Archives par mot-clé : lanmou

Idantite’w nan Bondye : Ou se lapè

Idantite, , ,

 « Gouvènman Bondye ki wa a, se pa yon afè manje ak bwè, men se yon keksyon fè sa ki byen, viv ak kè poze ak kè kontan. Bagay sa yo, se Sentespri ki bay yo.Moun k’ap sèvi Kris la konsa, se yo ki fè Bondye plezi. Tout moun ap dakò ak sa. Se sak fè, ann toujou chache bagay ki kapab ede nou viv ak kè poze, bagay ki pou penmèt nou yonn soutni lòt nan konfyans nou nan Bondye. » Women 14 :17-19

Lè w’ap fè jounal oswa w’ap gade jan sitiyasyon nan lavi konn mete do’w nan poto, ou ka poze tèt ou kesyon kote mounn ap janm jwenn lapè sa a ? Pri manje ak monte, lavi sanble ap vinn pi chè chak jou, timoun ak granmoun ap tonbe malad, dè fwa ou santi ou pa gen ni rele ni reponn,… kijan poum jwenn lapè ?

Kijan w’ap ka viv nan lapè lè insekirite ap ogmante tout kote, manifestasyon ak barikad patou, timoun paka al lekol, soufrans nan fason emosyonel, finansyèl ap detwi relasyon younn ak lòt pandan grangou li menm ap fè banbòch nan anpil zòn, e pwoblèm ap monte pil sou pil ? Ou ka dekouraje menm defwa e panse, petèt Bondye te ekri bagay sa yo pou mounn tan lontan paske kounyea bagay yo rèd…. Eske se pa vre ? Dim non, ou pa janm panse konsa?

Si n’ap onèt ak lòt, nap di wi e menm si ou pa ta dakò, gen bon nouvèl pou ou jodia Lapè oswa kè poze se eritaj ou nan Bondye !

Lapè se idantite’w paske ou gen konfyans nan Bondye. Nan Women 5 :1 nou li « Koulye a, paske nou gen konfyans nan Bondye, Bondye fè nou gras, n’ap viv san kè sote ak Bondye, gremesi Jezikri, Senyè nou an. »

Kè poze se pou ou paske Bondye pa yon Bondye briganday, konfisyon, ak mechanste (1 Korintyen 14 :33) e ou fèt nan imaj li (tcheke orijin idantite’w pou plis detay ) .

Bondye beni chak pitit li ak lapè, Sòm 29 :11 « Senyè a va bay pèp li a fòs, l’a beni yo, l’a ba yo kè poze » e Jezi li menm ki se sovè chak mounn ki kwè na li,
se prins lapè (Ezayi 9 :6).

Jezi se lapèw (Efesyen 2 :14) e pwomès li asire (Sòm 85 :8).

Ou se lapè paske Jezikri etabli lapè pou ou (Ezayi 26 :12).

 Ou gen lapè ak Bondye lèw mete lafwa’w ak Jezi (Woman 5 :1)

Pa kite anyen volè lajwa ak lapè’w. « Lè ou kite egzijans kò a pran tèt ou [tankou inkietid, tristès, move lide, sansation kò’w pou fè bagay nan ninpòt move kondisyon, move langaj k’ap derespekte tèt ou ak lòt moun, epi abitid ki ka fèw byen pou yon moman men k’ap detwi nanm ou ak kòw] *, se mouri w’ap mouri. Men, lè ou kite egzijans Lespri, a pran tèt ou [tankou lanmou, lafwa (konfyans nan Bondye), lajwa, konwòl tèt ou ak sajès] *, se viv w’ap viv ak kè poze. » Women 8 :6

Bondye tèlman vle ou gen lapè, nan ti lèt damou kite pou ou li baw anpil ti sekrè nan kijan pou ou gen sa lapè sa. Tankou nan Matye 11 :28-30 li di «. Matye 11 :28-30, « Vini jwenn mwen, nou tout ki bouke, nou tout ki anba chay, m’a soulaje nou. Pran jouk mwen, mete’ l sou zepòl nou. Pran leson nan men mwen. Paske mwen dou, mwen toujou soumèt mwen tout bon devan Bondye. Konsa, n’a viv ak kè poze. Paske, jouk m’ap ban nou an fasil pou pote, chay m’ap ban nou an pa lou. »

Epi nan Jan 16 :33 li di, « Mwen pale konsa pou [ou]* kapab gen kè poze nan mwen. [Ou] gen pou’ n soufri anpil sou latè. Men, pran kouraj, lemonn deja pèdi devan mwen. »

Menm jan Pòl te di nan Filipyen 4 :6-7 : « Pa bay kò [ou]* traka pou anyen. Men, nan tout sikonstans mande Bondye tou sa [ou]* bezwen nan lapriyè. Toujou chonje di’l mèsi tou lè [w]’ap lapriyè.  Konsa, Bondye va ban nou kè poze nan jan pa l’, bagay lèzòm pa ka konprann ; la kenbe kè [ou] ak lespri [ou] fèm nan Jezikri. » Konsa wa va gen lapè nan tout sikonstans ak tout kote’w pase.

Paske ou se lapè sekirite ak somèy ou asire nan Bondye (Sòm 4 :8)!

Benediksyon : « M’ap mande Bondye ki bay kè poze a pou’ l fè nou favè sa a, pou nou fè tou sa ki byen, pou’ n kapab fè volonte li. M’ap mande’ l tou pou’ l fè travay ki fè’ l plezi nan nou, gremesi Jezikri. Tout lwanj lan pou Jezikri pou tout tan tout tan. Amèn. » (Ebre 13 :21)

Bondye se fòs e se li ki sous lajwa tou

Idantite, , , ,

 « Men, tout moun ki mete konfyans yo nan ou, fè kè yo kontan. Se pou yo chante san rete tèlman yo kontan. W’ap pwoteje moun ki renmen ou. Ou fè yo chante pou ou tèlman yo kontan. » Sòm 5 : 1.1

Ou se lajwa e Bondye se sous lajwa ki tou pi a paske li bay moun ki fè’l plezi bon konprann, konesans ak kè kontan (Eklesyas 2 :26).

Sous lajwa nan Bondye soti nan pawòl li ( 1 Jan 1 :4) e se kontantman sa ki ba nou fòs ak kouray pou lite chak jou (Neemi 8 :10).

Li demontre sous lajwa pou nou lè li te vinn mouri sou lakwa pou rekonsilye nou avèk tèt li e sove nou (Jan 3 :16).

 Menm jan Pòl te raple nou, « Se pou nou toujou kontan nan lavi n’ap mennen ansanm nan Seyè a. M’ap repete’l ankò: Fè kè nou kontan anpil. » Filipyen 4 :4

Lajwa anpil nan nou kondisyonèl. Eske’w pa janm gen panse sa yo ? Nou ka di « Lè’m gen ti kòb kèm ap kontan oswa lè mwen marye, lè mwen gen yon lòt kay, lèm gen yon lòt travay, lè gen lasante, lè kèm geri etc ma gen kontantman. » Tout sa yo pa soti nan Bondye ki se sous lajwa.

Lajwa ki soti nan Bondye a pa depann de sikonstans paske Bondye mande mande nou pou’n rejwi nan tout sikontans (1 Tes 5 :6). An tan ke eritye Bondye, li ban nou komand pou nou toujou nan lajwa. Sa vle di pou nou kenbe pwomès li yo nan kèn e fèl konfyans.  Kòmand poun gen lajwa nesesè pou’n ka kontinye grandi nan lafwa.

Gen kè kontan tout tan nan Bondye pa vle di fè sanblan ke n byen ni bay tèt nou manti paske Bondye wè tout kèn. Konsa tou gen lajwa nan tout sikonstans pa vle di aksepte ninpòt sitiyasyon san ou pa fè efò pou chanjman.

Non, kè kontan nan Bondye vle di fèl konfyans ak kèn. Menm lè dlo ta koule nan jen n’ap toujou obeyi’l e fè sa’l di’n fè paske nou konnen li renmen’n ak yon lanmou ki san parèy.

Figi’n ak kè’n pa dwe make mizè chak jou. Bondye genyen viktwa pou nou deja !

Menm jan ak Jòb, ann toujou ba li glwa menm lè nou pa wè ni devan ni dèyè. Menm lè nou ta fè tout sa ou konnen poum fè pou yon sitiyasyon ka chanje e nou poko wè resilta. (Jòb 5 :17)

Kite kè’w rejwi nan Bondye e asire lajwa’w nan paske nan li se lajwa nèt al kole !

Ann Lapriyè :

Senyè mèsi paske se ou ki sous lajwa mwen e ou banm pawòl ou poum ka kenbe fèm chak jou pa pouvwa Lesentespri ki abite nan mwen. Men jan ak Mari nan Lik 1 :46-50 « Nanm mwen ap chante pou Mèt la ki gen pouvwa.

 Lespri’m pran plezi nan Bondye ki delivrans mwen. Paske li voye je’l sou mwen, yon sèvant ki soumèt devan li. Wi, depi koulye a, epi pou tout tan, tout moun pral di: Ou se yon [fanm/ gason]*  Bondye beni!  Paske Bondye ki gen tout pouvwa a fè anpil bèl bagay pou mwen. Non li, se yon non pou tout moun respekte. L’ap toujou gen pitye pou tout moun ki gen krentif pou li. » Mèsi pou sa. Amen.

*Adapte pou devosyon an

Idantite’w nan Bondye: Ou se lajwa!

Idantite, , , , ,

“Kè kontan bay lasante. Men, lè ou kagou, w’ap deperi sou pye”. Pwovèb 17:22, HAT98

Lajwa se youn nan charaktè ki ka parèt pi difisil pou nou aksepte men se verite.

Menm lè ou fè Bondye konfyans e ou renmenl, gen de fwa w’ap santi’w ba e ou pa ka menm jwenn mo pou’w exprime’w. Lavi gen yon jan li baw cho, ou santi tristès ak dlo nan je ta vle yo de pi bon zanmi w. Se komsi yon jou ou wo epi lòt la ou santi’w ba. M pa konn pou ou men dè fwa se goumen map goumen pou mete yon pye devan epi lòt la deyè.

M sonje yon jou m te empas sa epi mwen mande yonn nan sè nan lafwa mwen yo ke m pat abitye avèl pou priye pou mwen. Sa ki makem plis nan jou sa se pandan l’ap lapriyè ak vwa poum tande li fè yon pòz epi li di ” M pa konn bi priyè prinsipal ou men nan Bondye ou se lajwa!” Lè li dim sa gen yon bagay nan mwen m santi ki transfòme. M te etone e mwen ale verifye nan Bib la si se verite.

Jou sa mwen te ranpli ak plis konfyans paske non sèlman sèm nan Kris sa pat konnen ke m te fèt ap mande Bondye retire tristès nan kèm men m te mandel pou revele idantitem nan li pou jou sa!

Mwen konnen li tande priyè e se avèk tout asirans m’ap ankouraje’w pale ak li de ninpòt sa kap sakaje lespri’w.

Menm jan Bondye te itilize sè sa poul te raple ke nan li mwen se lajwa, konsa tou jodia Bondye ap pase men sou braw nan yon kalin souple epi li souleve tèt ou jantiman pou jew ka kapte nan je pal ki ranpli ak lanmou pou ou epi li di’w: ” Ou se zantray mwen. Nan pawòl mwen gen tout sa ou bezwen (Sòm 34:10). Pwoche pi prem. Dim tout ti koze’w kèw. Onèt ak mwen pouw ka gen lajwa nan tout sikonstans jan mwen te pwomèt you a (1 Tes 5:16-18).

Lapèn ak tristès pa eritaj ou. Mwen pat batize nan ji citron, jèw pa dwe koule dlo souvan konsa. Siye dlo nan jèw, fè kè’w kontan paske Se ak Lesentespri pam ki gen lanmou, lespwa, lafwa, otorite, mwen kreyew e ranpli’w (Lik 11:14). Ou se lajwa!

Ou se lajwa pa’m chak sekònd e mwen toujou pi fò ke ninpòt sa w’ap travase. Fèm konfyans. Mwen vle ale pi lwen avew. Ou se lajwa tout mounn ki nan fènwa e lajwa mwen ba ou pa depann de sikonstans paske nan mwen ou se viktwa tou. Pa gen mounn ki gen viktwa san lajwa. Eske w ka banm pèmisyon pou’m abite nan kèw pi plis?”

Ann Lapriyè: Senyè padon paske reaksyon’m fas a la vi pa toujou reflekte lajwa mwen ye e mwen genyen nan ou. Mèsi paske ou pa janm abandome’m e ou toujou banm fòs poum kontinye. Se ou ki sous tout kè kontan e mwen mande’w pou ranplim plis ak Sentespri ou pou lajwa m kapab donen nan ou. Fè plis satisfè ak lavi ou ban mwen. Edem chanje sam dwe e ka chanje poum grandi pi plis paske m pap ka vanse e gen yon lajwa kontinyèl san ou. Nan non Jezikri mwen priye’w. Amen.

Mwen ankouraje’w mediye sou Abakik 3:17-18

Idantite’w nan Bondye: Ou se Viktwa

Idantite, , , ,

“Kisa n’a di ankò sou pwen sa a? Si Bondye pou nou, kilès ki ka kont nou?” (Women 8:31)

Bondye pou ou e pa gen okènn fòs fè nwa ki ka kontre kare avè’w lè ou kenbe fèm nan lapriyè!

Anpil moun pèdi nwit nan chache stateji pou yo ka gen viktwa e ou plan lavi yo reyisi. Pawòl Bondye ankouraje nou pou nou fè pridans nan tout desisyon n’ap pran men tou pou nou toujou sonje ke viktwa se nan Bondye sèl sa soti. Men Pwovèb di ” Moun pare chwal pou y’ al fè lagè, men se Senyè a k’ap deside kilès k’ap genyen batay la.” (Pwovèb 21:31)

Ou se viktwa paske ou fè Bondye konfyans e li ba ou otorite sou tout latè (Lik 10:19).

Viktwa se ou “Paske, depi se pitit Bondye ou ye, ou kapab genyen batay la sou lemonn. Men ki jan nou fè genyen batay la sou lemonn, se paske nou gen konfyans nan Bondye. Ki moun ki ka genyen batay la sou lemonn? Se sèlman moun ki kwè Jezi se pitit Bondye” ( 1 Jan 5:4-5).

Viktwa’w nan Bondye sou ninpòt sikontans lavi tèlman asire, li menm ba ou viktwa sou lanmò ak pwomès lavi etènèl paske idantite’w ak konfyans ou nan li!! (Jan 3:16)

Se gwo koze wi pam!! Poutèt sa, “ann di Bondye mèsi, li menm ki fè nou genyen batay la sou lanmò gremesi Jezikri, Senyè nou an!” (1 Korent 15:57)

Menm Bondye ki te leve Jezikri nan lanmò a pou demontre lanmou infini li pou ou vle resisite tout sa lenmi nan ou te vle detwi nan ou e fè’w dekouraje.

Bondye vle restore rèv ou yo, talan ou yo, sante’w, relasyon nan fanmi’w ak zanmitay ou ye. Li vle antre plis nan kè’w e fotifye nann ou ak lespri’w pou’w ka ede lòt mounn viv nan lanmou li gen pou to. Pou yo ka konnen ke yo menm tou ou se viktwa e yo pa bezwen viv yon vi ki base sou echèk ak desepsyon.

Frèm ak Sèm, Bondye tande tout priyè ou yo e li vle’w konprann ke paske ou se pitit li ou pap goumen pou viktwa- ou genyenl deja men w’ap goumen pou viktwa sa briye tout kote’w pase paske li fè pati ADN ou.

Jezikri ve li ba ou yon avni and idantite tout nèf chak jou ki anrasine nan viktwa ki soti nan li. Tout sa li mande’w se pase ti tan avèl nan lapriyè e fè li konfyans. Nan pawòl li yo li aprann ou ke ou se lanmou, ou se lafwa, ou se lespwa, ou se otorite… kote 4 karaktè sa yo ye ankre nan ou, ou pa ka pa wè mirak nan viw ak nan enviwònman ou yo paske mirak se yon manifestasyon viktwa nan Bondye.

Jodia li vle’ raple’w ke idantite’w se viktwa tou paske li menm li pa janm pedi pose. Menm lan li ba’w otorite sou tout move panse ak sikontans lavi, konsa tou li ba’w viktwa sou yo tou pou ka jwi bèl pwomès li yo pou ou! Menm lè sikonstans yo ta parèt nwa, viktwa se pou ou tout kote’w pase fanm ak gason vanyan nan Jezikris!

Meditasyon/Refleksyon: Fèmen jè’w, detann zepòl ou yo, imajine lavi ou paske ou se viktwa e ou kite Lesentespri dirije’w ban tout sa w’ap fè chak jou. Ki chanjman ou wè nan ou ak anviwòman’w? Eske ou kwè ke Bondye baw viktwa vre e chanjman sa yo sa fèt? (Ou ka pataje repòns ou yo ak nou si ou kite yon komantè oswa ekri yo nan yon ti papye, pataje yo ak Bondye priyè w si ou santiw gen dout e jwenn yon zanmi ki kwè nan Bondye pou pataje yo tou pou yonn ka priye pou lòt sou sa.)

Benediksyon:”  Senyè ki gen tout pouvwa a pral pwoteje pèp li a [avék mwen]*. [Nou] pral kraze zam lènmi yo anba pye [nou]. Pandan batay la, [nou] pral rele tankou moun sou. [Nou] pral fè san lènmi yo koule. Li pral koule tankou san bèt yo touye sou lotèl yo.

Jou sa a, Senyè a, Bondye [nou] a, va delivre [nou]. Tankou yon bon gadò, l’ap sove bann mouton l’ yo. [Nou] pral klere nan peyi li a tankou bèl pyè nan yon kouwòn.

Ala bon sa pral bon nan peyi a! Ala bèl peyi a pral bèl! Jenn gason ak jenn fi pral grandi ak tout grenn jaden ak tout diven yo pral rekòlte nan peyi a.”(Zakari 9:15-17) Mèsi Senyè pou pwomès sa yo e viktwa’m ki asire nan ou paske mwen se pitit ou, mwen kwè nan ou, e ou pa janm pèdi batay! Amen. Alleluia!!!! Glwa pou ou papa mwen!!!

Devosyon an Kreyòl vle ta vle ofri’w tout adorasyon yo an Kreyòl men nou pa toujou jwenn sa men nou swete nanm ou beni ak adorasyon jodia tou. Nou ankouraje atis evanjelik yo kontinye chante plis an Kreyol tou pou nou fè plis mounn konnen bèl viktwa sa! Mèsi pou tout bèl travay n’ap fè e talan nou mete apa pou ede nou tout bay Bondye glwa. #ou se viktwa

Idantite’w nan Bondye : Ou se lafwa

Idantite, , , , , ,

Ou ka panse ke tit la se erè paske dabitid, li popilè pou’w tande « fòk ou gen lafwa ». Men lè ou vreman byen kalkile, si lafwa pa fè pati idantite’w ki soude nan Jezi ou pap ka genyen’l!

Tout sa ou pa genyen ou pa ka pwodi. Menm jan joumou paka donnen kalbas konsa tou ou pap ka gen lafwa si li pa fè pati de ou ki ap soti nan yon relasyon ak Bondye.

Kisa lafwa ye menm?

Lafwa se yon konfyans ki ankre nan nati Bondye ak bonte li pou ou*. Li se yon andirans ak konvisyon nan pouvwa, sajès, ak grandè Bondye sou tout bagay (lavi pèsonèl ou, fanmi ak dezi ou yo fè pati de ‘tout bagay’ yo tou). Ebre 11 :1 di « konfyans nan Bondye se yon konviksyon bagay nou pa ka wè ak je nou egziste tout bon vre. » (Ebre 11 :1)

Konfyans nou nan Bondye a pa chita sou bon konprann lèzòm, men sou pouvwa Bondye (1 Korent 2 :5).

Lalwa ak règ relijyon yon mou nap swiv paka fè Bondye pran plezi nan li (Galat 2 :15-16, Galat 3 :10-13). San lafwa li enposib pou’w gen yon relasyon sensè ak Bondye e pou fè li plezi (Ebre 11 :6).

Lafwa se yon asirans nan lanmou ak fiti Bondye gen pou ou paske Bondye pa renmen mounn ki gen de lide. Paske lafwa pa gen doutans e dout pa kè Bondye kontan « moun ki gen doutans, li tankou lanmè van ap boulvèse. Yon moun konsa pa beswen mete nan tèt li l’ap resevwa anyen nan men Senyè a. Se yon moun ki pa konn sa li le vle. Li toujou anbalan nan tout sa li antreprann » (Jak 1 :5-8)

Dout fè anpil mirak bloke. Nan Matye 17 :20 Jezi t’ap explike disip yo poukisa yo pat ka chase yon move lespri e li di yo « se paske nou manke konfyans nan Bondye. Sa m’ap di nou la a, se vre wi, : si nou te gen konfyans nan Bondye gwosè yon ti grenn moutad, nou ta di ti mòn sa a : wete kò ou la, al laba, li ta chanje plas. Pa gen anyen nou pa ta kapab fè. » (Ou ka wè menm diskou sa nan Lik 17 :6 ; Mak 11 :22-24)

Lèw pwoche Bondye fòw kwè ke li egziste e ke lap reponn tout mounn ki ap chache li ak tout kè yo (Ebre 11 :2). Se paske mounn lontan yo te gen anpil lafwa kifè Bondye te pran plezi e yo te jwenn anpil favè nan li. Si nou fè sa tou, n’ap wè mirak Bondye nan tout sa nou invite Sentespri ladann kit se nan  kè nou, fanmi nou, lekòl,  timounn nou yo, nan katye nou, ak an peyi nou paske li san limi!

Poukisa pou’w konnen ou gen lafwa ?

« Paske lè yon moun gen konfyans tout bon nan kèl, se lè sa a Bondye fèl gras. Lè yon moun deklare ak bouch li devan tout mou li gen konfyans nan Bondye, se lè sa a Bondye delivre li, apre sa ki ekri nan Liv la : Nenpòt moun ki mete konfyans yo nan li pap janm sòti wont » (Women 10 :10-11)

Kijan lafwa manifeste nan lavi’w?

Lèw gen lafwa ou fè sa ki byen paske nan peyi Bondye wa a se aksyon ki konte e pale anpil pa vle di anyen (1 Korent 4 :20). Paske « menm jan yon kò san nanm se yon kadav, konsa tou lafwa nan Bondye ki pa mache ak fè sa ki byen se yon lafwa ki mouri. » (Jak 2 :26). Ou travay di paske ou gen renmen nan kè’w e ou rete fèm nan espwa ou gen nan Jezikri Senyè ou an (1 Tes 1 :3)

Kijan lafwa fè pati idantite’w nan Jezikri ?

Konfyans nan Bondye se yonn nan karaktè nesesè k’ap ede’w dekouvri plis kiyès Bondye ye e kiyès ou ye tout bon vre.

Si ou kwè ke nan Bondye ou se lanmou e ou se lespwa. Kote’w ye fòk limyè klere la menm lè sitiyasyon lavi ta vle parèt difisil, eh byen konsa tou ou se lafwa paske lanmou ak lespwa paka demere san lafwa!

 Alò en tan ke fanm ak gason ki konn Bondye e aksepte Jezikri: « Toujou pran konfyans [ou]* gen nan Bondye a tankou yon defans ki va penmèt [ou] pare tout flèch Satan an ap voye tout limen sou [ou] » (Efesyen 6 :16)

 « Menmen batay pou lafwa ou byen. Kenbe lavi ki p’ap janm fini an fèm. Paske, se Bondye menm ki te rele ou pou ou te konnen lavi sa a » (1 Timote 6 :12)

Kote lòt mounn ap kilbite, ou ka kanpe dwat paske ou gen relasyon pèsonèl ak Jezi. Si ou kwè, wa wè pouvwa bondye! (Jan11 :40 ; Matye 21 :22)

Benediksyon : « Map mande Bondye pou li ba [mwen]*, dapre richès pouvwa li a, fòs ak kouray nan kè [mwen], pa mwaye pouvwa Sentespri a, pou [mwen] ka grandi nan karaktè [mwen], pou Kris la rete nan kè [mwen] ak konfyans [mwen] gen nan li a. M’ap mande Bondye pou [mwen] pouse rasin, pou [mwen] chita byen fèm nan renmen, pou [mwen] ka konprann, ansanm ak tout pèp Bondye a, jan renmen Kris la laj, jan li long, jan li fon, jan li wo [pou lafwa’m ka ogmante e pou’m viv yon vi san limit nan idantite pam ki se lafwa nan li] » (Adapte de Efezyen 3 :16-18).

* ‘nou’ modifye pou ‘ou’ obyen ‘mwen’ pou pèsonalize vèsè yo pou devosyon an.

Tout vèsè yo sòti nan vèsyon bib HAT 98

Sonje Kiyes ou ye! Ou se lanmou. Ou se lespwa. Ou Se LAFWA!

Idantite’w nan Bondye : Ou se lespwa

Idantite, , , , , ,

« Wi, poukisa mwen kagou konsa ? Poukisa m’ap plenn konsa nan kè mwen ? M’ap mete espwa’m nan Bondye, paske mwen gen pou m fè lwanj li ankò. Se li k’ap delivre’m, se li ki Bondye mwen. » (Sòm 42 :11)

Lè’w aksepte Jezikri nan lavi’w e ou konnen ou se lanmou, sa pa vle pwoblèm pap janm frape pòt kay ou ni ou pap janm santi’w dekouraje pafwa.

 Gen sikonstans nan lavi ki ka fèw bite e manke lafwa. Menm jan ak David nan Sòm 42 :11 lan ak Jòb ou ka di « « kote ki gen espwa pou mwen ankò ? Ki moun ki wè yon bon lavi pou mwen ankò ? » (Jòb 17 :15)

Men youn nan pi gwo avantaj ou genyen lè idantite’w asire nan Bondye ou pap janm pèdi batay paske li gen pouvwa pou’l fè tout bagay !

 Nan chak nivo nan relasyon ou ye ak Jezikri, li revele’w yon charaktè nouvo ki nan ou pou lafwa ou grandi. Lè’w byen asire nan lanmou san kondisyon li gen pou ou alò ou vinn fèl konfyans ak tout kè’w. Lè’w fè sa, ou se espwa ! (Matye 5 :13-16)

Jan la ekri a : « Moun ki fè kè li kontan, se moun ki gen krentif pou li, se moun ki mete tout espwa yo nan li, paske yo konnen li renmen yo » (Sòm 147 :11)

Kisa ki espwa ye vre ?

                   Pi gwo Espwa yon moun ki kwè nan Jezikri se lavi etènèl e pou nou gen pou nou patisipe nan bèl pouvwa Bondye yo (Tit 3 :7-8 ; Kolosyen 1 :27).

Yon bagay tout richès nan mònd la pa ka achte men yon relasyon ak Jezikri ba ou gratis ! Men tou espwa se yon asirans de yon demen miyò nan lavi kotidyen ak asirans ke sitiasyon lavi ou ap chanje ak pouvwa Sentespri ki abite nan ou lè Jezi se sovè’w.

Kòman pou’w fè gen espwa sitou lè lavi ap baw anpil defi ?

Fè Bondye konfyans !

Ebre 11 :1 di : » Lè yon moun di li gen konfyans Bondye, sa vle di li sèten li gen pou li resevwa sa l’ap tann lan. Li gen konviksyon bagay nou pa wè ak je nou, yo egziste tout bon vre. » e se sa ki espwa a ! (vèsyon HAT 98)

Se nan Senyè a pou’w mete tout espwa’w paske se sèl li ki ka ba’w kè pose. (Sòm 33 :18 ; Lamatasyon 3 :24)

« Espwa sa se tankou yon lank batiman li ye pou [ou]*. L’ap kenbe nanm [ou]* fèm, byen solid. » (Ebre 6 :19)

« Espwa sa pap janm twompe nou paske Bondye te fè nou wè janl renmen nou lè li nan nou Sentespri li » Women 5 :2-5

Kijan espwa fè pati de idantite’w ?

Ou se espwa paske :

  • Ou fè Bondye konfyans. « Moun ki gen krentif pou Granmèt la pap è anyen. Yo p’ap tranble paske se Bondye ki espwa yo » (Chirasid 34 :14) e Senyè a kenbe pwomès li (Ebre 10 :23)
  • Ou gen lavi. Eklezyas 9 :4 di « men, toutotan yon moun vival toujou gen espwa pou li. Yo chen vivan miyò pase yon lyon mouri »
  • Lavni ou sèten nan Bondye e ak li ou pap janm tann pou granmesi (Jeremi 29 :11 ; Jeremi 31 :17 ; Pwovèb 23 :18)
  • Ou se sèl tè a !  Ou ajoute kè poze, jwa (gou) ak renmen nan lavi (Matye 5 :13-16)
  • Ou pote limye tout kote’w pase paske ou idantifye’w ak Jezikri (Jan 8 :12 ; Jan 1 :9 ; Jan 9 :5 ; Efesyen 5 :9 ; Lik 11 :36).
  • Bondye nan ou e nan nati li li se espwa ! (1 Pyè 1 :16)
  • Bondye chwazi’w pou viv a pa pou li (1 Tesalonysyen 1 :4)
  • Bondye ki kreye ou gen anpil lacharite lakay li e « lacharite pèmèt sipote tout bagay. Anyen pa brannen konfyans li. Lacharite pa pèdi espwa, l’ap toujou moutre pasyans li » (1 Korent 13 :7).

Espwa fè’w chèlbè e souri ou reflekte lanmou ak asirans ou genyen nan Bondye (e ki toujou disponib pou ou si’w poko kwè nan Jezi) ! Pa dekouraje. Nan Jezi Ou gen gwo sinyati dèyè non’w….

Defi ou pou jodia: Si ou kwè idantite’w ou se lanmou ak espwa nan Jezi, poste yon foto tèt ou Jodia Ekri non’w epi pa bliye ekri Lanmou ak Espwa deyèl kom sinyati ou!

Gwo koze ! Se pa ninpòt ti move van kap soufle ki ka fè’w pè kounyea.

Kontinye travay di pou Jezi, fè Bondye konfyans ak rèv ou yo, fanmi ou ak tout sa ki chè pou ou. Pase ti tan avèl nan lapriyè. Li pap fèw wont !!!

 Fè enmi nanm ou an konnen non sèlman ou gen espwa nan Bondye men depi Sentespri te finn ranpli’w ou se espwa !

 Pa bliye ankouraje yon lòt moun jodia pou ba yo espwa nan Jezi !

Benediksyon : « Mwen mande Bondye ki bay espwa a pou l fè kè [ou]* kontan nèt, pou l fè kè [ou]* poze ak konfyans [ou]* gen nan li a. se konsa espwa [ou]* va toujou ap grandi ak pouvwa Sentespri a » (Women 15 :13)

* ‘nou’ modifye pou ‘ou’ obyen ‘mwen’ pou pèsonalize vèsè yo pou devosyon an.

Tout vèsè yo sòti nan vèsyon bib HAT 98

Kite espwa’w nan Jezi e pataje heritaj sa ak lot moun!

Idantite’w nan Bondye: Ou se lanmou!

Idantite, , ,

Wi, ou se lanmou!!!

Ooo lanmou ! Nou tèlman itilize mo sa nan anpil kontèx ke li preske pèdi sans pwòp li men lanmou se ou.

Ou Se lanmou e pa gen mo ki ase pou dekri lanmou infini ki entoure’w chak jou menm lè dèfwa ou ka santi ou sèl.

Ou se lanmou depi nan orijin kreyasyon ou ki soti nan imaj Bondye ki gen anpil renmen nan li (Jenèz 1 :26 ; 1 Jan 4 :16 ; Woman 5 :8) . Lanmou se ou e Bondye renmwen’w ak yon lanmou ki etènèl e ki fidèl (Jeremi 31 :3).

Ou se lanmou paske chak zo nan kòw te desinen ak anpil tandrès e ou se yon mounn ki gen anpli valè pou Bondye. Li pa janm rate baw souf pou yon segònd paske ou gen anpil enpòtans nan zyel e li renmenw anpil (Ezayi 43 :4 ; Jeremi 1 :5).

Lanmou se ou paske ou se limyè tè a e chak kote’w pase depi’w gen Jezi ou toujou pote klere lòt ki nan fènwa e ou pote lespwa (Matye 5 :14 :16).

Ou se lanmou paske nan nati’w ou toujou pot viktwa nan Jezikri e lanmou pa janm pedi konba (1 Korent 13 :8)

Bondye pa janm bay pitit li yo lòd ke li konnen yo paka obeyi…alò ou se lanmou paske Bondye ba ou lòt pou ou renmen yon ak lòt menm jan li renmen ou (Jan 15 :12)

Alò Ou pa bezwen al chache lanmou nan di mil chemen ni sipliye mounn pou renmen’w si tout fwa ou santi ou gen vid nan ou. Fèmen je’w ouvri kè’w bay Jezi. Ou ka repose atò paske lanmou se ou e Ou komplè nan Bondye! (Sòm 34 :10)

Kite idantite’w byen anrasine nan lanmou san parèy sa Bondye genyen pou ou konsa wa grandi nan jan ou renmen tèt ou ak lòt moun. Kite lanmou sa a fè fondasyon kèw ak pati prensipal de kiyès ou ye paske se li kap fè’w toujou gen fòs e ba’w viktwa.

Konsa menm jan ak apòt Pòl wa gen asirans ke « anyen paka fè [ou]*pèdi lanmou Kris gen pou [ou]* an : kit se lavi, kit se lanmò, ni zanj yo, ni lòt otorite ak pouvwa ki nan syèl la, te mèt se tan jodi a, te mèt se tan k’ap vini yo, ni pouvwa ki nan zantray tè a. Non, pa gen anyen nan tout kreyasyon an ki ka rive fè nou nan Jezikri, Senyè [ou]* an. » (Women 8 :38-39)

Benediksyon : « Mwen mande Senyè a pou [mwen]* gen plis renmen yonn pou lòt ak pou tout mounn. Kris la va fòtifye kè [mwen]* pou [mwen]* ka san repwòch devan Bondye, Papa [mwen]*, tankou moun k’ap viv apa pou li kouk lè Jezikri, Senyè [mwen] an, Amen. » (Modifye e adapte de 1 Tesalonisyen 3 :12-13 ; Vèsyon, HAT98)

* ‘nou’ modifye pou ‘ou’ obyen ‘mwen’  pou pèsonalize vèsè yo pou devosyon an.

Bondye renmen’w ak yon lanmou san mezi e se nan abondans ak asirans lanmou sa li vle’w viv chak jou. Ke nanm ou beni!