Archives par mot-clé : idantite

Idantite’w Nan Bondye: Ou se Pèseverans

Idantite, , , ,

“Travay di, pa fè parese. Mete aktivite nan sèvis n’ap rann Mèt la.Pandan n’ap tann lan, fè kè n’ kontan. Se pou nou gen anpil pasyans nan mitan soufrans nou yo. Pa janm sispann lapriyè.” Women 12:11-12

Pèseverans se abilite pou fè resistans nan nanm ak lespri lè yon mounn ap fè fas anba presyon eprèv ak yon lafwa solid nan Bondye paske ou  pa janm sèl (Jozye 1:9). Pèseverans manifeste nan yon moun lè mounn sa kontinye fè efò pou li jwenn yon rezilta.  Lòt mo ki itilize pou dekri pèsistans se tenasite, detèminasyon, ak andirans. Pèsevrans ka bay rezilta pozitif oswa negatif.  Si yon mounn pèsevere (toujou deside oswa kontinye agi) nan sa ki zak malonèt oswa fè ki mal (tankou jalouzi, kòlè, avaris, idolatry, rayisans etc; wè Galat 5:19-21), mounn sa ap detwi tèt li bout pa bout. Menm ou menm ki ankre idantite ak lavi’w sou prensip pawòl Bondye, pèseverans ou (ki se desisyon ou fè chak jou pou aliyen tèt ou ak pawòl Bondye yo ak pwomès li yo sou lavi ou), soti nan lafwa sa ak pwodi plis lespwa, lanmou, ak kouraj tout kote pase pou glwa Bondye (1 Tim 6:12; Women 12:12; Travay 1:14).

Pèseverans se yon chwa e li fè pati idantite’w paske Bondye toujou pèsevere nan lanmou li pou ou e chak jou li toujou ap chache kè’w ak yon relazyon entim ak ou. Ou ka aprann plis de benefis pèseverans yo nan  Jak 1:2-4; Women 5:1-5; 2 Tim 4:6-8. Idantite’w nan Bondye se pèseverans paske nan lavi sa w’ap toujou gen eprèv (Jan 16:33) men ou konnen nan Jezi ou genyen viktwa deja depi’w kite je’w fixe sou li (Ebre 6:19; Jan 15:5).

Pèseverans enpòtan pou ou prakite nan tout etap nan lavi’w paske pa gen anyen w’ap atreprann nan lavi ki gen anpil lavi vale ak potansyèl, ou p’ap rankontre opozisyon (Jan 16:33).  Anplis de sa, nan Bondye ou se pasyans, lafwa aklanmou ki fè pati engredyan necesè pou ou pèsevere. Menm jan misk ou yo fòk yo fè egzèsis e fòk ou gen pasyans pou ou wè rezilta ou vle yo e pou ede yo rete nan bon fonksyon. Plis ou itilize yo, plis ou djanm konsa toulafwaou agrandi e apwofondi chak fwa ou fè fas ak eprèv lavi sa ak lafwa nan Bondye,lespwa, ak lapriyè.

Se pa lafwa ak konpasyon Bondye ki renouvle chak maten w’ap viv chak jou e se menm lafwa ak pasyans sa ki deja fè pati idantite’w (sonje kiyès ou ye)  nan li ki va ede’w sipòte e gen viktwa sou tout tantasyon jouk sa kaba. Jan Ebre 10:36 te raple ou, “ Pa pèdi lasirans [ou]* te genyen an. Paske, gen yon gwo rekonpans ladan li. Men, [ou]* bezwen pasyans pou nou ka fè sa Bondye vle, pou nou ka resevwa sa l’ te pwomèt la.”

Pèsevere nan fè sa ki byen tankou pataje lanmou Bondye, kenbe lafwa, kanpe ou lajistis, egalite (ou se jistis), ak renmen; pale pou sa ki pi fèb yo e defann ti inosan kote’w yoKonfyans nan Bondye pou delivre ou e si yon mounn pèsiste (toujou deside) fè sa ki pa bon men pou ou (Miche 6:8).

Pou ou devlope pèseverans sa ki fè pati idantite’w nan Bondye, abiye’w pa lafwa chak jou, sonje ke nan Bondye ou se respe,lajwa, padon, otorite, kouraj,lasante, entregrite; ou gen sekirite nan li e ou pa manke anyen. Sitou kontinye fixe je ou Jezi nan tout sikonstans paske se li sèl ki ka satisfè tout dezi ou yo e li toujou avè’w (Ebre 12:1-2; Fil 3:13-14; Esayi 46; Lamantasyon 3:22-24). Fè lwanj li lè ou santi ou vle febli paske li ka plis de tout sa ou dezire oswa imajine (Efèz 3:20-21), beni mounn ki ap pèsekite’w ye (Women 12:13-21) e sonje ou fè pati yon fanmie ke mounn ki mete konfyans nan Bondye pa janm soti wont (Ezayi 40:31; 2 Istwa 15:7; Women 8:28).

Ann Lapriyè: Senyè mèsi paske nan ou mwen se pèseverans. Ou konnen li pa fasil pou pèsevere nan eprèv lavi sila men mwen di’w mèsi paske ou banm anpil egzanp nan Bib la e tou pa pèsòn Jekiri pou montre’m kijan pou’m pèsevere devan soufrans ak opozisyon. Tanpri edem toujou kenbe fèm nan lafwa nan tout sikontans e kite jem fixe sou ou. Mwen mande’w pou mwen toujou pèsevere nan fè sa ki byen tankou nan devlope yon relasyon sinsè avè’w, ak travay di pou lajistis, lanmou, padon, ak pataj pandan m’ap pataje bòn nouvèl lanmou ou an ak anpil respè ak kè kontan tout kote mwen pase. Mwen fè lwanj ak konpliman pou ou e remèsye’w pou viktwa ou ban mwen chak jou. Ke pèseverans nan lanmou ou pou mwen banm plis kouraj ak renmen chak jou poum ka pataje yo tout kote pase. Amen.

Benediksyon: Fil 1:6 “Mwen sèten Bondye ki te konmanse bon travay sa a nan [ou]*, li gen pou l’ kontinye’ l jouk li va fini’ l nèt, lè jou Jezikri a va rive.”

Pwov 4:25-26—” Gade dwat devan ou. Kenbe je ou fikse sou chemen ki dwat devan ou lan. Chache konnen byen sa w’ap fè. Konsa, tou sa w’ap fè ap mache byen pou ou. Pa vire ni adwat ni agoch. Pa lage kò ou nan fè sa ki mal.”

Mizik atis lakay sou sijè sa tou pou sipòte yo:

Lwanj ak adorasyon:

https://www.youtube.com/watch?v=6NoRbh2yQa8

Idantite’w nan Bondye: Ou se pasyans

Idantite, , , ,

“Nou tout nou fè pati pèp Bondye a: se li menm ki te renmen nou, ki te chwazi nou pou n’ ka viv pou li. Se poutèt sa, se pou nou gen kè sansib anpil, pou n’ aji byen yonn ak lòt, san lògèy, avèk anpil dousè, anpil pasyans.” Kol 3:12

“Gen pasyans”, “pran pasyans”, “devlope pasyans”, “nan lavi fòk ou gen pasyans” etc. Tout sa se bagay ou ka tande pou yon rezon oswa yon lòt men kisa pasyans lan ye menm? Koman pou’w devlope’l? Kisa Bib la de sa? Koman li fè pati de idantite’w nan Bondye?

Diksyonè define pasyans kòm yon kapasite pou aksepte pwovokasyon, kontraryete, malè, oswa doulè, san plent, pèt tanperaman (kolè, fristrasyon, jalouzi), ak iritasyon. Bib konkòdans lan dekri pasyans kòm on aksyon oswa yon pouvwa pou aji avèk kalm oswa kè kontan pandan w’ap tann yon bagay ki dwe fèt oswa ou espere fèt; tolerans**. Bib la di pasyans enplike resistans, endirans ak kapasite pou rete tann yon resilta ak yon detèminasyon pèsonèl l’ap fèt ak yon asirans fèm nan Bondye pou glwa li manifeste (2 Korent 1:6; 2 Korent 4-6).  

Pasyans ka ede ou gen bon resilta e fè ou pridan nan tout sa w’ap fè. Pwov 19:2 di “Sa pa bon pou ou prese fè anyen san ou pa konprann sa w’ap fè. Si ou pa gen pasyans, ou ka nan pwoblèm”. Kapasite sa pa sèlman aplike lè nan tout sa w’ap fè kit nan lajwa oswa nan difikilte. Men kèk vèsè ki ka ede ou gen plis bon konprann sou sijè sa: Women 5:3, 12:2; 2 Tes 1:4; Ebre 10:36.

Ou se pasyans paske Bondye se pasyans (sonje ou fè nan imaj li e pitit tig se tig) e li exprime pasyans sa nan lanmou li pou ou chak jou  (Travay 13:18; Women 3:25; Women 9:22; Women 15:4-5; 2 Pyè 3:15; 2 Korent 12:12). Pasyans se younn nan pi bèl kado Sentespri ba ou kom yon mounn chwazi (1 Tim 6:11; Kol 3:12) e li nesesè pou ou ka devlope gen bon relasyon ak tèt ou e ak lòt yo (Lik 8:15; Gal 5:22; Ebre 12:1; Efez 4:2; Tit 2:2).

Jan Pòl te ekri mounn Women yo, “Se pou Bondye ki bay pasyans ak ankourajman an fè [ou]** viv byen yonn ak lòt, pou [ou]** ka swiv egzanp [ou]* jwenn nan Jezikri (Women 15:5). Jezikri te demonstre pasyans nan tout sa lap fè (1 Tim 1:16; 1 Tim 6:11; ) e Bib la chaje ak anpil lòt egzanp kit e viv nan pasyans e wè glwa Bondye manifeste nan lavi yo tankou Jòb, Jozèf, Abraham, Ana, Rit, elatriye  ( Jenèz, Rit, 2 Tim 3:10; Ebre 6:12).

Paske ou se pasyans, Bib la ankouraje’w pou ou gen pasyans nan fè sa ki bon pandan w’ap kontinye chaje fas Bondye, onè, ak lavi etènèl (Women 2:7). Pasyans enpòtan paske l’ap ba ou andirans pou’w fè tout zafè ou byen e li gen plis rekonpans ke ògèy. Ekl 7:8 “Lè yon bagay ap fini li pi bon pase lè l’ap konmanse. Pito ou pran pasyans pase pou ou kite lògèy ap pouse ou.” Lè lafwa ou teste tou, li aprann ou plis pasyans menm jan latè ap tann lapli ak anpil  kalmte ( Jak 5:7). Ankouraje younn ak lòt nan lanmou ak lapè (2 Tim 4:2). Konstans nan travay oswa aplikasyon; pèseverans (Biblehub.com).

Anplis de sa, nan Bondye ou se lanmou e nan lanmou fòk gen pasyans (konesans idantite’w, padon, resistnas, andirans, tolerans, aji kalm oswa nan kè kontan san fristrasyon oswa kolè) ki mache men men ak lajwa, lapè, espwa, lafwa, otorite, ak entegrite. Menm jan Pòl te ekri a, “Moun ki gen renmen nan kè li gen pasyans, li gen bon kè, li p’ap anvye sò lòt moun. Li p’ap fè grandizè, li p’ap gonfle ak lògèy” 1 Kor 13:4,7. Ak pasyans wa rive reyisi nan tout sa w’ap fe (Ebre 6:12, 10:36; Jak 5:11; Rev 3:10; Rev 14:12).

Konesans de pawol Bondye yo fè’w gen tanperans ki li menm bay pasyans e ede’w viv yon vi pi sen ( 2 Pyè 1:6; Women 2:4). Gen yon ti pwovèb Kreyòl ki di “ak pasyans w’ap jwenn trip foumi”.  Pasyans ap ede pou gen sajès ak bon konprann ki ka fè ou refise bay tèt ou pwoblèm oswa pèdi tan move refleksyon ak kòlè lè yon bagay ofanse’w. Pwov. 19:11 di “Yon moun ki gen bon konprann pa fè kòlè fasil. Tout kalite li, se pa okipe moun ki fè mal.”

Pasyans ede’w kenbe sante’w djanm e rive lwen. Jan Pwov. 25:15 “Lè ou pa fè kòlè fasil, ou jwenn jwen pou fè chèf la kwè sa ou vle. Konsa tou, ak pawòl dous, w’ap kraze tout antrav ou ta ka jwenn sou chemen ou.”  Poutèt ou ka deside pou ou entansyonèlman lòt moun ak pasyans (2 Korent 6:6; Kol 1:11; 2 Tes 1:4).

Nan mònn sila kote tout bagay alavavit, e anpil enfòmasyon aksesib nan yon segond depi’w gen entènèt,  pasyans sanble ak yon bagay ansyen. Men bon karaktè nan lavi ak devlope idantite’w nan Bondye pa tankou pètpèt mayi depiw mete’l nan lwil li pete. Men li mande ou pou kiltive’l chak jou menm jan kiltivatè toujou ap netoiye tè yo pou yo gen bon rekòlt. Jak 5:7 di, “ Se poutèt sa, frè m’ yo, annou pran pasyans jouk jou Seyè a va vini. Gade jan kiltivatè a gen pasyans. Li gen pou l’ rete tann anvan pou tè a ba li yon bèl rekòt. Li pran pasyans, li rete tann lapli premye sezon an jouk lapli dènye sezon an.” Avèk èd Sentespri Bondye ki fè tout bagay posib pa lafwa, pasyans ou gen pou devlope plis pou grandè Bondye klere plis nan lavi ou(Mat 19:26)  

Ann travay pou lanmou ak pasyans!

Ann Lapriyè: Papa, mèsi paske idantite’m nan ou se pasyans. Ede’m devlope pa pouvwa lespri oupaske li pa toujou fasil poum andire sikonstans m’ap travèsè ak lajwa ak kalm. Mwen soumèt tout lavi mwen ak dezi mwen yo devan’w e mande’w ede kèm aksepte lanmou ou plis pou lafwa ak bon karaktè kontinye pran rasin nan mwen. Padone tout dout mwen yo e ke mwen gen plis pasyans ak tèt mwen ak lòt mounn  e sitiyasyon ke mwen pa ka chanje yo pou glwa ou manifeste plis. Nan non Jezi mwen priye. Amen.

Benediksyon: “Mwen mande Seyè a pou’l dirije kè [ou]* pou [ou]* ka renmen Bondye, pou [ou]* ka gen pasyans tankou Kris la.” (2 Tes 3:5) “Mwen mande Bondye pou l’ fòtifye [ou]* tout jan ak bèl pouvwa li pou [ou]* ka sipòte tout bagay avèk pasyans.” (Kol 1:11)

*Modifye pou devosyon an    **Diksyonè.com

Ankourajman: “Paske, [ou]* konnen byen, lè konfyans [ou]* gen nan Bondye a tonbe anba eprèv, sa ban [ou]* pasyans. Men, fòk pasyans sa a fin fè travay li nèt pou [ou]* kapab bon nèt sou tout pwen, byen devlope, san [ou]* pa manke anyen.Si yon moun pami [ou]* manke bon konprann, se pou’l mande Bondye, Bondye va ba li li. Paske, Bondye bay tout moun san mezire, pou gremesi. Men, se pou li mande ak konfyans, san’l pa gen doutans. Paske, moun ki gen doutans, li tankou lanm lanmè van ap boulvèse.” Jak 1:3-6

Idantite’w nan Bondye: Ou se entegrite

Idantite, , , , , , ,

“Ou menm, nan tout bagay, se pou ou bay bon egzanp: toujou fè sa ki byen. Lè w’ap moutre yo kichòy, se pou ou serye: ba yo verite a san chache twonpe yo. Pale pawòl ki dakò ak verite a pou yo pa kritike ou. Konsa, lènmi nou yo va wont. Yo p’ap jwenn anyen pou yo di sou nou”. Tit 2:7-8

Entegrite se yon desisyon pou aksepte viv selon yon kòd moral ak prensip ki demontre karaktè ak onètete (ki pa nan patipri ni nan mayònnaj oswa manti). Mo sa soti nan Ebre “tom, tummah” ki tradwi “senplisite”, “fondamantal nan karaktè ki vre”,  “otantik”, “onèt”, “solidite ” ( nan sans tèt ou byen plase sou zepòl ou), “antye oswa konplè”, “mache dwat”, e “pèfeksyon”***. Nan nouvo testaman an mo entegrite a itilize nan sans “senserite”, “verite”, “ kè ki gen bon kalite; kè pi”, “yon sèl grenn je” (ki pa nan gen egoist e gen yon sèl pawòl)***. Nan rezime, entegrite se karaktè youn mounn ki ede yon mounn ki pratike li (wi, ‘pratike’ paske se yon chwa entansyonèl pou ou fè chak jou) viv yon mannyè ki senp e sensè nan tout l’ap fè.

Entegrite se idantite’w paske ou fèt nan imaj Bondye (Jenèz 1:27), e li se entegrite. Tout kalite sa yo reflekte nan pawòl li yo nan Bib la (Ezayi 45:23). Pawòl li yo se verite e pa gen anyen okenn mounn ka fè pou demanti yo. Bondye te demontre sa tou nan karaktè Jezikri kote nan yo te definil tankou yon nonm ki detèminen pou fè sa ki dwat, jis, e ekselan ki soti nan yon lanmou enkondisyonèl menm lè sa te lakòz li anpil pèsekisyon. Li te anseye tout mounn verite sou pawòl Bondye yo san patipri (Matye 22:16, Mak 12:14; Fil 4:8).

Nan yon mònn kote gen anpil magouy ak mechanste, li pa fasil kòm pitit Bondye pou’w wè entegrite fè pati entegral lavi tout mounn ki di y’ap sèvi Bondye men ou menm ou diferan paske ou ankre idantite ou nan li e ou pa sèl. Lesprisen la ak ou e tout rès fanmi ou yo nan lafwa ap kole zepòl ak ou chak jou. Ou se yon mounn chwazi.

Lè ou mache nan entegrite ou fè sa ki bon e wout ou toujou pwoteje e ou viv yon san krent paske ou konnen ou sèvi byen ak tout mounn e ou gen yon relasyon sinsè ak Bondye (Pwov. 10:9; Sòm 25:21). Entegrite ak kenbe’w pou ou pa koze tet ou chagren oswa detwi relasyon ou ak Bondye, tet ou e mounn ki kote ou yo swa nan biznis lekol, oswa lot tip relasyon  (Som 41:2; Pwov 11:3, 13:6).

Li necesè pou ou konnen ke entegrite fè pati entegral karaktè ou nan Kris paske se li menm k’ap fè ou pwospere ak pwogr jwi lavi ki plen viktwa sa ke Bondye prepare pou ou (Det 9:5; 1 Wa 9:4). Sa fè Bondye lapènn lè li wè pitit li yo ap viv nan manti, rayisans, negative, ak mechanste ak tèt yo ak lòt mounn (Ezayi 59:4). Poutèt sa lè ou aksepte idantite’w se entegrite e komanse viv nan verite sa, wa va wè plis glwa Bondye manifeste nan lavi ou (Neh 7:2). Konsa tou wa va jwi plis respè ak kè poze ak lòt mounn ki nan lantouranj ou paske y’ap ka fè’w konfyans nan nenpòt bagay (piti koul ye oswa gwo koze) yo ta bezwen jere ( Eg. Jozef nan liv Jenèz oswa Hanani nan Nehemi 2).

Entegrite ap ede’w mache selon sajès Bondye e non pas tout avis mounn (2 Korent 8:11). Sa pla vle di ou pap koute konsèy men ou toujou al chache sa Bondye di nan sijè/sikonstans w’ap travèse nan moman an epi filtre tout sa ou tande e santi nan pawòl Bondye yo. Lesprisen li va fè’w wè verite nan tout sityasyon paske li nan ou e li toujou la avè’w (Jan 14:16; Jan 16:7; Lik 12:12; Woman 8:26-27).

Mache nan senplisite ak onètete (entegrite), konsa pou konsyans ou ka klè e menm jan ak Jòb w’ap gen anpil lafwa lè w’ap pale ak Bondye kit nan lajwa oswa nan soufrans (Jòb 2:32; Korent 1:12). Le’w deside viv nan entegrite (viv selon prensip Bondye yo, sevi youn ak lòt nan lanmou ak respè) e fè tout zafè’w nan yon manyè ki dwat, w’ap gen anpil lenmi tou.

Se pa tout mounn k’ap konprann ou e menm mounn ki pwòch ou pafwa ka vinn kritike’w anpil jan madan Jòb la te fè a (Jòb b2:9). Sitiyasyon lavi sa ap toujou vinn sou do pye’w pou teste konfyans ou nan Bondye e vle fè’w bite men lè w’ap mache nan entegrite w’ap mache nan lapè (Jan 16:33). Men mounn k’ap rayi ou yo oswa menace lavi ou yo ap fè’l paske yo pa gen konprann  lanmou Bondye a nan kè yo (Pwov 29:10).

Ou pa bezwen pè paskse nan Jezi ou se viktwa! (Ezayi 54:3; Sòm 55:23-24, 65; 1 Korent 15:57;  Rev 19) men entegrite’w ak lafwa nan Bondye ap ba ou plis fòs pou kontinye kwè nan Bondye kòm pi gwo defans ak protektè ou (Job 6:29, Som 7:8). Konsa tou, y’ap ba ou anpil renmen, resistans, fòs, ak pasyans pou ou fè fas ak kritik/pozisyon yo e frennen presyon kanmarad ou yo ta fè sou ou pou fose’w reaji yon jan ki pap onore ni Bondye ni lafwa ou nan li (Jòb 27:5).

Ann Lapriyè: Senyè mèsi paske mwen se yon mounn ki gen anpil karaktè paske mwen deside kite Lesprisen ou gidem chak jou. Mèsi paske se ou ki fòme karaktè’m e se ou ki sous idante ak lavi’m chak jou. Mwen se entegrite. Ke verite sa ankre nan fon kèm pi plis e anvayi chak kwen nan lavi mwen pou’m ka viv idantite sa plis pou glwa ou.

Nan ou mwen jwenn verite e viv yon vi nan senplisite ak onètete ki ap ede mwen pwogrese nan tout sa m’ap fè. Menm jan ak Jozèf ak anpil lòt karaktè nan Bib la tankou Moyiz, Hanani, Danyèl, David, Natanayèl, Zacchari etc,  edem viv plis tankou yon fanm/gason ki gen entregrite. Chanje kèm plis paske mwen realize ke chanjman mwen swete wè nan fanmim oswa nan peyim ki chaje koripsyon dwe soti nan mwen avan. Mèsi pou konsyans sa w’ap ede mwen pran chak jou de wòl mwen nan enviwònman mwen tou paske ou pa janm fè erè e plan lavim byen trace nan men’w. Edem gen plis entegrite nan tout sa m’ap fè chak jou e sonje enpotans li. Mèsi pou tout sa ou fè pou mwen e prezans ou nan lavi’m. Amen.

Vèsè pou metite: Sòm 25:21-22

Ann Reflechi : Ki chanjman ou ka komanse aplike nan lavi’w pou ou reflekte nouvo idantite sa?

Ou ka pataje repons ou yo nan espas komente a epi pa bliye pataje paj sa ak yon zanmi!

Idantite’w nan Bondye: Ou pa rasis

Idantite, , , , , ,

“Li (Pyè) di yo: — Nou konnen sa pa fèt: jwif pa gendwa mele ak moun lòt nasyon ni mete pye lakay yo. Relijyon’l pa penmèt sa. Men, Bondye fè m konnen, mwen pa gendwa gade pèsonn pou move moun ni pou moun ki pa nan kondisyon pou sèvi Bondye.”Travay 10:28 HAT98

Nan moman koulyea non sèlman lemònn boulvèse anba yon pandeni viris (COVID-19) men tou gen yon moveman pou respekte lavi mounn ki gen koulè po “nwa”. Manifestasyon ak deblozay ap fè aktyalite, se younn ak chire pit ak lòt. Lemòn boulvèse anpil 2020 sila men mounn ki ankre idantite yo nan Bondye tankou ou menm konnen ke gen lespwa e chanjman pozitif kap fèt.

Kisa la Bib di sou koze rasis, vyolans, ak enjistis sa yo nap obsève? Ki responsabilite ou genyen kòm disip Jezi nan moman kritik sa? Tankou eske ou dwe rayi mounn ki gen koulè po differan de ou oswa ki gen differan relijion oswa pale yon lòt lang? Eske ou dwe kenbe rankinn poutèt lesklavaj ak mechanste e jije tout nasyon ki tap domine yo menm jan? Kijan ou ka fè pati chanjman an nan yon fason kap dire e kap avanse wayòm Jehowah a sou tè a?

Nan Travay 10, Kònèy, yon nonm ki te kaptenn yon batayon sòlda moun peyi Itali nan lame women an ki te gen anpil krentif pou Bondye fè yon vizyon kote zanj Bondye rakonte’l kibò younn nan disip Bondye yo (Simon ki gen ti non Pyè) ye pou envite’l lakay li. Nan tan sa relijyon jwif la te entèdi yo pou yo mele ak lòt nasyon (koze rasis sa pa nouvo non). Pa lontan apre Bondye bay Pyè yon visyon pou te prepare kè li pou li ale lakay Konèy e preche nouvèl lanmò ak rezireksyon Jezikri e revele entensyon li pou tout mounn sove. Pyè pataje ak tout mounn nan 10:28 kijan Bondye pa nan patipri e repòns sa ede nou konprann ki wòl nou nan sityasyon aktyèl sa yo.

Bondye konsidere tout mounn menm jan kelkeswa koule po yo oswa nasyonalite yo. Sa vle di Bondye pa rasid (li pa rayi ni renmen younn nan plis le lòt poutèt koule je, po, lang, cheve, kilti etc.) E li vle ou kiltive menm prinsip sa yo. Ki fè nan Bondye, idantite’w pa rasis (panse ou siperyè ak yon lòt oswa kenbe rakinn akòz de sa kite pase avan tankou lesklavaj, gè, etc; menm sityasyin aktyèl yo e jije mounn yo sou pase sa yo) e ou paka anji tankou younn (Lik 6: 27-36; Mat 5: 43-48).

Ou se solda lanmou, lespwa, lajwa, respè, viktwa, ak lafwa e ou represente Bondye tout kote ou pase. Nan tout sa w’ap fè, bat pou ou reflekte idantite sa yo konsa lòt mounn pral fè experyans glwa Bondye a travè lavi ou chak jou.

Efèz 5:1 raple ou pou ou imite Bondye paske ou kreye ak imaj li — Bondye se lanmou e ou menm tou ou se lanmou. Pi gwo komandman li ba ou se pou renmen lòt mounn (kelkeswa koulè pò, relijyon oswa nasyonalite li) tankou pwòp tèt pa ou ak menm jan Bondye renmen ou (Jan 13:34).

Ou dwe fache lè’w wè enjistis e kanpe pou sa pi fèb yo (Pwob 31: 8-9). Men tou Bib la di “Si nou ankòlè, veye kò nou pou kòlè a pa fè nou fè sa ki mal. Pa al dòmi ak kòlè nan kè nou. Pa bay Satan pye sou nou” Efezyen 4:26‭-‬27 HAT98. Sa vle di pandan w’ap fè solidarite ak mounn k’ap fè sa byen tankou pou sa kap chache lajistis pou younn ak lòk ak pou dwa tout mounn respèkte, sonje tou ke nou tout se pitit Bondye e lanmou li an san patipri.

Lè ou simaye lanmou nan plas rakinn, rayisans ak vyolans konsa wa ede mounn kap soufri yo (nan nenpòt sitiyasyon ki sòt nan nenpòt peyi ke yo jon, nwa, rouj, blan etc; pale nenpòt lang) pou yo jwenn solisyon ki aligne ak pawòl Bondye nan Bib la, e ofri yo lespwa ki soti nan lanmou infini Bondye gen pou yo a pou yon chanjman kap dire.

“Paske sa nou konnen an, se ti zing nou konnen li. Mesaj Bondye a se yon ti kal nou rive bay ladan li. Men lè sa ki bon nèt la va vini, sa ki poko fin bon an gen pou disparèt. Koulyeya, gen twa bagay ki rete: se lafwa, lesperans, lamou. Men se lamou ki gen plis valè nan twa a.”
1 Korent 13:9‭-‬10‭, ‬13 HAT98

Ansanm nou pi fò e andedann nou tout senyen menm jan. Ann kole zepòl pou yon demen miyò.

Lòt Vèsè pou medite jodia: “Kounyeya pa gen diferans ant moun ki jwif ak moun ki pa jwif, pa gen diferans ant moun ki esklav ak moun ki pa esklav, ant fanm ak gason. Nou tout nou fè yonn nan Jezikri. Si ou se moun Kris la, enben ou se pitit pitit Abraram. Ou gen pou resevwa eritaj Bondye te pwomèt la.”
Galat 3:28‭-‬29 HAT98

Kesyon pou aksyon: kijan ou ka demonstre idantite nan Bondye jodia (Ou pa yon rasis) e pataje pawòl Bondye a pou pote lapè e konbat racist ak vyolans pa lanmou?

Nan moman sa ou bezwen yon zanmi

Prensip, , , , ,

“Menm jan fè file fè, konsa tou pou moun, yonn aprann nan men lòt.” Pwovèb 27:17 HAT98

Yon zanmi ki toujou la,
Younn ki pa janm an reta,
Yon mounn ou ka rele nenpòt moman,
Ki pa janm fatigue ni arogan.

Yon bon zanmi se yon pèl ki ra,
Ni lajan ni lò paka ranplase moun sa.
Zanmitay ou ak li se gwo koze,
Li bay lavi plis sans nan yon fason san pretans.
Depiw andanje, pou’w sove’w li pa nan rans.

Korona, vyolans, ensètid, ak inkyetid lavi ka vle’w kwè’w ou poukò’w e dwe dekouraje.
Men se nan moman sa menm ou dwe ale kay zanmi’w lan.
Grenn mounn ki toujou konprann ou e renmen’w ak tout defo e kalite ou yo.
Nan moman sa ou bezwen yon zanmi…

Ah non! Pa di ou pa ka fè lòt moun konfyans oswa ou pa vle blese.
Bay lanmou yon chans nan kè’w e kite yon zanmi ab pran plas nan tout dout ou yo. Zanmi sa pwoblèm mèt a gòch adwat men depi’w kote’l tout bagay poze.
Yon zanmi ki la pou siye dlo nan jew e fè’w ri lè trò ta bare pye’w.


Zanmi sa se Bondye ki renmen’w anpil la e ki vle ou rive lwen.
Zanmi sa reflekte nan frè ak sè ou yo nan lafwa e fanmi ki toujou la pou priye pou ou e ak ou paske ou fè pati yon fanmi.
Zanmi sa se ou tou paske pi gwo enemi lòm se tèt li. Poutèt sa fòk ou kwè nan idantite’w nan Bondye pou ou pa mache tèt bese e deklare viktwa Bondye sou lavi ou chak jou.

Nan moman sa ou bezwen yon zanmi ki kwè nan ou, sensib pou ou, e vle wè ou fleri chak jou. Zanmi sa se Jezi, se frè ak sè w yo ki renmen’w, e zanmi sa dwe ou tou.

Eske zanmitay ou yo djanm? Fè envantè paske li nesesè.
Pi gwo kado a se lavi e ou genyen’l.
Pwofite’l e pa bliye yon zanmi se yon trezò pou lavi. Fè kè’w kontan paske nan moman sa ou gen yon zanmi. Ou pa pou kò’w alò rejwi.

Idantite’w nan Bondye: Ou se lasante

Idantite, , , ,

“ Men, mwen pral ba yo renmèd pou yo sa gaya. M’ap geri yo. M’ap fè yo konnen jan sa bon lè moun viv ak kè poze san okenn danje.” Jeremi 33:6

Lasante se pi gwo trezò ou posede e se li ki ba’w posibilite pou ou akompli tout rèv ou genyen e simayen pawòl ak lanmou Bondye a toupatou kote’w pase. Ak koze korona viris aktyèl, anpil mounn vinn plis apresye enpòtans lasante. Pa gen lò ni diaman ni okenn kantite lajan ki ka achte’l oswa doktè ki ka ba ou li. Bon nouvèl jodia, se ke gerizon Bondye toujou disponib e li pa gen okenn maladi ki enposib pou li geri!

 Lasante pa sèlman refere de kòw lèw pa gen okinn malèz men tou de eta lespri’w, emosyon, relasyon, ak nivo esperityèl ou yo. Menm jan mo ou itlize yo afekte kalite lavi ou genyen, konsa tou yo afekste eta sante’w nan tout dimensyon sa yo (Pwovèb 16:24). Nan Jeremi 33:6, Bondye te pwomèt pou li geri mounn pèp  Izrayel ak peyi Jida yo tout maladi, ba yo lasante, e fè yo kanbe ankò . Konsa Bondye fèw menm pwomès sa antan ke pitit li ke li damou anpil la(tcheke tou Jeremi 30:7,Sòm 146:8; Exòd 23:25, Ezayi 41:10; 2 Wa 20:5).

Kit ou gen pwoblèm emosyonèl, mental, espirityèl, sosyal, oswa fizik Bondye vle geri’w! Li te sakrifye lavi’l sou kwa pou kwape tout enfimite ak maladi ou ka genyen e Lesentespri li ki abite nan ou depi’w te aksepte viv pou li a non sèlman ka men li vle geri’w pou glwa li (Ezayi 53:4-6;  Mat 8:1-3; 1 Korent 6:19-20).

Sak pi bèl la, pa pouvwa Jezikri ou gen otorite pou ou geri lòt mounn tou nan non li (Malachi 4:2; Mat 10; Lik 9,10; Mak 16). Non selman ou dwe e ou geri, li vle ou geri lòt mounn ou rankontre ki malad tou. Se poutèt sa younn nan idantite’w nan Bondye se Lasante! Lè’w wè maladi ap tonbe agòch adwat, pran prekosyon ki baze sou bon sans li ba ou yo (pran syen tèt ou manje bagay natirèl e ki bon pou kòw tout otan ou kapab, domi byen, redwi strès, pratike bon ijyèn, fè egzesis etc Pwovèb 17:22) men pa neglige lapriyè. Pran otorite’w sou lasante’w r invite wayòm Bondye a nan lavi lòt ki kote’w yo ki ap soufri pou yon rezon pou yon lòt paske kote ou ye, dwe gen lasante (e sa komanse nan ou e nan pase tan nan lapriyè; Det 7:12-15; Prov 3:5-4; ) e yo menm toh. Gerizon se yon kado e komandman Bondye te bay tout disip li yo e si li ou genyen tou jodia. Pa neglige privilèj sa e pase ti tan sou vèsè bib yo sou sijè sa pou apwonfondi idantite sa ou genyen nan li.

Annn Lapriyè: Mèsi paske idantite’m nan ou se lasante. Edem viv nan yon fason ki reflekte realite sa nan ou poum ka ede lòt viv nan menm pouvwa ak otorite ou bay pitit ou yo ki kwè nan ou. Bondye mèsi paske ou ban mwen lasante chak jou e ou kouvri mwen anba manto lagras ou. Mwen mande’w fè inventè tout sa ki andann e mete lavi’w ak lasante nan tout pati nan mwen ki pa an akò ak pawòl ou yo pou lajwa, lafwa, viktwa, ak glwa ou manifeste plis nan vi mwen. Konsa lavi mwen a sèvi yon testaman de egzistans ak glwa ou e plis pitit ou yo ap retounen jwenn ou lè yo experyanse menm lanmou sa.

Si mwen ta malad jodia, mwen delakre gerizon sou tout ògan nan kòm e mwen kouvrim ak san ou Jezi. Gerizon se pou mwen e mwen kwè ke mwen gentan geri pa pouvwa Lesentespri ou ki abite e ap travay nan mwen. Mwen deklare gerizon tou sou tout pitit ou yo tou ki afekte ak viris sa e lòt k’ap soufri pou lòt rezon. Mwen beni non ou e mwen di’w mèsi pou tout mounn w’ap geri nan moman sa (ajoute non yon kounn ki sou kè’w ki ap soufri pou yon rezon oswa yon lòt epi kontinye di Bondye mèsi pou mounn nan oswa pou gerizon paw). Banm fòs poum viv nan idantite sa plis e men jan ak Pyè te di nonm enfim nan : “ mwen pa gen li lajan ni lò. Men, sa m genyen an, m’ap bao u li. Nan non Jezikri de Nazarèt, leve mache.” (Travay 3:6 ) a tout enfimite mwen ta rankontre jodia. Amen.

Konfye’w nan Bondye ak tout kèw

Prensip, , , , , ,

Ak tout insètitid ki pafwa ka antoure ou, li fasil pou ou ta santi ou dekouraje e san fòs men ou pa poukont ou. Non, ou pa sèl paske ou fè pati yon fanmi ki plis se sa je ou we yo. Epi, ou gen yon idantite ki ankre nan yon Bondye ki fidèl, ki konnen’w an detay, e ki trase plan lavi ou ak anpil lanmou ak tandrès.

Sonje ke Bondye se yon bon zanmi ki la nan bon ni move tan. Ou se pitit yon wa ki pa janm wè defèt, ki pap janm abandone pitit li yo, e li pat janm pèdi batay e li pap ka pèdi sa. Li mache de viktwa an viktwa. Se san li ap koule nan vènn ou alò ou menm tou ou paka pèdi prose. Lesprisen li nan ou depi’w lè ou te aksepte lanmou san fi li gen pou a e te demontre li sou lakwa a. Ou se viktwa e se yon asirans etènèl nan li.

Lè’w pa ka jwenn mo yo pou exprime sa’w santi, pa kite perèz, chagren, ak dekourajman pran plas nan ou. Kite pawòl Bondye yo nan Bib la pale pou ou pandan w’ap medite sou yo. Pa egzamp, Sòm 27, ki raple ou pou chwazi fè Bondye konfyans chak segond w’ap respire paske li toujou pou reponn a tan.


Sòm 27


“ Seyè a se limyè mwen, se li ki delivrans mwen. Ki moun ki ka fè m’ pè? Se Seyè a k’ap pwoteje mwen. Ki moun ki ka fè m’ tranble? Lè mechan yo ap mache sou mwen, lè lènmi m’ yo ap chache touye m’, se yo menm k’ap bite, se yo menm k’ap tonbe. Menm si tout yon lame ta sènen’m toupatou, mwen p’ap pè anyen. Menm si yo ta vle fè’ m lagè, m’ap toujou gen konfyans nan Bondye.


Mwen mande Senyè a yon bagay, yon bagay mwen anvi anpil anpil: Se pou m’ ta pase tout lavi m’ nan kay Seyè a, pou m’ ka gade bèl bagay li yo byen, pou m’ ka pran tan m’ pou m’ kalkile nan kay ki apa pou li a. Jou malè tonbe sou mwen, l’a pwoteje m’ lakay li. L’a kache’m byen fon nan tanp li a. L’a leve’m mete yon kote pou anyen pa rive’m.


Se konsa m’ap genyen batay la sou tout lènmi k’ap sènen’m yo. M’a bat tanbou, m’a ofri bèt pou touye bay Bondye nan tanp li a. M’a chante, m’a fè lwanj Seyè a. Senyè, tande’m non lè m’ap rele ou! Gen pitye pou mwen, reponn mwen non!


Ou pale nan kè’m, ou di m’ vin jwenn ou. M’ap vin jwenn ou, Senyè. Pa vire do ban mwen. Pa fache, pa repouse moun k’ap sèvi ou la. Se ou ki tout sekou mwen. Pa kite’m pou kont mwen, pa lage’ m.


Papa’m ak manman’m te mèt lage’m, Senyè a va ranmase mwen. Senyè, moutre’ m jan ou vle’ m viv la. Fè’ m mache nan chemen ki pa gen move pa a, paske mwen gen anpil lènmi k’ap veye’ m. Pa lage’m nan men lènmi’m yo. Yo soti pou yo touye’ m. Se yon bann moun k’ap bay manti. Mwen menm, mwen sèten m’a viv pou’m wè jan Bondye sèvi byen ak pèp li a.


Mete espwa ou nan Senyè a! Gen konfyans, pa dekouraje! Wi, mete espwa ou nan Senyè a!”

Benediksyon: Ke pawòl Bondye yo mete fòs nan feblès, lajwa nan tritès ou, lapè nan inkyetid ou yo, sekirite nan dout ou yo, ba’w plis opotinite pou kontinye grandi nan lafwa, e kenbe’w djanm nan tout sikonstans lavi a. Ke nanm ou fotifye e lafwa ou restore nan li chak jou pandan l’ap kontinye proteje ou ak tout fanmi e itilize’w pou glwa li tout kote ou pase.