11 :28-30). Pa kite Satan fèw rayi tèt ou ni mete’w espwa’w nan loto.
Mwen te pwomèt ou m’ap toujou la. Poum ba’w tout sa’w bezwen (Filipyen 4 :19). Tout limit mwen se ou (Lik 1 :37 ; Matye 19 :26 ; Ezayi 40 :28). Mwen renmwen’w e mwen konnen’w (Jeremi 1 :5). Mwen vle’w konnen’m tou pi plis (Ose 6 :6). Kite’m siye dlo nan ze’w, touche figi’w, e ba’w yon idante tou nèf (2 Korint 5 :17).
Mwen te peye pou’w ka viv san perèz (Ezayi 53 :5-9). Chak pa’w fè mwen tou pre’w (Ezayi 43 :2 ; Matye 28 :20). Eske’w ap kite’m gide’w ?
Pitit mwen damou’w anpil. Ou se kreyati mwen pran plis plezi nan li (Detowònòn 14 :2). Benediksyon’m pou ou pil sou pil (2 Korint 9 :8). Lanmou’m pou ou pap janm fini se sak fè mwen vle idante’w nan mwen sèl. Konsa sèlman wap k’ap beni lòt moun san patitri (Jenèz 12 :2). Kèm bat tanbou chak lè’m tande vwa’w. Jodia tanpri pase yon ti tan an plis nan fè yon ti koze ak mwen.
M’ap tann ou ti doudou. Ou konnen mwen toujou gen pasyans pou ou. Mwen vle beni’w plis ak transfòme’w. Ansanm pa gen anyen nou pa ka fè. Mèsi davans pou sa !
« Benediksyon pou moun k’ap travay pou lèzòm viv byen yonn ak lòt, paske Bondye va rele yo pitit li. » Matye 5 : 9
Paske ou se lapè, lajwa, lanmou, ak otorite, « Fè tou sa nou kapab pou [ou]* viv byen ak tout moun mezi [ou] wè [ou] ka fè li. » Women 12 :18
Bondye renmen ou chak ak yon lanmou san limit. Poutèt lanmou sa menm lè gen de moun ki parèt difisil pou ou sèvi byen ak yo, efò dwe fèt pou sa.
Paske ou se lapè :
1. « Se sak fè, [fòk ou] toujou chache bagay ki kapab ede [ou] viv ak kè poze, bagay ki pou penmèt [ou] soutni lòt nan konfyans [ou] nan Bondye. » Women 14 :19
2. Fiti ou asire nan Bondye ki se sous tout bon bagay ak lapè (Sòm 37 :37).
3. Ou pa bezwen nan fè jalouzi, oswa nan konpetisyon ak lòt moun pou siksè aparan ou wè yo dwe genyen, ni monte kolèt ou sou lòt mounn. Bondye gen yon plan damou e siksè asire nan li pou nou chak (Jeremi 29 :7-14).
4. Pa rann mal pou mal.
Jan 1 Pyè 3 : 9-12 explike nou an, « Pa rann moun mal pou mal, jouman pou jouman. Okontrè, lè konsa, mande benediksyon pou yo, paske se benediksyon Bondye te pwomèt pou’ l ban nou lè li te rele nou an. Paske : Si yon moun vle jwi lavi a, si’ l anvi pase kèk bon kadè sou latè, se pou’ l kenbe lang li pou’ l pa pale moun mal. Se pou’ l veye bouch li pou’ l pa bay manti.
Se pou’ l sispann fè sa ki mal, se pou’ l fè sa ki byen. Se pou’ l chache viv byen ak moun. Se pou’ l fè sa li kapab pou li viv byen ak tout moun.
Paske, Bondye veye sou moun k’ap mache dwat devan li. Li tande yo lè y’ap lapriyè nan pye’ l. Men, l’ap vire do bay moun k’ap fè sa ki mal. »
Pa dekouraje nan fè sa ki bon e kontinye sèvi ak tout moun nan lanmou pou lapè ka renye. Konsa plis mounn va enterese konnen ki ba’w lapè ak sajès sa tout kote’w pase paske Viktwa ou se nan fè sa ki dwat devan Bondye. Women 12 :17-21
Ann Lapriyè : Senyè mwen konnen avan lontan ou menm ki bay kè poze a gen pou kraze Satan anba pye ou ak [mwen] (Women 16 :20). Mwen beni non’w pou sa ! Mèsi paske ou chwazim kòm youn nan agan lapè ou. Paske mwen kwè nan ou pa gen fos fenwa ki ka kanpe devanm. Kote mwen ye ou la alò lapè ka toujou renye sim kite Lesentespri’w gide’m. Beni bouch ak lang mwen pou pawòl kap soti ladann yo pote lapè nan ninpòt sikonstans ou mete’m. Beni zyem pou’w ka wè frèm ak sèm yo nan menm lanmou ou gen pou mwen an e pou’m ka toujou sèvi yo nan padon ak sajès san logèy nan kèm. Beni kèm poum pa gen plas pou rayisans ak lapèn ladann. Edem lagem nan men’w plis. Konsa lapè, lafwa, lespwa, ak lajwa va simaye tout kote mwen pase e plis moun va konnen’w e chante lwanj ou. Nan non Jezi mwen priye’w, Amen.
Benediksyon : « Mwen mande Bondye ki bay espwa a pou’ l fè kè [ou]* kontan nèt, pou’ l fè kè [ou]* poze ak konfyans [ou]* gen nan li a. Se konsa espwa [ou] va toujou ap grandi ak pouvwa Sentespri a. » Women 15 :13
[ ] ak * vle di mo tankou ‘nou’ tanje pou ‘mwen’ pou devosyon an. Vèsè yo soti nan vèsyon HCV ak HAT 98
« Ou menm, Bondye, w’ap ba yo kè poze ! Moun ki toujou kenbe pwomès yo, wi, w’ap ba yo kè poze, paske yo mete konfyans yo nan ou ! » Ezayi 26 :3
Li pa toujou fasil pou asksepte ke idantite’w nan Bondye se lapè se poutèt sa Bondye vle restore lapè ou pou’w ka grandi nan li. Li pwomèt ou lapè tout kote’w ye e pwomès li pi asire ke lè’w gen lajan sere! (Levitik 26 :6 ; Sòm 37 :11).
Paske ou gen konfyans nan Bondye e aksepte lanmou infini li gen pou a, Ou se yon mounn apa! Tristès ak inkietid pa dwe domine’w chak jou ankò. Pran otorite sou pwoblèm w’ap andira chak jou paske Jezi vle chanje yo e ba’w lapè! ( Jan 16:33)
Lè’w konnen idantite’w se lapè nan Bondye, mande li bon konprann pou’w ka rive nan yon lòt nivo ak li e viv nan viktwa li chak jou. Konsa lajwa ak lagwa Bondye va briye nan lavi’w pi plis !
Lapè jwi nan fè sa ki byen e kenbe tout pwomès Bondye gen pou yo nan lapriyè. Tankou pou’w ka jwi lapè sa, gen bagay pratik Bib la raple kòm pa chaje moun kont san rezon (Pwovèb 20 :3) epi mande Bondye bon konprann pou nou ka fè sa ki dwat devan je’l menm la sa difisil pou nou. Jak 3 :17 di « moun ki gen bon konprann ki soti nan Bondye a ap fè volonte Bondye, l’ap viv byen ak tout moun, l’ap respekte tout moun, l’ap tande rezon, l’ap gen kè sansib, l’ap fè anpil anpil byen, li pa nan de fas ni nan ipokrit. »
Lapè ak bon konprann nesesè pou youn ka egziste. Pwovèb 3 :13-18 di, « Ala bon sa bon pou moun ki gen konesans, pou moun ki rive gen bon konprann ! Benefis l’ap rapòte pi bon pase sa lajan bay. Avantaj l’ap bay gen plis valè pase lò. Sajès pi bon pase boul lò. Nanpwen anyen moun ta renmen genyen ki ka parèt devan li.
Ou pa janm twò lwen Bondye ni nan yon sitiyazyon ki twò dezespere pou Bondye pote chanjman ak lapè. Li sèlman mande’w pou fèl konfyans e l’ap restore lapè’w (Sòm 55 :18).
Yon bò, bon konprann ap fè moun viv lontan. Yon lòt bò, l’ap bay richès, l’ap fè moun respekte ou. L’ap fè moun viv ak kè kontan. L’ap fè ou reyisi nan tou sa w’ap fè. Moun ki gen bon konprann jwenn lavi. Sa bon nèt pou moun ki gen bon konprann ! »
Pou restorasyon sa ka konplè Bondye e pou ou ka viv nan otorite li ban ou an jou, Ezayi 53 :5 raple nou gwo sakrifis Jezikri te fè sou kwa a. Paske Bondye damou’w san resèv li te vinn sakrifye tèt li nan pèsòn Jezikri kòm yon demonstrasyon de jan lap fou pou ou e li vle ke’w mete tout konfyans ou nan li konsa wa gen lapè. Ezayi 53:5 di ” Men, se pou peche nou kifè yo te mete san’l deyò konsa. Se akòz mechanste nou kifè yo te kraze’ l anba kou konsa. Chatiman ki te pou nou an se sou li li tonbe. Se konsa li ban nou kè poze. Avèk tout kou li te resevwa yo, li ban nou gerizon.”
Bondye vle ba’w lapè pa restore bon konprann nan kè’w kote ki beswen santi lanmou pi plis, eske’w vle ba’l pèmisyon pou sa jodia ?
2 nan Pwomès Bondye pou ou jodia :
Jan 14 :27 « M’ap ban [ou] kè poze. M’ap fè kè nou poze nan jan pa mwen. Mwen p’ap fè li pou [ou] jan sa fèt dapre prensip ki nan lemonn. Pa kite anyen toumante tèt nou, nou pa bezwen pè. »
Ezayi 54 :10 « Ou te mèt wè mòn yo ap souke, ti mòn yo ap tranble, mwen p’ap janm sispann renmen ou. M’ap toujou kenbe kontra mwen te pase pou’m te toujou byen avè ou la. Se Senyè ki renmen ou lan ki di ou sa. »
Ann Lapriyè : Senyè mwen di’w mèsi paske ou pa janm mande’m fè yon bagay san ou pa montre’m kijan. Mèsi paske ou renmen ak yon lanmou san mezi e ou vle restore tout sa ki pèdi nan mwen e ou pa janm two lwen pou tande lèm rele’w. Mwen remèt tout inkietid mwen yo nan mwen m e mwen mande’ w padon pou tout fwa nan doute de bonte ou e bliye pwomès lapè ou gen pou kèm ak lavi chak mounn ki kwè nan ou. Tanpri banm plis bon konprann poum ka viv nan lapè sa mwen gen nan ou. Edem viv pi prew chak jou nan non Jezi, Amen.
Benediksyon : « Mwen mande Seyè a ki konn bay kè poze, pou li fè kè [ou]* poze tout tan, tout jan, pou li toujou la avèk nou tout. » 2 Tes 3 :16
« Mwen mande pou li gen pitye pou nou, pou li ban nou kè poze ak renmen an kantite. » Jid 1 :2
* adapte pou devosyon an. Vèsè yo soti nan vèsyon HAT 98.
Bondye ka ede’w viv na lapè chak jou. Kontinye fèl konfyans!
« Gouvènman Bondye ki wa a, se pa yon afè manje ak bwè, men se yon keksyon fè sa ki byen, viv ak kè poze ak kè kontan. Bagay sa yo, se Sentespri ki bay yo.Moun k’ap sèvi Kris la konsa, se yo ki fè Bondye plezi. Tout moun ap dakò ak sa. Se sak fè, ann toujou chache bagay ki kapab ede nou viv ak kè poze, bagay ki pou penmèt nou yonn soutni lòt nan konfyans nou nan Bondye. » Women 14 :17-19
Lè w’ap fè jounal oswa w’ap gade jan sitiyasyon nan lavi konn mete do’w nan poto, ou ka poze tèt ou kesyon kote mounn ap janm jwenn lapè sa a ? Pri manje ak monte, lavi sanble ap vinn pi chè chak jou, timoun ak granmoun ap tonbe malad, dè fwa ou santi ou pa gen ni rele ni reponn,… kijan poum jwenn lapè ?
Kijan w’ap ka viv nan lapè lè
insekirite ap ogmante tout kote, manifestasyon ak barikad patou, timoun paka al
lekol, soufrans nan fason emosyonel, finansyèl ap detwi relasyon younn ak lòt
pandan grangou li menm ap fè banbòch nan anpil zòn, e pwoblèm ap monte pil sou
pil ? Ou ka dekouraje menm defwa e panse, petèt Bondye te ekri bagay sa yo
pou mounn tan lontan paske kounyea bagay yo rèd…. Eske se pa vre ? Dim
non, ou pa janm panse konsa?
Si n’ap onèt ak lòt, nap di wi e
menm si ou pa ta dakò, gen bon nouvèl pou ou jodia Lapè oswa kè poze se eritaj ou
nan Bondye !
Lapè se idantite’w paske ou gen konfyans nan Bondye. Nan Women 5 :1 nou li « Koulye a, paske nou gen konfyans nan Bondye, Bondye fè nou gras, n’ap viv san kè sote ak Bondye, gremesi Jezikri, Senyè nou an. »
Kè poze se pou ou paske Bondye pa yon Bondye briganday, konfisyon, ak mechanste (1 Korintyen 14 :33) e ou fèt nan imaj li (tcheke orijin idantite’w pou plis detay ) .
Bondye beni chak pitit li ak lapè, Sòm 29 :11 « Senyè a va bay pèp li a fòs, l’a beni yo, l’a ba yo kè poze » e Jezi li menm ki se sovè chak mounn ki kwè na li, se prins lapè (Ezayi 9 :6).
Jezi se lapèw (Efesyen 2 :14) e pwomès li asire (Sòm 85 :8).
Ou se lapè paske Jezikri etabli lapè pou ou (Ezayi 26 :12).
Ou gen lapè ak Bondye lèw mete lafwa’w ak Jezi (Woman 5 :1)
Pa kite anyen volè lajwa ak lapè’w. « Lè ou kite egzijans kò a pran tèt ou [tankou inkietid, tristès, move lide, sansation kò’w pou fè bagay nan ninpòt move kondisyon, move langaj k’ap derespekte tèt ou ak lòt moun, epi abitid ki ka fèw byen pou yon moman men k’ap detwi nanm ou ak kòw] *, se mouri w’ap mouri. Men, lè ou kite egzijans Lespri, a pran tèt ou [tankou lanmou, lafwa (konfyans nan Bondye), lajwa, konwòl tèt ou ak sajès] *, se viv w’ap viv ak kè poze. » Women 8 :6
Bondye tèlman vle ou gen lapè, nan ti lèt damou kite pou ou li baw anpil ti sekrè nan kijan pou ou gen sa lapè sa. Tankou nan Matye 11 :28-30 li di «. Matye 11 :28-30, « Vini jwenn mwen, nou tout ki bouke, nou tout ki anba chay, m’a soulaje nou. Pran jouk mwen, mete’ l sou zepòl nou. Pran leson nan men mwen.Paske mwen dou, mwen toujou soumèt mwen tout bon devan Bondye. Konsa, n’a viv ak kè poze. Paske, jouk m’ap ban nou an fasil pou pote, chay m’ap ban nou an pa lou. »
Epi nan Jan 16 :33 li di, « Mwen pale konsa pou [ou]* kapab gen kè poze nan mwen. [Ou] gen pou’ n soufri anpil sou latè. Men, pran kouraj, lemonn deja pèdi devan mwen. »
Menm jan Pòl te di nan Filipyen 4 :6-7 : « Pa
bay kò [ou]* traka pou anyen. Men, nan tout sikonstans mande Bondye tou sa [ou]*
bezwen nan lapriyè. Toujou chonje di’l mèsi tou lè [w]’ap lapriyè. Konsa, Bondye va ban nou kè poze nan
jan pa l’, bagay lèzòm pa ka konprann ; la kenbe kè [ou] ak lespri [ou] fèm nan Jezikri. » Konsa wa va
gen lapè nan tout sikonstans ak tout kote’w pase.
Paske ou se lapè sekirite ak somèy ou asire nan Bondye (Sòm 4 :8)!
Benediksyon : « M’ap mande Bondye ki bay kè poze a pou’ l fè nou favè sa a, pou nou fè tou sa ki byen, pou’ n kapab fè volonte li. M’ap mande’ l tou pou’ l fè travay ki fè’ l plezi nan nou, gremesi Jezikri. Tout lwanj lan pou Jezikri pou tout tan tout tan. Amèn. » (Ebre 13 :21)
« Men, tout moun ki mete konfyans yo nan ou, fè kè yo kontan. Se pou yo chante san rete tèlman yo kontan. W’ap pwoteje moun ki renmen ou. Ou fè yo chante pou ou tèlman yo kontan. » Sòm 5 : 1.1
Ou se lajwa e Bondye se sous lajwa ki tou pi a paske li bay moun ki fè’l plezi bon konprann, konesans ak kè kontan (Eklesyas 2 :26).
Sous lajwa nan Bondye soti nan pawòl li ( 1 Jan 1 :4) e se kontantman sa ki ba nou fòs ak kouray pou lite chak jou (Neemi 8 :10).
Li demontre sous lajwa pou nou lè
li te vinn mouri sou lakwa pou rekonsilye nou avèk tèt li e sove nou (Jan
3 :16).
Menm jan Pòl te raple nou, « Se pou nou toujou kontan nan lavi n’ap mennen ansanm nan Seyè a. M’ap repete’l ankò: Fè kè nou kontan anpil. » Filipyen 4 :4
Lajwa anpil nan nou kondisyonèl. Eske’w pa janm gen panse sa yo ? Nou
ka di « Lè’m gen ti kòb kèm ap kontan oswa lè mwen marye, lè mwen gen
yon lòt kay, lèm gen yon lòt travay, lè gen lasante, lè kèm geri etc ma gen kontantman. »
Tout sa yo pa soti nan Bondye ki se sous lajwa.
Lajwa ki soti nan Bondye a pa
depann de sikonstans paske Bondye mande mande nou pou’n rejwi nan tout
sikontans (1 Tes 5 :6). An tan ke eritye Bondye, li ban nou komand pou nou
toujou nan lajwa. Sa vle di pou nou kenbe pwomès li yo nan kèn e fèl konfyans. Kòmand poun gen lajwa nesesè pou’n ka kontinye
grandi nan lafwa.
Gen kè kontan tout tan nan Bondye
pa vle di fè sanblan ke n byen ni bay tèt nou manti paske Bondye wè tout kèn. Konsa
tou gen lajwa nan tout sikonstans pa vle di aksepte ninpòt sitiyasyon san ou pa
fè efò pou chanjman.
Non, kè kontan nan Bondye vle di fèl konfyans ak kèn. Menm lè dlo ta koule
nan jen n’ap toujou obeyi’l e fè sa’l di’n fè paske nou konnen li renmen’n ak
yon lanmou ki san parèy.
Figi’n ak kè’n pa dwe make mizè
chak jou. Bondye genyen viktwa pou nou deja !
Menm jan ak Jòb, ann toujou ba li
glwa menm lè nou pa wè ni devan ni dèyè. Menm lè nou ta fè tout sa ou konnen
poum fè pou yon sitiyasyon ka chanje e nou poko wè resilta. (Jòb 5 :17)
Kite kè’w rejwi nan Bondye e
asire lajwa’w nan paske nan li se lajwa nèt al kole !
Ann Lapriyè :
Senyè mèsi paske se ou ki sous lajwa mwen e ou banm pawòl ou poum ka kenbe fèm chak jou pa pouvwa Lesentespri ki abite nan mwen. Men jan ak Mari nan Lik 1 :46-50 « Nanm mwen ap chante pou Mèt la ki gen pouvwa.
Lespri’m pran plezi nan Bondye ki delivrans mwen. Paske li voye je’l sou mwen, yon sèvant ki soumèt devan li. Wi, depi koulye a, epi pou tout tan, tout moun pral di: Ou se yon [fanm/ gason]* Bondye beni! Paske Bondye ki gen tout pouvwa a fè anpil bèl bagay pou mwen. Non li, se yon non pou tout moun respekte. L’ap toujou gen pitye pou tout moun ki gen krentif pou li. » Mèsi pou sa. Amen.
“Kè kontan bay lasante. Men, lè ou kagou, w’ap deperi sou pye”. Pwovèb 17:22, HAT98
Lajwa se youn nan charaktè ki ka parèt pi difisil pou nou aksepte men se verite.
Menm lè ou fè Bondye konfyans e ou renmenl, gen de fwa w’ap santi’w ba e ou pa ka menm jwenn mo pou’w exprime’w. Lavi gen yon jan li baw cho, ou santi tristès ak dlo nan je ta vle yo de pi bon zanmi w. Se komsi yon jou ou wo epi lòt la ou santi’w ba. M pa konn pou ou men dè fwa se goumen map goumen pou mete yon pye devan epi lòt la deyè.
M sonje yon jou m te empas sa epi mwen mande yonn nan sè nan lafwa mwen yo ke m pat abitye avèl pou priye pou mwen. Sa ki makem plis nan jou sa se pandan l’ap lapriyè ak vwa poum tande li fè yon pòz epi li di ” M pa konn bi priyè prinsipal ou men nan Bondye ou se lajwa!” Lè li dim sa gen yon bagay nan mwen m santi ki transfòme. M te etone e mwen ale verifye nan Bib la si se verite.
Jou sa mwen te ranpli ak plis konfyans paske non sèlman sèm nan Kris sa pat konnen ke m te fèt ap mande Bondye retire tristès nan kèm men m te mandel pou revele idantitem nan li pou jou sa!
Mwen konnen li tande priyè e se avèk tout asirans m’ap ankouraje’w pale ak li de ninpòt sa kap sakaje lespri’w.
Menm jan Bondye te itilize sè sa poul te raple ke nan li mwen se lajwa, konsa tou jodia Bondye ap pase men sou braw nan yon kalin souple epi li souleve tèt ou jantiman pou jew ka kapte nan je pal ki ranpli ak lanmou pou ou epi li di’w: ” Ou se zantray mwen. Nan pawòl mwen gen tout sa ou bezwen (Sòm 34:10). Pwoche pi prem. Dim tout ti koze’w kèw. Onèt ak mwen pouw ka gen lajwa nan tout sikonstans jan mwen te pwomèt you a (1 Tes 5:16-18).
Lapèn ak tristès pa eritaj ou. Mwen pat batize nan ji citron, jèw pa dwe koule dlo souvan konsa. Siye dlo nan jèw, fè kè’w kontan paske Se ak Lesentespri pam ki gen lanmou, lespwa, lafwa, otorite, mwen kreyew e ranpli’w (Lik 11:14). Ou se lajwa!
Ou se lajwa pa’m chak sekònd e mwen toujou pi fò ke ninpòt sa w’ap travase. Fèm konfyans. Mwen vle ale pi lwen avew. Ou se lajwa tout mounn ki nan fènwa e lajwa mwen ba ou pa depann de sikonstans paske nan mwen ou se viktwa tou. Pa gen mounn ki gen viktwa san lajwa. Eske w ka banm pèmisyon pou’m abite nan kèw pi plis?”
Ann Lapriyè: Senyè padon paske reaksyon’m fas a la vi pa toujou reflekte lajwa mwen ye e mwen genyen nan ou. Mèsi paske ou pa janm abandome’m e ou toujou banm fòs poum kontinye. Se ou ki sous tout kè kontan e mwen mande’w pou ranplim plis ak Sentespri ou pou lajwa m kapab donen nan ou. Fè plis satisfè ak lavi ou ban mwen. Edem chanje sam dwe e ka chanje poum grandi pi plis paske m pap ka vanse e gen yon lajwa kontinyèl san ou. Nan non Jezikri mwen priye’w. Amen.
“Kisa n’a di ankò sou pwen sa a? Si Bondye pou nou, kilès ki ka kont nou?” (Women 8:31)
Bondye pou ou e pa gen okènn fòs fè nwa ki ka kontre kare avè’w lè ou kenbe fèm nan lapriyè!
Anpil moun pèdi nwit nan chache stateji pou yo ka gen viktwa e ou plan lavi yo reyisi. Pawòl Bondye ankouraje nou pou nou fè pridans nan tout desisyon n’ap pran men tou pou nou toujou sonje ke viktwa se nan Bondye sèl sa soti. Men Pwovèb di ” Moun pare chwal pou y’ al fè lagè, men se Senyè a k’ap deside kilès k’ap genyen batay la.” (Pwovèb 21:31)
Ou se viktwa paske ou fè Bondye konfyans e li ba ou otorite sou tout latè (Lik 10:19).
Viktwa se ou “Paske, depi se pitit Bondye ou ye, ou kapab genyen batay la sou lemonn. Men ki jan nou fè genyen batay la sou lemonn, se paske nou gen konfyans nan Bondye. Ki moun ki ka genyen batay la sou lemonn? Se sèlman moun ki kwè Jezi se pitit Bondye” ( 1 Jan 5:4-5).
Viktwa’w nan Bondye sou ninpòt sikontans lavi tèlman asire, li menm ba ou viktwa sou lanmò ak pwomès lavi etènèl paske idantite’w ak konfyans ou nan li!! (Jan 3:16)
Se gwo koze wi pam!! Poutèt sa, “ann di Bondye mèsi, li menm ki fè nou genyen batay la sou lanmò gremesi Jezikri, Senyè nou an!” (1 Korent 15:57)
Menm Bondye ki te leve Jezikri nan lanmò a pou demontre lanmou infini li pou ou vle resisite tout sa lenmi nan ou te vle detwi nan ou e fè’w dekouraje.
Bondye vle restore rèv ou yo, talan ou yo, sante’w, relasyon nan fanmi’w ak zanmitay ou ye. Li vle antre plis nan kè’w e fotifye nann ou ak lespri’w pou’w ka ede lòt mounn viv nan lanmou li gen pou to. Pou yo ka konnen ke yo menm tou ou se viktwa e yo pa bezwen viv yon vi ki base sou echèk ak desepsyon.
Frèm ak Sèm, Bondye tande tout priyè ou yo e li vle’w konprann ke paske ou se pitit li ou pap goumen pou viktwa- ou genyenl deja men w’ap goumen pou viktwa sa briye tout kote’w pase paske li fè pati ADN ou.
Jezikri ve li ba ou yon avni and idantite tout nèf chak jou ki anrasine nan viktwa ki soti nan li. Tout sa li mande’w se pase ti tan avèl nan lapriyè e fè li konfyans. Nan pawòl li yo li aprann ou ke ou se lanmou, ou se lafwa, ou se lespwa, ou se otorite… kote 4 karaktè sa yo ye ankre nan ou, ou pa ka pa wè mirak nan viw ak nan enviwònman ou yo paske mirak se yon manifestasyon viktwa nan Bondye.
Jodia li vle’ raple’w ke idantite’w se viktwa tou paske li menm li pa janm pedi pose. Menm lan li ba’w otorite sou tout move panse ak sikontans lavi, konsa tou li ba’w viktwa sou yo tou pou ka jwi bèl pwomès li yo pou ou! Menm lè sikonstans yo ta parèt nwa, viktwa se pou ou tout kote’w pase fanm ak gason vanyan nan Jezikris!
Meditasyon/Refleksyon: Fèmen jè’w, detann zepòl ou yo, imajine lavi ou paske ou se viktwa e ou kite Lesentespri dirije’w ban tout sa w’ap fè chak jou. Ki chanjman ou wè nan ou ak anviwòman’w? Eske ou kwè ke Bondye baw viktwa vre e chanjman sa yo sa fèt? (Ou ka pataje repòns ou yo ak nou si ou kite yon komantè oswa ekri yo nan yon ti papye, pataje yo ak Bondye priyè w si ou santiw gen dout e jwenn yon zanmi ki kwè nan Bondye pou pataje yo tou pou yonn ka priye pou lòt sou sa.)
Benediksyon:” Senyè ki gen tout pouvwa a pral pwoteje pèp li a [avék mwen]*. [Nou] pral kraze zam lènmi yo anba pye [nou]. Pandan batay la, [nou] pral rele tankou moun sou. [Nou] pral fè san lènmi yo koule. Li pral koule tankou san bèt yo touye sou lotèl yo.
Jou sa a, Senyè a, Bondye [nou] a, va delivre [nou]. Tankou yon bon gadò, l’ap sove bann mouton l’ yo. [Nou] pral klere nan peyi li a tankou bèl pyè nan yon kouwòn.
Ala bon sa pral bon nan peyi a! Ala bèl peyi a pral bèl! Jenn gason ak jenn fi pral grandi ak tout grenn jaden ak tout diven yo pral rekòlte nan peyi a.”(Zakari 9:15-17) Mèsi Senyè pou pwomès sa yo e viktwa’m ki asire nan ou paske mwen se pitit ou, mwen kwè nan ou, e ou pa janm pèdi batay! Amen. Alleluia!!!! Glwa pou ou papa mwen!!!
Devosyon an Kreyòl vle ta vle ofri’w tout adorasyon yo an Kreyòl men nou pa toujou jwenn sa men nou swete nanm ou beni ak adorasyon jodia tou. Nou ankouraje atis evanjelik yo kontinye chante plis an Kreyol tou pou nou fè plis mounn konnen bèl viktwa sa! Mèsi pou tout bèl travay n’ap fè e talan nou mete apa pou ede nou tout bay Bondye glwa. #ou se viktwa
